Cumprindo acordo da Comisión de Goberno do 31 de maio de 2000, convócase concurso para a subministración: fabricación, instalación, adaptación á caixa actual exterior e posta en funcionamento para o seu uso, do órgano da Igrexa de San Rosendo de Celanova, de acordo co prego de cláusulas administrativas que a seguir se transcriben en extracto.

As devanditas cláusulas completas, así como o prego de prescricións técnicas, están no concello á disposición dos interesados.

A. Obxecto da subministración: fabricación, instalación, adaptación á caixa actual exterior e posta en funcionamento para o seu uso, do órgano da Igrexa de San Rosendo de Celanova, de acordo coas características peculiares fixadas polo Concello de Celanova e recollidas no prego de prescricións técnicas que, xunto con este prego, rexen na contratación.

B. Orzamento de contrata: 51.446.000 ptas., IVE incluído.

O orzamento de contrata inclúe a construcción, fabricación do órgano, transporte, montaxe na caixa artística actual do coro da igrexa, harmonización, afinación e calquera outra cuestión para a súa definitiva posta a punto para o seu uso.

C. Revisión de prezos: dada a natureza do contrato, non terá lugar a revisión de prezos.

D. Réxime de financiamento:

Consta consignación adecuada e específica na partida 451 633 00 do orzamento de gastos de 2000; desagrégase o financiamento da seguinte forma:

-Concello de Celanova: 26.284.175 pesetas.

-Leader II: 25.161.825 ptas.

E. Garantías:

-Provisional: o 2% do orzamento inicial do proxecto.

-Definitiva: o 4% do importe de adxudicación.

F. Documentación técnica que debe achegar:

a) Documento escrito que nos seus diversos puntos reflicta:

-A antigüidade e tradición da firma organeira.

-Relación do persoal e a súa especialización.

-Recursos materiais cos que conta a firma organeira.

-O coñecemento por parte da firma organeira da escola nor-centroeuropea de construcción de órganos do período do barroco tardío de transición.

b) Documentación gráfica dos traballos realizados en órganos de nova construcción e grande envergadura, con especial incidencia nos últimos 15 anos. A devandita documentación deberá ir xunto con cantos textos se consideren precisos para a súa maior comprensión.

c) Documento que reflicta o prazo de execución proposto pola firma organeira, entendéndose que, se non se achega, se supón que o licitador acepta o de 11 meses contido neste prego.

G. Criterios de adxudicación: cun total de 110 puntos repartidos de acordo cos seguintes conceptos:

1. Experiencia e traballos realizados en órganos de nova construcción e grande envergadura do período do barroco tardío de transición, con especial incidencia nos últimos 15 anos: de 0 a 25 puntos.

2. Capacidade e recursos humanos e estructurais da firma organeira, coa finalidade de garanti-la realización, os prazos e a entrega do traballo: de 0 a 20 puntos.

3. Experiencia do constructor e calidade e seguridade das partes técnicas: de 0 a 18 puntos.

4. Calidade artística da harmonización do instrumento: de 0 a 15 puntos.

5. Garantía de longa duración e seguridade sobre a estabilidade do funcionamento: de 0 a 14 puntos.

6. Tradición, antigüidade e hábito da firma organeira: de 0 a 10 puntos.

7. Mellor oferta económica: de 0 a 8 puntos.

A adxudicación efectuarase ó concursante que teña a maior puntuación trala suma de todos e cada un dos epígrafes anteriores.

H. Prazo de entrega: será de 11 meses, contados desde o día seguinte ó da sinatura do contrato. O devandito prazo inclúe:

-A construcción do órgano.

-O transporte e a montaxe na caixa actual do coro da Igrexa de San Rosendo.

-Harmonización.

-Afinación.

-Calquera outra cuestión precisa para a súa definitiva posta en funcionamento.

Lugar de entrega do ben contratado: de conformidade co establecido no punto 3 do prego de prescricións técnicas, o órgano fabricado deberá ser montado na caixa artística actual do coro alto, situado sobre a entrada principal na nave central da Igrexa de San Rosendo de Celanova.

I. Período de garantía: será dun ano, contado desde a recepción do órgano polo Concello de Celanova. A devandita garantía inclúe a revisión completa e posta en funcionamento de todas e cada unha das partes do órgano.

J. Tramitación: urxente.

K. Presentación de proposicións: deberán ser entregadas en sobre pechado no rexistro xeral do concello, ou enviadas por correo, dentro do prazo de 13 días naturais contados a partir do primeiro día seguinte ó da última publicación do anuncio de licitación no BOP de Ourense ou no Diario Oficial de Galicia.

Celanova, 1 de xuño de 2000.

O alcalde

Rubricado