O Pleno do Concello da Coruña, en sesión do 18 de outubro de 1999, acordou segregar unha parcela de 5.102 m de extensión superficial, procedente da parcela número 32 do proxecto de compensación do polígono de Mato Grande e cedela ó Servicio Galego de Saúde, logo da depuración da situación física e xurídica do predio que se segregará para a construcción dun centro de saúde.
Conforme o artigo 17.1º da Lei 3/1985, do 12 de abril, do patrimonio da Comunidade Autónoma, requírese decreto do Consello da Xunta de Galicia para a adquisición de bens a título gratuíto. Por outra banda, o artigo 23.1º da mesma lei establece que non poderán adquirirse bens ou dereitos a título lucrativo cando o valor global dos gravames, cargas e afeccións impostas sobre os mesmos supera o seu valor intrínseco. Non se considerarán carga, gravame ou afección os investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente.
En cumprimento do disposto na Lei 3/1985, do 12 de abril, do patrimonio da Comunidade Autónoma, de conformidade coa proposta do conselleiro de Sanidade e Servicios Sociais e presidente do Servicio Galego de Saúde logo de deliberación do Con
sello da Xunta de Galicia na súa reunión do día seis de abril de dous mil,
DISPOÑO:
Artigo 1º
1. Acéptase a cesión a título gratuíto dun predio feito polo Concello da Coruña a favor do Servicio Galego de Saúde con destino á construcción dun centro de saúde.
2. O predio cedido, que forma parte da parcela número 32 do proxecto de compensación do polígono de Mato Grande, mide 5.102 m de extensión superficial e ten os seguintes lindes:
-Norte: estrada de circunvalación que separa do Barrio das Flores e, nunha porción, co predio da que se segrega.
-Sur: rúa do polígono de Mato Grande.
-Leste: resto do predio matriz.
Oeste: parcelas M.6 e M.5 (rúa no medio) tamén do polígono de Mato Grande.
Artigo 2º
O inmoble acéptase segundo o establecido nos artigos 23.1º da Lei 3/1985, do 12 de abril, do patrimonio da Comunidade Autónoma e 38 do seu Regulamento e destinarase ó fin para o que se cede.
Artigo 3º
O Servicio Galego de Saúde, a través do seu órgano competente, procederá á formalización da aceptación no correspondente documento público, logo da segregación da parcela cedida do predio matriz do que forma parte, e á inscrición do inmoble no Rexistro da Propiedade ó seu nome, integrándose no seu patrimonio propio.
Disposición derradeira
O Servicio Galego de Saúde, a través do seu órgano competente, levará a cabo os trámites necesarios para a efectividade de canto se dispón neste decreto.
Santiago de Compostela, seis de abril de dous mil.
Manuel Fraga Iribarne
Presidente
José María Hernández Cochón
Conselleiro de Sanidade e Servicios Sociais