Examinado o expediente instruído por instancia do Concello da Coruña, con enderezo para efectos de notificacións na praza de María Pita nº 1, 15000 A Coruña, resultan os seguintes antecedentes de feito:
Primeiro.-Con data do 22 de abril de 1999, a citada corporación local solicitou a autorización administrativa, o recoñecemento da condición de instalación acollida ó réxime especial de producción de enerxía eléctrica creado polo R.D. 2818/1998, do 23 de decembro, sobre producción de enerxía eléctrica por instalacións abastecidas por recursos ou fontes de enerxía renovables, residuos e coxeración, actualmente vixente, e a aprobación do proxecto de execución da súa planta de coxeración.
Segundo.-As características básicas da dita planta serán as seguintes: un grupo motor-alternador, modelo GUASCOR FGL 360/55, alimentado con gas natural, con motor de 500 kW, acoplado a xerador de 600 kVA, a 480 V de tensión e transformador de 630 kVA e tensións de 0,4/15-20 kV.
Terceiro.-De conformidade co establecido no Decreto 2617/1966, do 20 de outubro, sobre autorización de instalacións eléctricas, de aplicación ó presente expediente en virtude do establecido na disposición transitoria primeira da Lei 54/1997, do 27 de novembro, do sector eléctrico, a Delegación Provincial da Consellería de Industria e Comercio da Coruña dictou Resolución do 1 de xuño de 1999 pola que se someteu a información pública a autorización administrativa da instalación de referencia, que se publicou no DOG do 6-10-1999 e no BOP da Coruña do 28-6-1999, sen que se presentase no período legalmente establecido para iso alegación ningunha.
Cuarto.-O proxecto está informado favorablemente pola Delegación Provincial da Consellería de Industria e Comercio da Coruña e cumpre coas esixencias regulamentarias fixadas no Decreto 2617/1966, do 20 de outubro, e coas demais que lle son de aplicación.
Fundamentos de dereito:
Primeiro.-A Dirección Xeral de Industria é competente para resolver este expediente con fundamento no Estatuto de autonomía de Galicia, o Real decreto 2563/1982, do 24 de xullo, o Decreto 132/1982, do 4 de novembro e o Decreto 99/1998, do 26 de marzo, modificado polo Decreto 181/1999, do 17 de xuño, polo que se establece a estructura orgánica da Consellería de Industria e Comercio, en relación co Decreto 2617/1966, do 20 de outubro, e o Real decreto 2818/1998, do 23 de decembro, xa citados.
Segundo.-No expediente instruído para o efecto cumpríronse os trámites regulamentarios.
Esta dirección xeral, de acordo con todo o que antecede e no exercicio das competencias que ten atribuídas,
RESOLVE:
Autoriza-la instalación da planta de coxeración do Club del Mar (San Amaro) ó Concello da Coruña.
Aproba-lo proxecto de execución da citada planta de coxeración.
-Recoñecerlle á planta de coxeración autorizada a condición de instalación acollida ó réxime especial do R.D. 2818/1998, e incluíla no grupo a.1 do artigo 2 do dito real decreto.
Calquera modificación das instalacións autorizadas requirirá unha nova solicitude de autorización administrativa, de acordo co indicado no artigo 17.4º do Real decreto 1775/1967, do 22 de xullo, que fixa o réxime de instalación, ampliación e traslado das industrias en xeral.
Así mesmo, a instalación interconectarase co sistema centralizado que para o réxime especial estableza, se é o caso, a Dirección Xeral de Industria.
Contra esta resolución, que non é definitiva en vía administrativa, poderase interpor recurso de alzada ante o conselleiro de Industria e Comercio da Xunta de Galicia, no prazo dun mes contado a partir do día seguinte ó da súa publicación.
Santiago de Compostela, 13 de xaneiro de 2000.
Ramón Ordás Badía
Director xeral de Industria