Examinado o expediente presentado polo centro privado Abrente de Sanxenxo (Pontevedra), solicitando autorización para poder imparti-lo ciclo formativo de grao superior de administración de sistemas informáticos,
Tendo en conta que o expediente foi tramitado pola Delegación Provincial da Consellería de Educación e Ordenación Universitaria de Pontevedra, que se remite cos informes correspondentes,
Vistos a Lei 1/1990, do 3 de outubro (BOE do 4), de ordenación xeral do sistema educativo, Real decreto 1004/1991, do 14 de xuño (BOE do 26), polo que se establecen os requisitos mínimos dos centros que imparten ensinanzas de réxime xeral non universitarias; Real decreto 777/1998 (BOE do 8 de maio) polo que se desenvolven determinados aspectos da ordenación da formación profesional no ámbito do sistema educativo; Decreto 296/1999 (DOG do 18 de novembro) polo que se desenvolven determinados aspectos dos currículos dos ciclos formativos de formación profesional específica na Comunidade Autónoma de Galicia; Orde do 21 de decembro de 1999 (DOG do 31 de xaneiro de 2000) pola que se regulan determinados aspectos relativos a autorización de centros privados exclusivos de formación profesional específica, no ámbito da Comunidade Autónoma de Galicia; Decreto 133/1995, do 10 de maio (DOG do 22), sobre autorización de centros docentes privados para impartir ensinanzas de réxime xeral non
universitarias e a Orde do 20 de setembro de 1995 (DOG do 15 de decembro) que desenvolve o antedito decreto,
Considerando que concorren no expediente os requisitos esixidos nas disposicións vixentes para poder acceder ó solicitado,
Esta consellería, por proposta da Dirección Xeral de Centros e Inspección Educativa,
DISPÓN:
Primeiro.-Autoriza-lo centro privado Abrente de Sanxenxo (Pontevedra), para imparti-lo ciclo formativo de grao superior de administración de sistemas informáticos en quenda de tarde-noite, segundo se especifica no anexo da presente orde.
Segundo.-Antes do inicio das ensinanzas que se autorizan, a Delegación Provincial da Consellería de Educación e Ordenación Universitaria, logo de informe da Inspección educativa, aprobará expresamente a relación de persoal que impartirá docencia no dito centro.
Terceiro.-Queda o centro obrigado ó cumprimento da lexislación vixente e a solicita-la oportuna revisión cando teña que modificarse calquera dos datos que sinala a presente orde.
Cuarto.-Contra esta orde, que esgota a vía administrativa, os interesados poderán interpoñer recurso potestativo de reposición perante o conselleiro de Educación e Ordenación Universitaria, no prazo dun mes, a partir do día seguinte ó da súa publicación no Diario Oficial de Galicia, segundo o disposto nos artigos 116 e 117 da Lei 4/1999 (BOE do 14 de xaneiro), de modificación da Lei 30/1992, de réxime xurídico das administracións públicas e do procedemento administrativo común, ou ben directamente o recurso contencioso-administrativo no prazo do dous meses perante o Tribunal Superior de Xustiza de Galicia.
Santiago de Compostela, 6 de marzo de 2000.
Celso Currás Fernández
Conselleiro de Educación e Ordenación
Universitaria
ANEXO
Provincia: Pontevedra.
Concello: Sanxenxo.
Localidade: Portonovo.
Enderezo: estrada de Pombal-Adigna s/n.
Código do centro: 36016024.
Denominación: Abrente.
Titular: Adigna Sociedad Cooperativa Limitada.
Ensinanzas que se autorizan:
Quenda: tarde-noite.
Familia profesional: informática.
1 ciclo formativo de grao superior de administración de sistemas informáticos (2 unidades, 30 postos/unidade).
Composición resultante:-Quenda: diurno.
a) Centro de educación infantil: 3 unidades do segundo ciclo.
b) Centro de educación primaria: 6 unidades.
c) Centro de educación secundaria: 4 unidades de educación secundaria obrigatoria.
d) Centro de educación especial: 1 unidade.-Quenda: tarde-noite.
e) Centro de formación profesional específica: 1 ciclo formativo de grao superior de administración de sistemas informáticos (2 unidades, 30 postos/unidade).