Dentro do programa de actividades da EGAP para 2000, e conforme as funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse en colaboración coa Consellería de Agricultura, Gandería e Política Agroalimentaria os cursos que figuran no anexo, que deberán desenvolverse segundo as seguintes bases:
Primeira.-Solicitudes.
As solicitudes de admisión para os cursos, segundo o modelo que figura ó final da convocatoria, dirixi
ranse á Consellería de Agricultura, Gandería e Política Agroalimentaria e presentaranse no seu rexistro xeral ou en calquera das súas delegacións provinciais sen prexuízo do disposto no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.
Segunda.-Prazo.
O prazo de presentación de solicitudes rematará o 15 de setembro.
Terceira.-Selección.
Os criterios de selección serán os que figuran no anexo, segundo as características de cada curso, e respectarán en todo caso os criterios selectivos sinalados con carácter xeral na Resolución 27 de xuño de 1994 (DOG nº 149, do 3 de agosto).
Cuarta.-Certificado de asistencia.
Outorgaráselle-lo correspondente certificado de asitencia ós alumnos que participen con regularidade no curso.
É obrigatoria a asistencia e puntualidade a tódalas sesións do curso. Toda ausencia deberá ser xustificada debidamente polo interesado. A falta de asistencia, aínda que sexa xustificada, a máis do 15% das horas lectivas programadas, impedirá a expedición da certificación anteriormente referida e dará lugar á baixa no curso coa perda de tódolos dereitos.
Santiago de Compostela, 11 de agosto de 2000.
Domingo Bello Janeiro
Director da Escola Galega de Administración
Pública
ANEXO I
* Curso: a xestión dos residuos no ámbito agrario galego.
1. Obxectivos.
Dar a coñece-lo marco da normativa ambiental no tocante á contaminación por nitratos, expoñe-los aspectos específicos da contaminación nitroxenada das principais fontes agrarias e a presentación das medidas e as prácticas empregadas na súa análise.
2. Destinatarios.
Persoal técnico de producción agropecuaria da Consellería de Agricultura, Gandería e Política Agroalimentaria que intervén nos distintos programas relacionados coa xestión de residuos agrarios.
3. Criterios de selección.
Daráselles prioridade ás solicitudes daqueles funcionarios e persoal contratado que teñan máis relación cos temas de producción e sanidade vexetal, tanto na xestión administrativa como na execución dos programas de campo.
4. Desenvolvemento.
4.1. Número de edicións: 1.
4.2. Duración de cada curso: 20 horas.
4.3. Datas: outubro-novembro de 2000; a data de comezo e o lugar de realización, notificaráselles persoalmente ós seleccionados.
4.4. Horario: das 9 ás 21 horas, horario de mañá e tarde segundo o día.
4.5. Número de prazas: 20.
5. Contido.
A xestión de residuos agrarios. Normativa ambiental a nivel comunitario, estatal e autonómico, análise dos efluentes zootécnicos nas explotacións gandeiras, plan de xestión de residuos agrarios, distintas alternativas á eliminación de xurros, reutilización en fertilización de cultivos agrícolas, a comisión de análises enerxéticas de residuos agrarios, análise dunha explotación tipo, emprego de lodos procedentes de depuradoras en agricultura.
* Curso: a producción integrada como sistema de explotación na producción agraria galega.
1. Obxectivos.
Dar a coñece-lo marco normativo da producción integrada e a súa aplicación na Comunidade Autónoma de Galicia, así como os requisitos técnicos que deberán cumpri-los cultivos para o seu recoñemento como producción integrada.
2. Destinatarios.
Persoal técnico de producción agropecuaria da Consellería de Agricultura, Gandería e Política Agroalimentaria que intervén na execución de programas relacionados coa producción integrada.
3. Criterios de selección.
Daráselles prioridade ás solicitudes daqueles funcionarios e persoal contratado que teñan máis relación cos temas de producción vexetal e sanidade vexetal, tanto na xestión administrativa como na execución dos programas de campo.
4. Desenvolvemento.
4.1. Número de edicións: 1.
4.2. Duración de cada curso: 20 horas.
4.3. Datas: novembro-decembro de 2000; a data de comezo e o lugar de realización, notificaráselles persoalmente ós seleccionados.
4.4. Horario: das 9 ás 21 horas, horario de mañá e tarde segundo o día.
4.5. Número de prazas: 20.
5. Contido.
O sistema de producción integrada: a normativa reguladora a nivel comunitario, estatal e autonómico. Regulamento de uso de marca de garantía. O sistema de certificación e control. Os regulamentos técnicos específicos.
