Perante este Xurado Provincial de Montes Veciñais en Man Común, tramítanse os expedientes de clasificación dos montes coas características que a seguir se indican:
Expediente número: 2/2000.
Denominación: monte de Santa Xusta.
Comunidade propietaria: veciños do lugar de Santa Xusta.
Parroquia: O Mosteiro.
Concello: Cervantes.
Superficie: 38 hectáreas.
Estremas:
Norte: monte de San Martiño das Cañadas. Leste: predios particulares de Santa Xusta. Sur: monte de Fabal. Oeste: monte de Santo André das Nogais.
Descrición do perímetro:
Comezando no extremo noroeste en Fentosa, no límite co concello das Nogais, no cume da serra da Escrita, baixa facendo límite co monte de San Martiño das Cañadas na dirección oeste-leste polo teso de Rebordelo, baixando ata os predios particulares moi preto das casas de Santa Xusta. Polo leste segue o cerramento dos predios particulares ata chegar ó camiño do Fabal a Lagúa e Fonte do Cando do concello das Nogais, subindo polo teso chamado Rebordelos facendo límite co monte de Fabal, ata subir á divisoria de augas da serra da Escrita que segue na dirección sur-norte facendo límite co monte de Santo André das Nogais, ata chegar a Fentosa, onde se empezou.
Expediente número: 3/2000.
Denominación: monte de Fabal.
Comunidade propietaria: veciños do lugar do Fabal.
Parroquia: Vilasante.
Concello: Cervantes.
Superficie: 45 ha.
Estremas:
Norte: monte e termo de Santa Xusta e de Vilaxán. Leste: monte de Pandelo. Sur: termo e monte de Vilasante. Oeste: monte da Lagúa, das Nogais.
Descrición do perímetro:
Comezando no noroeste no límite co monte da Lagúa do concello das Nogais, baixa desde serra da Escrita de oeste-leste facendo límite con Santa Xusta por Rebordelos, atravesa o río e lindando con Vilaxán sobe a Pena Tallada. De aquí na dirección norte-sur vai lindando con Pandelo baixando polo teso de Pena Tallada ó río, que segue augas abaixo nun treito, lindando con termos de Vilasante, para seguir despois con este na dirección leste-oeste subindo por todo o regueiro de Navallos ata subir ó alto da serra da Escrita, por onde linda segundo a divisoria de augas co monte da Lagúa das Nogais, como se dixo ó comezo.
Dentro do perímetro así descrito queda comprendido todo o termo veciñal de Fabal, con predios particulares e o mesmo núcleo urbano.
Expediente número: 4/2000.
Denominación: monte de Busnullán e de Temple.
Comunidade propietaria: veciños dos lugares de Busnullán e de Temple.
Parroquia: Padornelo.
Concello: Pedrafita do Cebreiro.
Superficie: 64 ha.
Estremas:
Norte: termo e monte de Vilaverde. Leste: termo e monte de Modreiro. Sur: termos e montes de Teixoeiras, e Vilarín do Monte e de Sabugos. Oeste: montes de Sabugos e de Vilanova.
Descrición do perímetro:
Todo o termo veciñal, comprendendo as tres parcelas de monte, os predios particulares e as mesmas localidades pode describirse no seu perímetro comezando polo extremo norte no Marco de Modreiro onde concorren con este monte os de Vilaverde, de Foxos e de Modreiro. Con este último baixa na dirección norte-sur a Chao de Modreiro, xa no límite cos predios particulares e atravesa estes na mesma dirección ata Ponte das Valiñas xa no río Navia. Polo sur divide co termo de Teixoeiras e Vilarín do Monte subindo primeiro polo río Navia e despois polo regueiro de chás ata Pena da Rasa, onde comeza a limitar co monte de Sabugos; con éste último parte na dirección noreste baixando ó regato de Grovia e despois subindo na mesma dirección a un teso polo que baixa na dirección noreste, dividindo co monte de Vilanova ata os prados do río Navia e despois atravesa os predios particulares na dirección noreste, dividindo co termo de Vilaverde co que sobe ata Marco de Modreiro, onde se empezou.
