Dentro do Plan de actividades da Escola Galega de Administración Pública para o 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Consellería de Xustiza, Interior e Relacións Laborais e coa Área de Dereito Administrativo da Universidade de Santiago de Compostela, as I Xornadas sobre o pacto local; convocatoria que se desenvolverá conforme as seguintes bases:
1. Obxectivos.
Estas xornadas pretenden iniciar unha reflexión académica sobre os importantes problemas técnicos que presenta o desenvolvemento do chamado pacto local; reflexión que intenta servir de axuda a tódolos interesados en tan importante temática, singularmente ós responsables institucionais chamados a negociaren os distintos aspectos do citado pacto e ós membros das corporacións locais en xeral, ademais da innegable vocación formativa destas xornadas para os funcionarios autonómicos e locais.
2. Contido.
Trataranse estes temas:
-Cláusula xeral de competencia municipal e pacto local.
-Goberno local e pacto local.
-O problema da facenda urbana: especial consideración do caso galego.
-Relacións interadministrativas e pacto local.
-Organización e pacto local.
-A defensa da autonomía local ante o Tribunal Constitucional.
-Servicios públicos e pacto local.
-Libre competencia e pacto local.
-Espacio local e pacto local.
-Turismo cultural e pacto local.
3. Destinatarios.
Alcaldes e presidentes das entidades locais galegas e demais membros destas corporacións, así como o persoal ó servicio da Administración local e da Xunta de Galicia e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos da EGAP os días 24 e 25 de maio de 2000.
5. Inscrición.
-Prazo: remata o luns, día 22 de maio de 2000.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de
Madrid, 2-4 - 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscricións fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando, o día 23 de maio, por teléfono, de 10 a 14.45 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 2 de maio de 2000.
Domingo Bello Janeiro
Director da Escola Galega de Administración Pública