O Consello da Xerencia Municipal de Urbanismo, en sesión do 18 de maio de 2000, adoptou o seguinte acordo:

Aprobar definitivamente o proxecto de urbanización da U.E.IV-04 Ramón Nieto, 1 (expediente 4161/401), presentado pola entidade Edificaciones y Desarrollos Galaicos, S.A. redactado polo arquitecto Ricardo Salgado Salgado con datas de visado do COAG do 11 de xuño, 17 de setembro e 15 de novembro de 1999, e cun orzamento de execución material de 19.819.093 pesetas. Isto coas precisións feitas no informe técnico do 26 de outubro de 1999, e sinaladamente as que seguen:

-A canalización de gas discorrerá preferentemente pola beirarrúa, debendo sinalarse claramente en superficie a traza mediante placas indicativas, as cales deberán indica-la traza de rede e os cambios de dirección. A interdistancia entre placas non deberá superar en ningún caso os 25 metros. Manter en perfecto estado o dito sistema de sinalización formará parte do programa de mantemento, vixilancia, inspección e control.

-Os edificios deberán dispoñer dun local para a instalación dos contadores de gas. Así mesmo, deberán incorpora-las conduccións necesarias desde a acometida á rede xeral, ata o cadro de contadores. Tanto as dimensións do local de contadores como a seccción das conduccións de gas deberán estar suficientemente xustificadas.

-Deberán comunicarlle ó servicio municipal de Diversificación e Aforro o inicio das obras de canalización da rede de gas, así como o inicio das obras de iluminación pública.

-A localización exacta dos dez puntos de luz será definida conxuntamente cos técnicos municipais no replanteo previo á execución da instalación.

-Sempre deberán existir arquetas nos cambios de dirección e cruzamentos de calzada.

-Os puntos de luz que sexan retirados por motivos das obras que se van realizar deberán ser substituídos por outros provisionais, salvo que os técnicos municipais non o consideren necesario.

A eficacia deste acordo de aprobación definitiva queda suxeita á condición suspensiva, consistente na prestación de aval polo 100% do orzamento de execución material (19.819.093 pesetas); este acordo de aprobación definitiva non producirá efectos mentres o aval non sexa constituído.

Contra o devandito acordo, que pon fin á vía administrativa, poderán interpoñerse os seguintes recursos:

a) Potestativo de reposición, ante o Consello da Xerencia Municipal de Urbanismo de Vigo, no prazo dun mes a partir do día seguinte ó da publicación deste anuncio.

b) Contencioso-administrativo ante o Tribunal Superior de Xustiza de Galicia, no prazo de dous meses contado desde o día seguinte ó da publicación deste anuncio.

c) Calquera outro recurso que se considere oportuno e sexa procedente interpoñer.

De conformidade co artigo 59 de Lei 30/1992, de 26 de novembro, LRXAP-PAC, por medio deste anuncio notifícaselle-lo acordo que nel se contén a tódolos propietarios afectados descoñecidos, de ignorado enderezo, respecto dos cales non se puido practica-la notificación intentada.

Vigo, 31 de maio de 2000.

Lois Pérez Castrillo

Alcalde-presidente da Xerencia Municipal

de Urbanismo