O Concello de Vigo, en sesión que tivo lugar o día 27 de setembro de 1999, aprobou o proxecto de adecuación dos colectores da marxe do río Lagares e actuacións localizadas para o control das augas pluviais e na mesma sesión, acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa. O concello remitiu a documentación complementaria para a correcta tramitación do expediente con data de entrada no rexistro xeral da Consellería de Xustiza, Interior e Relacións Laborais o día 2 de marzo de 2000.
Os bens nos que se concreta a declaración de urxente expropiación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda, así como a Dirección Xeral de Montes e Medio Ambiente Natural da Consellería de Medio Ambiente, emitiron informes favorables. Estes informes tiveron entrada no rexistro xeral da Consellería de Xustiza, Interior e Relacións Laborais, respectivamente, os días 2 de decembro de 1999 e 7 de febreiro de 2000.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, porque a infraestructura de saneamento e a capacidade de desaugamento do río Lagares conta cunha rede de drenaxe con graves deficiencias que se traducen nunha diminución da capacidade hidráulica dos colectores para drena-la auga vertida neles e, polo tanto, nun aumento do risco de asolagamentos no leito do río Lagares. Isto dá lugar a repetidas inundacións, con grandes danos a vivendas, a industrias, ou transporte, e as restantes infraestructuras urbanas.
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa reunión do día dezaseis de marzo de dous mil,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, polo Concello de Vigo, para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución das obras do proxecto de adecuación dos colectores de marxe do río Lagares e actuacións localizadas para o control das augas pluviais.
Santiago de Compostela, dezaseis de marzo de dous mil.
Manuel Fraga Iribarne
Presidente
Antonio Pillado Montero
Conselleiro de Xustiza, Interior e Relacións Laborais