Visto o texto do convenio colectivo da empresa Teydesa Conectores, S.A. de Ourense (código do convenio 3200412), con entrada nesta delegación provincial o día 26-6-2000, subscrito pola parte económica pola empresa e, pola parte social polo delegado de persoal, todos con lexitimidade suficiente para asinalo o día 25-5-2000, e de conformidade co disposto no artigo 90.2º e 3º, do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, Real decreto 1040/1981 do 22 de maio, sobre rexistro e depósito de convenios colectivos de traballo, e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia en materia de traballo, esta delegación provincial
ACORDA:
Primeiro.-Ordena-la súa inscrición no libro de rexistro de convenios colectivos de traballo, existente nesta delegación provincial, e notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Unidade de Mediación, Arbitraxe e Conciliación desta delegación.
Terceiro.-Dispoñe-la súa publicación no Diario Oficial de Galicia.
Ourense, 3 de xullo de 2000.
José Lage Lage
Delegado provincial de Ourense
Acta única de constitución e sinatura
do convenio colectivo de Teydesa Conectores, S.A.
para o ano 2000
Ás 17 horas do día 25 de maio de 2000 e no domicilio social da empresa, reúnense por unha parte José María Sargatal Raskonit como representante legal da empresa, e, por outra banda, Avelino Banguenses Bande como delegado de persoal e Xan Losada González como asesor pola CIG.
Pola parte social preséntase a plataforma reivindicativa demandada pola asemblea de traballadores.
A continuación establécese un debate, facéndolle constar á empresa as dificultades que nestes momentos aínda arrastran de etapas anteriores; pola parte social insístese na necesidade de negociar un convenio que hai 4 anos que non se negocia.
Discútese punto por punto da plataforma da parte social chegando ós seguintes acordos:
Duración: desde o 1 de xaneiro ata o 31 de decembro de 2000.
Ámbito de aplicación: elimina-los puntos A e B.
Xornada: establécese unha xornada anual de 1.784 horas. Para axusta-lo calendario anual fíxanse como días libres de traballo os seguintes: 7 de xaneiro, 6 de marzo e 7 de decembro. Estes non computarán como días de vacacións; así mesmo, poderán ser cambiados por acordo entre empresa e traballador.
Incremento salarial: o incremento salarial para o ano 2000 será do 3,5% sobre os conceptos salariais reflectidos nas nóminas de 1999.
IT: no caso de se producir unha baixa por enfermidade común, de se-la primeira do ano, o traballador percibirá o 60% da base reguladora os tres primeiros días do ano.
Póliza de seguros: mantendo o texto actual fíxanse as cantidades seguintes: 4.500.000 ptas. por morte e 4.500.000 ptas. por invalidez.
Medidas de fomento do emprego e da contratación laboral: o contrato de duración determinada da modalidade de eventual por circunstancias da producción, acumulación de tarefas ou excesos de pedidos, regulado polo artigo 15.1.b) do Estatuto dos traballadores, segundo a redacción establecida pola Lei 63/1997, poderá ter unha duración máxima de 13 meses e medio dentro dun período máximo de 18 meses. Esta duración máxima será aplicable tanto ós novos contratos desta modalidade, asinados a partir da entrada en vigor deste convenio, como ás
prórrogas dos contratos de traballo vixentes antes da súa entrada en vigor.
E ás 20 horas dáse por rematada a reunión.
Convenio colectivo para a empresa
Teydesa Conectores, S.A. para o ano 2000
Capítulo I
Artigo 1º.-Ámbito de aplicación.
De acordo co establecido no título III do Real decreto lexislativo 1/1995, do 24 de marzo, que aproba o texto refundido da Lei do Estatuto dos traballadores, este convenio afectará á totalidade dos empregados e asalariados da empresa.
Sen prexuízo do anteriormente exposto, e tendo en conta as especiais circunstancias e características do persoal que a continuación se enumeran, quedará fóra do ámbito de aplicación deste convenio:
O persoal que realiza traballos de alta dirección ou alta xestión na empresa.
Artigo 2º.-Vixencia, duración e prórroga.
