Dentro do Plan de actividades da Escola Galega de Administración Pública para o 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase un Curso de verán sobre a nova Lei de estranxeiría, convocatoria que se desenvolverá conforme as seguintes bases:
Primeira.-Presentación e obxectivos.
O nomadismo e a transhumancia están na raíz da natureza humana, por ser esas mobilidades un instrumento para a satisfacción das súas necesidades. As migracións individuais, por grupos e incluso de pobos enteiros, foron fenómeno habitual na historia e sono hoxe nun mundo máis complexo, onde os desequilibrios económicos e sociais fan que se poida falar dun terceiro mundo que olla o primeiro (a sociedade opulenta) como a terra prometida e agarda encontrar nel remedio ás súas carencias e, incluso, á súa fame. Eses inmigrantes que nos chegan, fomos nós noutros días. Ese inmigrante que chega á nosa casa, puidémolo ser nós. Ante unha realidade ineludible, que pode ser dramática e ata tráxica, a nosa técnica debe consistir en arrefriarmos este tema quente e distanciármonos intelectualmente para estudialo. Trátase, pois, a través deste curso de analizarmos este fenómeno entre todos e desde tódalas súas perspectivas, especialmente na súa dimensión humana coas súas consecuencias sociolóxicas e
o seu réxime xurídico. Hai que facer un esforzo para a construcción do outro, do estraño ou estranxeiro co propósito de convertelo en próximo, en próximo. A recente Lei orgánica 4/2000, do 11 de xaneiro, vai servir de trama e urdimento para este propósito. Como orzamento ou premisa, para unha primeira
delimitación, hai que distingui-lo refuxiado ou asilado e o inmigrante, así como o estranxeiro e o cidadán da Unión Europea. A partir desta presentación, serán obxecto de análise a entrada no territorio nacional e o réxime de visados, os permisos de traballo e de residencia, o dereito do traballador ás prestacións sociais do inmigrante e dos seus familiares, sen esquece-lo ámbito penal e cunha exposición completa, pero á vez práctica dos procedementos administrativos e da tutela xudicial.
Segunda.-Contido.
Trataranse estes temas:
-O fenómeno da inmigración en España.
-Conservación e perda da nacionalidade española (no suposto de emigración). A estranxeiría privilexiada e o tránsito da condición de estranxeiro á de nacional (na perspectiva da inmigración).
-A adquisición da nacionalidade. Os problemas de dereito internacional privado. O estranxeiro e o cidadán da Unión Europea.
-Características xerais da Lei orgánica 4/2000, do 11 de xaneiro, sobre dereitos e liberdades dos estranxeiros en España e a súa integración social.
-Os procedementos administrativos. Entrada e saída do territorio nacional. O réxime de visados. Permisos de traballo e de residencia.
-O dereito ó traballo do estranxeiro. O traballador estranxeiro. Capacidade contractual e permisos de traballo. As condicións de traballo dos estranxeiros. A Seguridade Social e as demás prestacións sociais (ensino) do estranxeiro e das súas familias.
-Infraccións administrativas e sancións en materia de estranxeiría. A regularización da situación. A expulsión.
-O marco penal da inmigración. O tráfico ilegal de traballadores. Os delictos cometidos neste ámbito. A protección penal do estranxeiro. O estranxeiro no proceso penal.
-O estranxeiro e a tutela xudicial efectiva. O control xudicial da actividade administrativa nesta materia. As medidas cautelares.
-A emigración como fenómeno humano, sociolóxico e xurídico. A construcción constitucional do outro. Xenofobia e discriminación. O estranxeiro.
Terceira.-Destinatarios.
Persoal ó servicio da Xunta de Galicia e da Administración local galega e interesados en xeral.
Cuarta.-Desenvolvemento.
-Horario: mañá e tarde.
-Lugar e datas: o curso convocado desenvolverase no salón Truel do Hotel Marina Sada (Sada, A Coruña), os días 27 e 28 de xullo de 2000.
Quinta.-Inscrición.
-Prazo: remata o luns, día 24 de xullo de 2000.
-Tramitación de solicitudes: as solicitudes irán dirixidas ó director da Escola Galega de Adminis
tración Pública, Polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 26 de xullo, de 10 h a 14.45 h, ós seguintes números: 981 54 62 39/44 ou 981 54 60 40.
Sexta.-Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento do curso, así como a de cancelalo, se o escaso número de solicitudes non xustificase a súa realización.
Sétima.-Certificación de asistencia.
Entregaráselles, ó remate deste curso, a aquelas persoas inscritas que concorresen asiduamente a el, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 29 de xuño de 2000.
Domingo Bello Janeiro
Director da Escola Galega de Administración Pública