Perante este Xurado Provincial de Montes Veciñais en Man Común tramítase o expediente de clasificación do monte coas características que a continuación se indican:

Expediente número: 1/2000.

Denominación: monte de Foilebar (parcelas: O Pico de Leizán e A Louseira, A Legua e Pico de Cabude).

Comunidade propietaria: veciños da parroquia de Foilebar.

Concello: O Incio.

Superficie total: 48 hectáreas.

Estremas da parcela nº 1-O Pico de Leizán e A Louseira-28 hectáreas:

Norte: predios particulares de veciños das parroquias de Vilarxoán (Leizán) e Foilebar. Leste e Sur: monte veciñal en man común da parroquia de Vilarxoán. Oeste: predios particulares de veciños da parroquia de Foilebar (Covelas) e monte veciñal en man común de Santa María.

Estremas da parcela nº 2 A Legua-1,5 hectáreas:

Norte: predios particulares de veciños da parroquia de Toldaos e camiño de servidume ós predios. Leste e sur: predios particulares de veciños das

parroquias de Santa María do Incio e Foilebar (Cabude), e camiño real a Foilebar. Oeste: predios particulares de veciños da parroquia de Toldaos e camiño de servidume ós predios.

Estremas da parcela nº 3-Pico de Cabude-18,5 hectáreas:

Norte: camiño real a Foilebar. Leste: predios particulares de veciños da parroquia de Santa María do Incio (Montemeán) e camiño de servidume a predios. Sur: estrada a Foilebar. Oeste: monte veciñal en man común da parroquia do Hospital.

En virtude do acordado polo xurado na sesión que tivo lugar o día 14 de decembro de 1999 e, en cumprimento da orde do instructor, conforme o disposto na Lei de montes veciñais en man común do 10 de outubro de 1989, e demais disposicións de aplicación, por este edicto faise pública a iniciación do expediente indicado co obxecto de que, de acordo co previsto no artigo 23 do regulamento aprobado polo Decreto 260/1992, do 4 de setembro, para a execución da citada lei, cantas persoas, organismos e corporacións resulten interesados poidan comparecer e intervir no expediente iniciado e formular perante o xurado, no prazo dun mes contado a partir do día seguinte ó da publicación do presente edicto no Diario Oficial de Galicia, cantas alegacións coiden oportunas na defensa dos dereitos que crean asistilos en relación co monte, achegando, se é o caso, a documentación que consideren conveniente ó respecto.

Lugo, 27 de outubro de 2000.

Luis González Vázquez

Presidente do Xurado Provincial de Montes

Veciñais en Man Común de Lugo