Visto o expediente do convenio colectivo para a empresa Remolcadores de Vigo, S.A., con nº de código 3602172, que tivo entrada nesta delegación provincial o día 16-2-2000, subscrito en representación da parte económica pola representación da empresa, e da parte social, polo delegado de persoal, en data 27-1-2000. De conformidade co disposto no artigo 90.2º e 3º, do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo, esta delegación provincial
ACORDA:
Primeiro.-Ordena-la súa inscrición no libro de rexistro de convenios colectivos de traballo, que consta nesta delegación provincial, e a notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Sección de Mediación, Arbitraxe e Conciliación.
Terceiro.-Dispoñe-la súa publicación no Diario Oficial de Galicia.
Vigo, 21 de febreiro de 2000.
Antonio Coello Bufill
Delegado provincial de Pontevedra
Convenio colectivo de Remolcadores de Vigo, S.A.
Artigo 1º.-Ámbito de aplicación.
Este convenio será de aplicación á empresa Remolcadores de Vigo, S.A. (Remolcavisa), e ó persoal de flota do seu buque.
Artigo 2º.-Vixencia, prórroga e denuncia.
Este convenio entrará en vigor o 1 de xaneiro de 2000 con independencia da data de publicación no Boletín Oficial del Estado.
A súa vixencia será dun ano con efectos ata o 31 de decembro de 2000 e será denunciado alomenos cun mes de antelación á data do seu vencemento; en caso contrario, verase prorrogado por períodos anuais sucesivos.
Unha vez denunciado o convenio e mentres as partes non asinen un novo que o substitúa, este convenio continuará vixente na súa totalidade.
Artigo 3º.-Vinculación á totalidade.
Para tódolos efectos este convenio constitúe unha unidade indivisble, polo que non se poderá pretender unha ou varias cláusulas, desbotando o resto, senón que terá que ser aplicado e observado na súa integridade e considerado globalmente.
Se a autoridade laboral competente non aprobase algunha das normas deste convenio e este feito desvirtuase o sentido del, a xuízo das partes, quedará sen efecto a totalidade do convenio, que deberá ser considerado de novo pola comisión negociadora.
Artigo 4º.-Compensación e absorcións futuras.
O conxunto das condicións salariais pactadas neste convenio absorberán e compensarán no seu conxunto e no conxunto anual calquera outra mellora parcial que, por disposición legal de carácter xeral e específica para o sector pactase por calquera orixe que fose, no futuro poida establecerse.
Artigo 5º.-Condicións máis beneficiosas.
En todo o establecido neste convenio respectaranse as condicións máis beneficiosas colectivas e ad personam existentes, sempre que no seu conxunto e en cómputo anual sexan superiores ás establecidas neste convenio.
Artigo 6º.-Período de proba.
1. Toda admisión de persoal fixo para as actividades comprendidas neste convenio considerarase provisional durante o período de proba, variable, consonte o labor ó que o tripulante se dedique, que non poderá ser superior ó establecido na seguinte escala:
a) Titulados: 75 días.
b) Mestranza e subalternos: 30 días.
2. En caso de que o período de proba remate no transcurso dunha travesía, este considerarase prorrogado ata que o buque chegue a porto, pero a vontade por parte do armador de rescindi-lo contrato de traballo por non supera-lo período de proba, deberalle ser comunicada por escrito ó tripulante nos prazos recollidos no número anterior.
En caso de non se cumprir co recollido no parágrafo anterior, considerarase o tripulante como fixo de cadro.
3. Nos casos de rescisión de contrato por fin de período de proba, por vontade do traballador, os gastos de viaxe serán pola súa conta. En caso de que a rescisión sexa por vontade da empresa, os gastos de viaxe ó domicilio habitual do traballador, serán por conta da empresa.
4. Concluído a satisfacción de ámbalas partes o período de proba, o tripulante pasará a figurar no cadro de persoal fixo da empresa, e o tempo de período de proba seralle computado para efectos de antigüidade.