Expediente número: 5/2000.
Denominación: monte de Mata.
Comunidade propietaria: veciños do lugar de Mata.
Parroquia: Padornelo.
Concello: Pedrafita do Cebreiro.
Superficie: 11 ha.
Estremas:
As de todo o termo veciñal son:
Norte: termo e monte de Foxos. Leste: termos de Foxos e de Fonteferreira. Sur: termos de Fonteferreira e de Modreiro. Oeste: montes de Modreiro e de Foxos.
Descrición do perímetro:
O perímetro de todo o termo veciñal, comprendendo este monte, os predios particulares e a localidade, pode describirse comezando polo extremo oeste nos Fedos, onde concorren con este monte os de Modreiro e Foxos; con este último e o seu termo divide por todo o regato de Boicela baixando ata o río Navia; por este río augas arriba divide co termo de Fonteferreira ata Pena de Loriga; aquí empeza a dividir co termo de Modreiro, co que sobe na dirección noroeste por unha lomba ata Os Fedos, onde se empezou.
Expediente número: 6/2000.
Denominación: monte de Pallarvello e de Porfía.
Comunidade propietaria: veciños dos lugares de Pallarvello e Porfía.
Parroquia: Padornelo.
Concello: Pedrafita do Cebreiro.
Superficie: 168 hectáreas.
Estremas:
Norte: monte de Porfía e monte Carballal de Padornelo e Sabugos. Leste: monte Negredo de veciños de Pallarvello, Porfía, Padornelo e Sabugos, e monte de Pacios. Sur: monte de Seixo. Oeste: monte de Louzarela e termo de Porfía.
Descrición do perímetro:
O perímetro deste monte, comprendendo tamén todo o termo veciñal de Pallarvello, cos predios particulares e o mesmo pobo, pode describirse comezando polo extremo norte, en Poio, na estrada de Sarria a Pedrafita, onde concorren con este monte os de Porfía, de Padornelo, e de Carballal de Padornelo e Sabugos. Con este último limita na dirección suleste pola divisoria de augas ata Fontaos, onde xa comeza a limitar co monte Negredo, co que segue cara ó sur polo camiño que vai polo alto cara Seixo ata chegar ó límite co monte de Pacios, co que segue cara ó suroeste ata Pozo da Legua. Aquí comeza a limitar co monte de Seixo, co que segue na dirección noroeste por toda a lomba de Escandada ata chegar a Penelo da Roxa, xa no límite co monte de Louzarela; con este baixa na dirección noroeste ata Torno, xa no límite cos prados do termo de Porfía; con este divide na dirección noreste, por entre predios particulares baixando ó regato do Curro, atravesando este por Veiga e subindo por un vagante
a Poio, onde se empezou.
Expediente número: 7/2000.
Denominación: monte de Sabugos.
Comunidade propietaria: veciños do lugar de Sabugos.
Parroquia: Padornelo.
Concello: Pedrafita do Cebreiro.
Superficie: 79 hectáreas.
Estremas:
Norte: monte de Vilanova, e monte e termo de Busnullán e Temple. Leste: monte de Teixoeiras e Vilarín do Monte e termo de Hospital. Sur: termo de Padornelo e monte Rañadoiro de Padornelo. Oeste: monte e termo de Lago.
