O Decreto 261/1994, do 29 de xullo, establece a estructura orgánica dos centros directivos dependentes da Presidencia da Xunta.
No seu artigo 7, segundo a redacción dada polo Decreto 71/1995, do 10 de marzo, establece as funcións da Secretaría Xeral para o Deporte, estructurándose para o cumprimento dos seus fins en dúas subdireccións xerais: de Deportes e de Infraestructura Deportiva. No parágrafo final do punto 2.2 prevé que o xerente do INEF, dependendo da Secretaría Xeral para o Deporte encargarase da xestión e administración do devandito organismo.
A importancia cada vez maior dos centros de especialización deportiva na implantación de programas e plans de tecnificación aconsellan, para un maior rendemento e coordenación, reestructura-la asignación de funcións unificando na Subdirección Xeral de Deportes as funcións de planificación da actuación deportiva e a dependencia directa dos centros especializados -INEF e Centro Galego de Tecnificación Deportiva-.
Por outra banda, o número das actuais instalacións propias, que proximamente se verá incrementada con outras novas que se porán en funcionamento, fai preciso reforza-las áreas de control e xerencia para asegurar un bo funcionamento e rendemento deportivo. Para isto o xerente do INEF de Galicia é o posto de traballo que, en consideración á similar natureza das funcións e á necesaria optimización dos recursos humanos, ten a idoneidade precisa para unificar esas funcións, asignándolle o nivel de servicio en razón do contido directivo que posúen os cometidos atribuídos.
Por último, para unha mellor clarificación do seu funcionamento explicítase o contido da xestión das instalacións propias atribuída á Subdirección Xeral de Infraestructura Deportiva.
Na súa virtude, por proposta do conselleiro da Presidencia e Administración Pública, logo do informe da Consellería de Economía e Facenda e logo de deliberación do Consello da Xunta de Galicia na súa reunión do día dezanove de maio de dous mil,
DISPOÑO:
Artigo único.-O artigo 7 do Decreto 261/1994, do 29 de xullo, modificado polo Decreto 71/1995, do 10 de marzo, queda redactado como segue:
Un.-A Secretaría Xeral para o Deporte desenvolverá, entre outras, as seguintes funcións:
a) A colaboración coas administracións locais na promoción e difusión da cultura física e do deporte.
b) O apoio e promoción das asociacións deportivas, sempre que o seu ámbito de actuación non exceda do propio da Comunidade Autónoma.
c) A elaboración e execución dos plans de construcción de instalacións deportivas propias.
d) A promoción das actividades físico-deportivas.
e) A xestión das instalacións deportivas propias, así como a do INEF de Galicia.
f) A organización de congresos, coloquios e cursos, así como a convocatoria de bolsas e axudas en materia deportiva.
g) A preparación de convenios en materia propia da secretaría xeral e en xeral a realización de todas aquelas accións encamiñadas á mellora da actividade físico-deportiva e da infraestructura deportiva galega.
Dous.-Para o cumprimento dos seus fins a Secretaría Xeral para o Deporte estructúrase nas seguintes unidades administrativas.
1. Subdirección Xeral de Deportes.
1.1. Servicio de Coordinación Deportiva.
2. Subdirección Xeral de Infraestructura Deportiva.
2.1. Servicio de Contratación e Xestión Económica.
2.2. Servicio de Supervisión de Proxectos e Seguimento de Obras.
3. Xerencia do INEF de Galicia.
4. Subdirección Xeral de Deportes.
Exercerá as seguintes funcións:
a) A elaboración e execución de plans de tecnificación deportiva e realización de estudios sobre competicións de deportistas federados.
b) A xestión deportiva do Centro Galego de Tecnificación Deportiva e a súa coordinación coas federacións deportivas e outras entidades para a súa utilización.
c) A coordinación da actividade deportiva cos plans, programas e actuacións docentes do INEF de Galicia.
d) O rexistro de entidades deportivas.
e) Fomento e promoción do deporte, deporte extraescolar e de tempo libre.
1.1. Servicio de Coordinación Deportiva.
Dependente da Subdirección Xeral de Deportes, o Servicio de Coordinación Deportiva realizará os seguintes cometidos:
a) A dirección dos plans e programas das competicións deportivas.
b) A xestión administrativa da actividade de fomento e promoción deportiva.
c) A coordinación dos plans de formación realizados desde a Escola Galega do Deporte.
2. Subdirección Xeral de Infraestructura Deportiva.
Correspóndelle a esta subdirección xeral:
a) Executa-los plans de construccións, equipamento e acondicionamento de instalacións deportivas.
b) A elaboración do anteproxecto do orzamento e a xestión económico-administrativa.
c) A xestión de persoal, asuntos de carácter xeral e de réxime interior
d) O equipamento, conservación e mantemento das instalacións deportivas propias, así como o seu réxime patrimonial, sen prexuízo das competencias que corresponden a outros órganos.
2.1. Servicio de Contratación e Xestión Económica.
Correspóndelle a este servicio a realización dos seguintes cometidos:
a) A xestión dos expedientes de contratación administrativa que sexan competencia da secretaría xeral, cando se trate de obras, servicios e subministracións, asistencias técnicas e outros análogos.
b) A xestión dos expedientes de outorgamento e seguimento de subvencións destinadas ó fomento de investimento, en materia de infraestructura e equipamento deportivos.
c) A confección dos anteproxectos de convenios de cooperación con outras administracións que demande a actividade de investimento ou fomento da Secretaría Xeral para o Deporte.
d) A execución, coordinación e control interno da xestión orzamentaria dos capítulos de gastos encomendados á subdirección xeral (VI e VII).
2.2. Servicio de Supervisión de Proxectos e Seguimento de Obras.
Correspóndelle a este servicio a realización dos seguintes cometidos:
As funcións das oficinas de supervisión de proxectos á que fan referencia os artigos 23 da Lei de contratos do Estado e 74 do seu regulamento, respecto das obras que realizará a secretaría xeral, así como o seu seguimento.
3. Xerencia do INEF de Galicia.
Dependendo directamente do secretario xeral para o Deporte, o xerente do INEF de Galicia, con nivel orgánico de servicio, encargarase da xestión e administración do devandito centro e das instalacións deportivas adscritas a este, así como daquelas outras propias que para o efecto se lle encomenden.
Disposicións derradeiras
Primeira.-Autorízase o conselleiro da Presidencia e Administración Pública para dicta-las disposicións necesarias para o desenvolvemento e execución deste decreto.
Segunda.-Este decreto non supón aumento de gasto.
Terceira.-Este decreto entrará en vigor o día seguinte ó da súa publicación no Diario Oficial de Galicia.
Santiago de Compostela, dezanove de maio de dous mil.
Manuel Fraga Iribarne
Presidente
Jaime Pita Varela
Conselleiro da Presidencia e Administración Pública