Este convenio aplicarase unha vez que sexa homologado pola autoridade laboral; agora ben, os seus efectos económicos retrotraeranse ó día 1 de xaneiro de 2000, independentemente da data da súa publicación no BOP. A súa duración será desde o día 1 de xaneiro de 2000 ata o 31 de decembro de 2000.
Non obstante, entenderase automaticamente prorrogado de ano en ano, ata que unha das partes o denuncie expresamente, de conformidade coa lexislación vixente, e cunha antelación mínima de dous meses ó termo da vixencia deste convenio ou da prórroga en curso.
Na denucia deberase facer constar:
Ámbito de aplicación do novo texto do convenio.
Materias de negociación debidamente analizadas.
Representación que exerce o denunciante.
Igualmente, sinálase que durante o tempo que medie entre a data do remate dos efectos do convenio e a entrada en vigor dun novo convenio que o substitúa, se entende prorrogado para tódolos efectos este.
Artigo 3º.-Compensación e absorción.
As melloras resultantes de aplicación deste convenio poderán ser absorbidas ou compensadas ata onde alcance o cómputo anual con aqueloutras condicións de índole superior que estean establecidas pola empresa, agás pacto expreso en contrario. Todo isto de conformidade co preceptuado no decreto de ordenación do salario e disposicións concorrentes.
Artigo 4º.-Xornada de traballo.
A xornada de traballo será de 40 horas semanais, de luns a venres, e en ningún caso a devandita xornada poderá superar un cómputo anual de 1.784 horas.
Dentro do cómputo de traballo efectivo entenderanse por comprendidos os tempos horarios empregados nas xornadas continuadas como descanso e outras interrupcións, cando por normativa legal o acordo entre as dúas partes ou pola propia organización do traballo se entendan integradas na xornada diaria de traballo. A este respecto establécese un período mínimo de descanso de 15 minutos.
O horario establécese de luns a venres, agás o personal a quendas, que teña necesidade de compensación de horas, que se é o caso, poderá traballa-lo sábado ata compesa-la xornada.
Artigo 5º.-Vacacións.
O período de vacacións será de 30 días naturais, sendo o salario que percibirán durante estas igual ó dunha nómina normal de mes.
O período de disfrute das vacacións será preferentemente nos meses de verán, debendo coñece-lo traballador, cunha antelación mínima de dous meses, a data de inicio de desfrute. Fixaranse de común acordo entre a empresa e o traballador, e salvo acordo entre as dúas partes, serán rotativas, e sempre que non afecten ós programas de produción da empresa.
Artigo 6º.-Salario e outros conceptos retributivos.
Os salarios base establecidos para cada categoría profesional son os que se fixan no anexo que se achega, primeira columna.
A gratificación de carencia de incentivos aboarase pola segunda columna do anexo salarial e por día efectivo de traballo, entendendo o sábado como día efectivamente traballado.
Artigo 7º.-Permisos retribuídos e non retribuídos.
Establécese un permiso retribuído nos casos que se indican ou polo período que a continuación se reseña:
-Por matrimonio do traballador: 15 días naturais.
-Por matrimonio de fillos: dous días naturais.
-Por nacemento de fillos: segundo a lexislación vixente.
-Por morte ou efermidade grave do cónxuxe, pais, irmáns, pais políticos, avós, netos e fillos: o tempo necesario, como mínimo dous días hábiles.
-Pola morte de irmáns políticos, avós políticos e tíos: 2 días naturais.
-Pola morte de tíos políticos: un día natural.
-Por consulta médica: o tempo necesario con xustificación.
A asistencia a exames, entregando xustificación, será sen dereito a retribución, e concedida polo tempo necesario para a súa realización.
Artigo 8º.-Desprazamentos e axudas de custo.
Se por razóns técnicas e organizativas a empresa ten que traslada-los seus productores a prestar servicios a outros centros de traballo, aboaralles por
axuda de custo completa a cantidade de 3.605 pesetas e, por media axuda de custo, 1.805 pesetas.
Artigo 9º.-Traballos especiais.
