De conformidade co disposto polo artigo 59.4º da Lei 30/1992, do 26 de novembro, modificada pola Lei 4/1999, de réxime xurídico das administracións públicas e do procedemento administrativo común, notifícaselles ás persoas que no anexo se mencionan a incoación de expediente sancionador por presunta infracción á Lei sobre incendios forestais 81/1968, do 5 de decembro e do seu regulamento, aprobado polo Decreto 3769/1972, do 23 de decembro.
Noméase instructora dos expedientes a Míriam Areal López, funcionaria desta delegación; o réxime de recusación é o establecido nos artigos 28 e 29 da Lei 30/1992.
Para os efectos previstos na Lei de réxime xurídico das administracións públicas e do procedemento administrativo común, os expedientados disporán dun prazo de quince (15) días hábiles, contados a partir do seguinte ó da publicación desta noficación para que poidan examina-los expedientes nesta delegación provincial, sita na rúa do Paseo nº 18, 5º andar e achegar por escrito alegacións, documentos, informacións ou proposta de probas que consideren convenientes na defensa dos seus dereitos.
De conformidade co artigo 42.4º, da Lei 30/1992, en relación coa Lei 4/1999, de réxime xurídico das administracións públicas e do procedemento administrativo común, infórmase de que no caso de non se resolve-lo presente expediente no prazo de seis meses, tendo en conta as posibles interrupcións do seu cómputo por causas imputables ó interesado producirase a súa caducidade. A resolución que declare a caducidade ordenará o arquivo das actuacións cos efectos previstos no artigo 92 desta lei.
De non efectuaren alegación ningunha no prazo fixado, este acordo de incoación poderá ser considerado proposta de resolución, conforme o establecido no artigo 13.2º do regulamento para o exercicio da potestade sancionadora, aprobado polo Real decreto 1398/1993, do 4 de agosto, determinándose para estes efectos os importes da sanción indicados no anexo.
Para resolve-lo expediente é competente por razón da contía da multa o director xeral de Montes e Medio Ambiente Natural desta consellería de acordo co artigo 141 do regulamento da Lei de incendios forestais.
O pagamento voluntario porá fin ó expediente. O importe da sanción que en cada caso corresponda,
farase efectiva na conta nº 2091-0388-90-3110001181 de Caixa Galicia, empregando o impreso oficial que se facilitará na Delegación Provincial de Ourense ou en calquera unidade administrativa pertencente á Xunta de Galicia.
Ourense, 18 de febreiro de 2000.
Agustín Prado Verdeal
Delegado provincial de Ourense
ANEXOS
Expediente: 83/1999 incendios.
Denunciado: Manuel Corral Naval.
Último enderezo coñecido: rúa Fonte do Monte nº 9.
Feito denunciado: queima sen autorización e en época de máximo perigo ardendo sobre unha área de superficie arborada con piñeiros entre 30 e 35 anos de idade, afectando coma danos nun poste do tendido eléctrico e un anaco de panal carbonizado dun avesporeiro.
Precepto infrinxido e sancionador: artigo 138 a) do Regulamento do 23 de decembro de 1972, en relación coa Resolución do 21 de decembro de 1998, da Dirección Xeral de Montes e Medio Ambiente Natural sobre medidas para a prevención de incendios forestais durante o ano 1999.
Sanción: 100.000 pesetas.
Expediente: 74/1999 incendios.
Denunciado: Ubaldo Rodríguez Campos.
Último enderezo coñecido: rúa Pino nº 26, Vigo (Pontevedra).
Feito denunciado: queima de matogueiras e papeis sen autorización e en época de máximo perigo.
Precepto infrinxido e sancionador: artigo 138 a) do Regulamento do 23 de decembro de 1972, en relación coa Resolución do 21 de decembro de 1998, da Dirección Xeral de Montes e Medio Ambiente Natural sobre medidas para a prevención de incendios forestais durante o ano 1999.
Sanción: 51.000 pesetas.