Descrición do perímetro:
O perímetro de todo o termo veciñal de Sabugos, comprendendo estas dúas parcelas de monte, os predios particulares e a mesma localidade, pode describirse comezando polo extremo noroeste no Fondo dos Tallos, onde concorren con este monte os termos de Lago e de Vilanova; con este último parte na dirección sueste, subindo ó alto da lomba, onde
empeza a dividir co monte de Busnullán e Temple, co que baixa ata os prados do regato Grovia, atravesa este e na mesma dirección sueste sobe a Pena da Rasa; aquí empeza a limitar co monte de Teixoeiras e Vilarín do Monte, co que segue na dirección norte-sur primeiro polo cumio da lomba e despois baixando a Chao da Folgueirosa e a Forno da Cal. Polo regato do mesmo nome augas arriba divide co termo de Hospital por entre predios particulares. Tamén por entre estes divide de leste a oeste co termo de Padornelo ata chegar ó camiño de Padornelo a Lago, de onde sobe a Val de Cabalos, onde comeza a dividir co monte e termo de Lago, co que baixa na dirección noreste pola valgada de Val de Cabalos ata Fondo dos Tallos, onde se empezou.
Expediente número: 8/2000.
Denominación: monte de Veiga de Forcas.
Comunidade propietaria: veciños do lugar de Veiga de Forcas.
Parroquia: Veiga de Forcas.
Concello: Pedrafita do Cebreiro.
Superficie: 158 hectáreas.
Estremas:
Norte: monte de Hospital, de Brimbeira e de Liñares e Coterces. Leste: monte de Celeiro. Sur: montes de Fonlor e Fonteboa, de Rabaceira e de Santalla. Oeste: monte de Pacios.
Descrición do perímetro:
O perímetro de todo o termo veciñal, comprendendo as tres parcelas de monte, os predios particulares e o mesmo pobo, pode describirse comezando polo extremo norte en Campo de San Roque, na estrada de Sarria a Pedrafita, onde concorren con este monte os de Hospital, de Brimbeira e de Coterces e Liñares. Divide con este último na dirección sueste por unha divisoria de augas por Pena do Ladrón, Pozo de Area, Retorno ata Merdido, onde empeza a limitar co monte de Celeiro, co que segue de norte a sur baixando por unha lomba por Poza do Carvei ou Pena Grande, chegando ata Eira de San Capelo; aquí comeza a limitar polo sur co monte de Fonlor e Fonteboa en liña recta cara ó suroeste chegando a Chan Dombea; aquí concorren con este monte, ademais do citado de Fonlor e Fonteboa, o de Rabaceira e o de Santalla; con este último segue cara ó noroeste nun pequeno treito baixando ó regato de Forcas e subindo a Cabeza de Candedo, onde xa empeza monte de Pacios; con este divide na dirección noroeste
baixando a media faldra a atravesa-los prados do regato de Veiga de Forcas e sobe a Chao de Fonrubí, para seguir na dirección sur-norte baixando uns prados e subindo por unha valgada ata Fonte da Roxa; aquí empeza a limitar co monte de Hospital e con este segue cara ó nordés por unha valgada de prados que quedan dentro do termo ata chegar a Campo de San Roque, onde se empezou.
En virtude do acordado polo xurado na sesión celebrada coa data do 14 de decembro de 1999 e, en cumprimento da orde do instructor, conforme o disposto na Lei de montes veciñais en man común do 10 de outubro de 1989 e demais disposicións de
aplicación, polo presente edicto faise pública a iniciación dos expedientes indicados co obxecto de que, de acordo co previsto no artigo 23 do regulamento aprobado polo Decreto 260/1992, do 4 de setembro, para a execución da citada lei, cantas persoas, organismos e corporacións resulten interesadas, poidan comparecer e intervir nos expedientes iniciados e formularen ante o xurado, no prazo dun mes contado a partir do día seguinte ó da publicación do presente edicto no Diario Oficial de Galicia, cantas alegacións coiden oportunas na defensa dos dereitos que crean asistirlles en relación cos montes, aportando, se é o caso, a documentación que consideren conveniente ó respecto.
Lugo, 19 de maio de 2000.
Luis González Vázquez
Presidente do Xurado Provincial de Montes
Veciñais en Man Común de Lugo