Aplicarase o preceptuado no artigo 77 da ordenanza laboral para a industria siderometalúrxica, sendo as porcentaxes do 25, 30, e 35%, en lugar das sinaladas na mencionada norma.
Artigo 10º.-Comité de seguridade e hixiene.
A empresa está obrigada ó cumprimento inescusable das normas de seguridade e hixiene no traballo, en materia de aseos, vestiario, dotacións sanitarias de urxencia, duchas, etc., de conformidade coa ordenanza de seguridade e hixiene vixente. Para tal efecto, designaranse dous membros como vixilantes de seguridade e hixiene, que serán elixidos polos traballadores fixos do cadro de persoal.
As funcións do comité de seguridade e hixiene serán asegura-los dereitos dos traballadores en canto ás cuestións relacionadas coa seguridade e hixiene no traballo fixadas pola lei ou convenio entre ámbalas partes. Os membros do comité non terán dereito a horas retribuídas.
Artigo 11º.-Período de proba.
O período de proba será de 15 días para os seguintes traballadores: peón, especialista, oficial de 3ª, ofial de 2ª e oficial de 1ª. Para as demais categorías aplicarase o establecido no Estatuto dos traballadores.
Artigo 12º.-Roupa de traballo.
Ó persoal afectado por este convenio entregaralle a empresa unha peza de roupa de traballo ou funda cada seis meses, sendo obrigatorio o seu uso cando o traballo o requira. As devanditas pezas de roupa serán en todo momento propiedade da empresa, e o traballador está obrigado á boa conservación e uso, podendo a empresa facer constar nas devanditas pezas o anagrama ou actividade dela.
Así mesmo, segundo o posto de traballo, a empresa daralle os elementos e medios necesarios esixidos legalmente para protección, debendo utilizalos o traballador na realización das súas tarefas.
Artigo 13º.-Gratificacións extraordinarias.
O persoal afecto a este convenio percibirá dúas pagas extraordinarias que se farán efectivas o 15 de xullo e 22 de decembro.
A súa contía será dunha mensualidade de salario real.
Artigo 14º.-Antigüidade.
Este complemento salarial de carácter persoal consistirá en quinquenios, da contía do 6% do salario base.
Artigo 15º.-Gratificacións de toxicidade e penosidade, penosidade e nocturnidade.
Aboaranse de acordo co disposto na ordenanza laboral siderometalúrxica e disposicións concordantes.
Artigo 16º.-Incapacidade laboral transitoria.
O persoal que se atope en situación de IT derivada de efermidade común, a partir do primeiro día do segundo mes percibirá o 100% do seu salario; no caso de hospitalización, desde o primeiro día percibirá o 100%; no caso de se-la primeira baixa do ano por efermidade común, o traballador percibirá o 60% os tres primeiros días da baixa.
Cando esta situación se derive de accidente de traballo ou accidente in itínere, desde o primeiro día aboaráselle o 100% do salario.
Artigo 17º.-Horas extraordinarias.
Axustaranse ó disposto no artigo 35 do Estatuto dos traballadores.
Artigo 18º.-Póliza de seguros.
A empresa concertará unha póliza de seguros que cubra as seguintes idemnizacións:
-Accidente laboral ou común do que se derive a morte do traballador: 4.500.000 pesetas.
-Ídem ó anterior, do que se derive a situación de incapacidade permanente, total ou absoluta ou grande invalidez: 4.500.000 pesetas.
-Ó persoal de nova de nova incorporación non lle será de aplicación a póliza antes sinalada ata transcorridos trinta días desde a contratación.
Artigo 19º.-Premios de xubilación.
-Xubilación ós 60 anos: 6 mensualidades.
-Xubilación ós 61 anos: 5 mensualidades.
-Xubilación ós 62 anos: 4 mensualidades.
-Xubilación ós 63 anos: 3 mensualidades.
Ós devanditos premios só terán dereito aqueles traballadores que teñan na data do feito máis de dez anos de antigüidade na empresa.
Artigo 20º.-Gratificación de carencia de incentivos.
