O artigo 28.2º da Constitución española recoñece como dereito fundamental da persoa o dereito á folga.
O exercicio deste dereito na Administración e nas empresas, entidades e institucións públicas ou privadas, que presten servicios públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ó mantemento dos servicios esenciais fixados no artigo 2 do Decreto 155/1988, do 9 de xuño (DOG nº 116, do 20 de xuño), entre os que se atopa a sanidade.
O exercicio público da prestación da asistencia sanitaria non se pode ver afectado gravemente polo lexítimo dereito do exercicio de folga, xa que aquel é considerado e recoñecido prioritariamente en relación a este.
O artigo 3 do citado decreto faculta os conselleiros competentes, por razón dos servicios esenciais afectados, para que, mediante orde, e diante de cada situación de folga, decidan o mínimo de actividade necesaria para asegura-lo mantemento de tales servicios, así como para determina-lo persoal necesario para a súa prestación.
Convocada folga que afecta tanto o persoal de sala como o persoal de datos que desempeña as súas funcións, os primeiros no edificio de usos múltiples da Xunta de Galicia en San Marcos, s/n e os segundos no Hospital Psiquiátrico de Conxo, en Santiago de Compostela, que se levará a efecto desde as 00,00 horas do día 19 de abril do 2000 e con carácter indefinido, logo da audiencia ó comité de folga,
DISPÓN:
Artigo 1º
A folga convocada desde as 00,00 horas do día 19 de abril de 2000 e con carácter indefinido, que afecta o persoal de sala e o persoal de datos da Central de Coordinación da Fundación Pública de Urxencias Sanitarias en Santiago de Compostela, enténdese condicionada ó mantemento dos servicios mínimos necesarios en adecuada correspondencia cos criterios rectores que se citan neste artigo.
Os servicios mínimos que se fixan resultan totalmente imprescindibles para mante-la adecuada
cobertura na Central de Urxencias Médicas 061 de Galicia, para evitar que se produzan graves prexuízos irreparables ós cidadáns, que poden afectar incluso á vida das persoas.
Tales mínimos responden á necesidade de compatibiliza-lo respecto ineludible ó exercicio do dereito á folga coa atención ós usuarios que, baixo ningún concepto, poden quedar desasistidos, polas características do servicio dispensado, tendo en conta ademais a duración da folga, de carácter indefinido e que coincide o seu inicio, co período vacacional de Semana Santa, e polo tanto de aumento significativo das chamadas.
Establécense os seguintes servicios mínimos:
-Persoal teleoperador: 100% as 24 horas, tódolos días da semana.
-Persoal de supervisión: 100% durante as 24 horas, tódolos días da semana.
-Persoal radioperador: 100% durante as 24 horas, tódolos días da semana.
-Persoal de datos administrativos: 20% de luns a venres, das 8 ás 15 horas e das 15.30 horas ás 18 horas.
Artigo 2º
A designación nominal, con carácter rotatorio, do persoal que deberá cubri-lo servicio será determinada polo director-xerente, procedéndose á súa publicación nos taboleiros de anuncios do centro de traballo.
Artigo 3º
Os prazos e alteracións no traballo por parte do persoal necesario para o mantemento dos servicios mínimos serán considerados ilegais para os efectos do establecido no artigo 16.1º do Real decreto lei 17/1977, do 4 de marzo (BOE nº 58, do 9 de marzo).
Artigo 4º
O disposto nos artigos anteriores non significará ningún tipo de limitación dos dereitos que a normativa reguladora da folga lle recoñece ó persoal nesta situación, nin tampouco sobre a tramitación e efectos das peticións que a motiven.
Artigo 5º
Sen prexuízo do que establecen os artigos anteriores, deberanse observa-las normas legais e regulamentarias vixentes en materia de garantías dos usuarios dos centros sanitarios.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 17 de abril de 2000.
José Mª Hernández Cochón
Conselleiro de Sanidade e Servicios Sociais