Actualmente atopámonos en pleno proceso de implantación do sistema educativo establecido pola Lei orgánica 1/1990, do 3 de outubro, de ordenación xeral do sistema educativo e, en concreto, acaba de remata-lo proceso dun novo nivel obrigatorio: a educación secundaria obrigatoria.

Polas consecuencias que para os concertos de cada centro educativo tivo a dita transformación, con repercusión directa no emprego, a Consellería de Educación e Ordenación Universitaria, as organizacións patronais máis representativas do sector do ensino privado concertado e as organizacións sindicais do ensino privado adoptaron, desde o ano 1992, unha serie de medidas a prol do mantemento do emprego no sector do ensino privado concertado da nosa Comunidade Autónoma, así como para a ampliación dos equipos docentes dos centros concertados.

As ditas medidas foron recollidas nos distintos acordos que se asinaron e que, basicamente, consistían en que aqueles profesores afectados pola reducción ou supresión de unidades concertadas puidesen ser recolocados, como profesores de apoio, noutros centros privados concertados.

Tendo en conta a disposición adicional sexta da Lei 7/1999, do 29 de decembro, de orzamentos xerais da Comunidade Autónoma de Galicia para o ano 2000

Esta Consellería de Educación e Ordenación Universitaria

DISPÓN:

Primeiro.-O profesorado de apoio existente, á entrada en vigor da Lei 7/1999, nos centros privados concertados pasará a formar parte, para tódolos efectos, dos cadros de persoal docente dos centros onde estivese prestando os seus servicios.

Segundo.-Facer pública a relación de centros privados concertados que, con anterioridade ó 1 de xaneiro de 2000, contaban con profesor de apoio, indicando o seu número.

Terceiro.-Contra esta orde, que esgota a vía administrativa, os interesados poderán interpoñer recurso potestativo de reposición perante o conselleiro de Educación e Ordenación Universitaria, no prazo dun mes, a partir do día seguinte ó da súa publicación no Diario Oficial de Galicia, segundo o disposto nos artigos 116 e 117 da Lei 4/1999 (BOE do 14 de xaneiro), de modificación da Lei 30/1992, de réxime

xurídico das administracións públicas e do procedemento administrativo común, ou ben directamente o recurso contencioso-administrativo no prazo de dous meses perante o Tribunal Superior de Xustiza de Galicia.

Santiago de Compostela, 30 de agosto de 2000.

Celso Currás Fernández

Conselleiro de Educación e Ordenación Universitaria

ANEXO

Provincia: A Coruña.

Provincia: Lugo.

Provincia: Ourense.

Provincia: Pontevedra.