Establécese o aboamento desta gratificación como prima de productividade e asistencia, ó non te-la empresa regulamentada a retribución en función de rendemento. O dereito á percepción desta gratificación perderase total ou parcialmente polas seguintes causas:
a) O 25% da gratificación de carencia de incentivos correspondente ó salario do día por falta de puntualidade de ata 5 minutos. A reincidencia deste tipo de falta gravarase co 50%.
b) O 75% da gratificación de carencia de incentivos correspondente ó salario do día por falta de puntualidade superior a 5 minutos e ata media hora.
c) O 100% por máis de media hora sen chegar a un día completo.
d) O correspondente a 2 días por cada falta de asistencia.
e) O abandono do traballo antes da hora sinalada, a non incorporación á hora xusta de comezalo e as interrupcións inxustificadas consideraranse como faltas de puntualidade para estes efectos.
Artigo 21º.-Productividade.
O sistema de traballo que se vaia empregar será de libre iniciativa da empresa, debendo axustarse ó previsto neste convenio e alexislación concordante, sen prexuízo da posterior aprobación da autoridade laboral competente.
A actividade normal de traballo é a desenvolvida polo operario medio que actúa baixo unha dirección competente, pero sen estímulo dun sistema de renumeración por rendemento e sen coación ningunha, isto é, a cantidade de traballo desenvolvida efectivamente por un obreiro capacitado realizando unha actividade mínima normal equivalente a 4,800 km/hora e que se determinará por unha correcta cronometraxe.
A actividade normal vén determinada por 100 unidades centesimais ou 60 puntos Bedaux ou o seu equivalente noutros sistemas de medición que sexan aceptados internacionalmente.
A actividade óptima é a que pode desenvolver un traballador activo adestrado no traballo e que logre nel con seguridade un nivel de calidade e precisión fixados pola tarefa. Esta actividade está valorada en 140 unidades centesimais ou 80 Bedaux ou o seu equivalente. Será sancionable todo traballador que non alcance a actividade normal durante tres días consecutivos ou cinco alternos no período de 30 días. En cada caso a empresa, para os efectos de sanción, apreciará a gravidade da falta á vista dos feitos producidos. Así mesmo, será obxeto de sanción o productor que de maneira reiterada manteña unha actividade inferior á normal.
Establécese especificamente que a facultade de organización práctica do traballo lle corresponde á dirección da empresa; trala ausencia sinálanse, entre outras, as seguintes funcións:
a) Esixencia da actividade normal fixada polo convenio.
b) Adxudicación do número de máquinas ó traballador a rendemento normal.
c) Mobilidade e cambio de persoal nas empresas de acordo coas necesidades de organización da producción na forma sinalada regulamentariamente.
De establece-la empresa un sistema de traballo incentivado, á actividade normal comprenderá a gratificación de carencia de incentivos fixada no anexo. Unha vez aprobado o sistema de traballo incentivado, non poderán aplicarse penalizacións ata trascorridos tres meses desde a data de implantación do sistema, considerándose o devandito espacio de tempo como período de proba.
En ningún caso poderá penalizarse a falta de productividade e a falta de puntualidade e asistencia á vez.
Artigo 22º.-Medidas de fomento do emprego e da contratación laboral.
O contrato de duración determinada da modalidade de eventual por circustancias da producción, acumulación de tarefas ou excesos de pedidos, regulado polo artigo 15.1.b) do Estatuto dos traballadores, segundo a redacción establecida pola Lei 63/1997, poderá ter unha duración máxima de 13 meses e medio dentro dun período máximo de 18 meses.
Esta duración máxima será aplicable tanto ós novos contratos desta modalidade asinados a partir da entrada en vigor deste convenio como ás prórrogas dos contratos de traballo vixentes antes da súa entrada en vigor.
Artigo 23º.-Gratificación de xefe de equipo.
De acordo co establecido no artigo 79 da ordenanza laboral de siderometalúrxica, o xefe de equipo percibirá unha gratificación consistente nun 20% sobre o salario base da súa categoría.
Artigo 24º.-Excedencias.
