Visto o texto do convenio marco de colaboración entre a Xunta de Galicia e o Consello Evanxélico de Galicia, que servirá de base para a elaboración de acordos sectoriais sobre diferentes materias entre os distintos organismos e consellerías dependentes de ámbalas dúas insitucións.
Esta consellería
ACORDA:
Dispoñe-la súa publicación no Diario Oficial de Galicia.
Santiago de Compostela, 5 de abril de 2000.
Jaime Pita Varela
Conselleiro da Presidencia e Administración
Pública
Reunidos:
Dunha parte o Excmo. Sr. Manuel Fraga Iribarne, presidente da Xunta de Galicia e en representación dela, en virtude do disposto nos artigos 15.1º da Lei orgánica 1/1981, do 6 de abril, do Estatuto de autonomía de Galicia e da Lei 1/1983, do 22 de febreiro, reguladora da Xunta e do seu presidente.
E doutra parte, David Rego Fernández, presidente do Consello Evanxélico de Galicia e Eliseo Gómez-Lor Pérez, secretario xeral executivo en vir
tude do disposto nos artigos, 18 e 26, dos estatutos do Consello Evanxélico de Galicia.
Manifestan:
Que a Xunta de Galicia e o Consello Evanxélico de Galicia, como expresión do seu desexo de estableceren unha colaboración nos asuntos de interese común e promoveren a normalización relixiosa na comunidade de Galicia dentro dos parámetros constitucionais, subscriben o presente convenio que servirá de base para a elaboración de acordos sectoriais sobre diferentes materias entre os distintos organismos e consellerías dependentes de ámbalas dúas institucións.
Por todo isto, establécense inicialmente os seguintes acordos referidos as áreas que acontinuación se expresan:
En materia institucional:
-Estableceren unha canle permanenten de diálogo entre ámbalas dúas institucións integrada por parte da Xunta de Galicia polo director xeral de Relacións Institucionais e por parte do Consello Evanxélico polo secretario executivo co fin de coordinar, concretar e supervisa-lo contido do presente convenio e os acordos asinados a nivel sectorial.
-Os representantes celebrarán polo menos unha reunión ó ano para desenvolvemento dos fins propostos.
-A Xunta de Galicia recoñece o Consello Evanxélico de Galicia como referencia válida para solicitaren información, opinión ou comenta-los sucesos relativos ás igrexas evanxélicas de Galicia.
-A representación do Consello Evanxélico terase en conta pola Xunta de Galicia para os efectos protocolarios nos actos organizados por ela, sempre e cando a natureza do acto o requira.
En materia cultural:
-Regula-la participación de representantes da cultura evanxélica galega en actos culturais organizados pola Xunta de Galicia.
-A Xunta de Galicia manifesta a súa disposición a colaborar nos termos que se acorden na conservación do patrimonio histórico e cultural das igrexas e institucións evanxélicas en Galicia.
En materia social:
-Colaborar coa obra social das igrexas evanxélicas de Galicia dentro dos plans autonómicos de axuda social, asistindo, se é o caso, a Xunta de Galicia ás devanditas obras sociais para que poidan cumpri-los requisitos de acreditación esixidos pola Xunta de Galicia.
-Comprometerse a Xunta de Galicia a prestar apoio á obra social evanxélica en Galicia.
-Habilitar acordos entre a Xunta de Galicia e o Consello Evanxélico de Galicia que permitan a participación do voluntariado social e das instalacións
das igrexas evanxélicas galegas para o desenvolvemento das actividades sanitarias ou de interese social.
En materia educativa:
-Facilita-la docencia do ensino relixioso, evanxélico nos centros de ensino públicos, nos niveis de ensino obrigatorio, todo iso sen prexuízo das competencias que nesta materia lle correspondan ó Estado.
-Facilita-la docencia, en concreto os medios materiais necesarios para levala a cabo.
Vixencia:
O presente convenio entrará en vigor o día seguinte ó da súa publicación no DOG, e terá vixencia namentras ámbalas dúas partes ou unha delas, non propoña a súa denuncia con non menos de dous meses de antelación á data que se propoña como finalización del.
En sinal de conformidade asinan ámbalas dúas partes o presente convenio por duplicado en Santiago de Compostela, tres de febreiro de dous mil.
Manuel Fraga Iribarne
Presidente da Xunta de Galicia
David Rego FernándezEliseo Gómer-Lor Pérez
Presidente do Consello Secretario xeral do Consello
Evanxélico de GaliciaEvanxélico de Galicia