Poderán solicitala tódolos traballadores que leven un mínimo dun ano ó servicio da empresa. A duración da excencia poderá ser dun ano a cinco anos. A petición de excedencia farase por escrito cun mes de antelación e será resolta pola empresa afirmativamente cando non se cubrise con contrato de interino; nos demais casos observarase o disposto no Estatuto dos traballadores.
Artigo 25º.-Traballo da muller.
Se a realización das tarefas consideradas tóxicas, penosas, molestas ou insalubres afectase á situación de embarazo ou maternidade, terán que ser excluídas para a muller.
Artigo 26º.-Servicio militar.
Durante o tempo que se preste servicio militar ou social voluntario e obrigatorio, o traballador terá dereito á reserva do posto de traballo, que se entenderá 20 días despois de licenciado, e á percepción das pagas extras, na mesma contía que se estivese traballando.
Artigo 27º.-Reserva do posto de traballo no caso de invalidez provisional.
Os traballadores que cesasen na empresa por causas de invalidez provisional teñen dereito a ser declarados aptos para o traballo e ser reintegrados no posto de traballo que con carácter normal ocupaban na empresa na data na que causaron baixa ou no posto adecuado ás súas condicións. Será preciso que o traballador o solicite da empresa dentro do mes seguinte á data da súa declaración de aptitude.
Artigo 28º.-Revisión médica do persoal.
A empresa efectuará unha revisión médica anual a tódolos traballadores do cadro de persoal. Estas revisións serán por conta da mutualidade correspondente ou da propia Seguridade Social.
Disposicións transitorias
Primeira.-O aumento deste convenio cifrarase nun 12,10% sobre os conceptos retributivos da táboa salarial (salario base e gratificación de carencia de incentivos) tomada como base para esta negociación.
A devandita táboa corresponde ó convenio asinado en 1996 e prorrogado nos anos sucesivos pola situación económica da empresa.
Segunda.-Os efectos económicos deste convenio retrotraeranse ó 1 de xaneiro de 2000, e aboaranse na nómina do mes seguinte á súa publicación no BOP.
Terceira.-En todo o non previsto no texto deste convenio será norma supletoria a ordenanza laboral das industrias siderometalúrxicas e a lei pola que se aproba o Estatuto dos traballadores, e disposicións concordantes.
ANEXO
Táboa salarial
Grupos e categorías profesionais Salario base por carencia
de incentivos
Gratificación
* Persoal obreiro Peón 3.198 838 Lavador 3.198 838 Especialista 3.203 878 Oficial 3ª 3.211 910 Oficial 2ª 3.212 968 Oficial 1ª 3215 1.111 Oficial 1ª montador 3.215 1.188 Traballador menor de 18 anos 1.912 482
* Persoal subalterno Almaceneiro 3.198 838 Probador 3.217 968 Listeiro 3.211 910 Recepcionista 3.198 838 Pesador de báscula 3.198 838 Vixilante 3.198 838 Ordenanza 3.198 838 Porteiro 3.198 838 Conserxe 3.198 838 Chofer turismo 3.212 968 Chofer camión 3.215 1.114 Dependente Aux. maior 25 anos 3.211 910 Dependente principal maior 25 anos 3.211 910 Telefonista 3.218 910
* Persoal técnico Mestre taller 4.014 1.200 Xefe taller 4.015 1.407 Contramestre 4.015 1.200 Encargado 4.015 1.200 Titulado medio 4.015 1.407 Titulado superior 4.201 1.481 Delineante proxectista 3.647 1.407 Delineante 1ª 3.639 1.106 Delineante 2ª 3.215 1.111 Calcador reproductor 3.211 910 Técnico de laboratorio 3.647 1.200 Analista 3.647 1.200
* Persoal administrativo Auxiliar administrativo 3.211 910 Oficial administrativo 1ª 3.215 1.111 Oficial administrativo 2ª 3.212 968 Xefe administrativo 1ª 3.215 1.188 Xefe administrativo 2ª 3.215 1.115 Caixeiro 3.212 968 Xefe de almacén 3.215 1.114 Xefe de contabilidade 3.215 1.188 Viaxante e vendedor 3.211 910 Xefe de laboratorio 4.015 1.407 ATS 4.015 1.407