5. A empresa, no suposto de rescisión durante o período de proba, entregará a documentación relativa
ó tempo efectivamente traballado e o certificado de empresa das cotizacións efectuadas á Seguridade Social.
6. Unha vez finalizado o período de proba por vontade da empresa e coa chegada ó porto do traballador, percibirá unha gratificación de viaxe consistente en dous días de salario.
7. A situación de incapacidade laboral transitoria (ILT). Durante o período de proba, interrompe o cómputo del.
Artigo 7º.-Comisión de servicio.
Entenderase por comisión de servicio, a misión profesional ou cometidos especiais que, circunstancialmente, ordene a empresa realizar ós tripulantes en calquera lugar, así como a expectativa de embarque cando o tripulante se encontre fóra do seu domicilio por orde da empresa.
En comisión de servicio, os tripulantes devengarán o salario real que viñan desfrutando no seu posto normal de traballo, así como vacacións de convenio.
Se a comisión de servicio se realizase fóra do domicilio do tripulante, percibirá as axudas de custo estipuladas neste convenio.
Cando a comisión de servicio teña unha duración superior a 15 días e se realice no domicilio do tripulante, devengaranse vacacións segundo o establecido na OTMM (ou norma que a substitúa). En calquera caso, os gastos que poidan realizarse, aboaranse logo de xustificación, debendo a empresa adiantar unha cantidade estimada por importe dos ditos gastos.
O delegado, durante a negociación do convenio, manterase en comisión de servicio.
Artigo 8º.-Transbordo.
Enténdese como tal o traslado do tripulante dun buque a oturo da mesma empresa dentro do transcurso do período de embarque. Existen dúas clase de transbordo:
a) Por iniciativa da empresa. Por necesidades de organización ou servicio, o transbordo será disposto pola empresa; para este efecto seguiranse os seguintes criterios:
a.1) Criterio de excepción para o delegado.
a.2) Orde inversa á da antigüidade na empresa.
a.3) Non ter sido transbordado máis dunha vez durante o período de embarque.
a.4) Se o tripulante fose transbordado a un buque onde a percepción salarial fose menor á que tiña en condicións homoxéneas de traballo, percibirá por unha soa vez por campaña e en concepto de indemnización, unha cantidade equivalente á diferencia que resulte entre o percibido no seu último destino e o novo.
b) Por iniciativa do tripulante. Cando por razóns de localización do seu domicilio e outras causas xustificadas, o tripulante que así o solicite e a empresa poida proporcionarllo. En ámbolos casos, ata que o traballador non estea enrolado no novo buque permanecerá nas condicións que viña desfrutando no buque anterior do cal desembarcou, sendo por conta da empresa os gastos de transporte que ocasione o tripulante.
Artigo 9º.-Expectativa de embarque.
Considerarase expectativa de embarque a situación do tripulante que se atopa no seu domicilio, procedente dunha situación diferente á de embarque ou comisión de servicio dispoñible e a ordes da empresa. A expectativa de embarque durará ata o día anterior en que o tripulante saia do seu domicilio para entrar en situación de servicio de empresa.
En ningún caso se poderá mante-lo tripulante por un tempo superior a 30 días, pasando a partir dese momento a situación de comisión de servicio.
Durante a expectativa de embarque, o tripulante percibirá o salario profesional e desfrutará das vacacións de ordenanza.
Artigo 10º.-Licencias.
1. Con indiferencia do período convido de vacacións, recoñécese o dereito de desfrutar de licencias polos motivos que a seguir se enumeran:
De índole familiar, para asistir a cursos ou exames para a obtención de títulos ou nomeamentos superiores, ou cursos de carácter obrigatorio, complementarios ou de perfeccionamento e capacitación na Mariña Mercante que sexan necesarios por lei, a empresa verase obrigada a lles facilita-la obtención dos ditos cursos ós traballadores de cadro, e para asuntos propios.
2. A concesión de toda clase de licencias correspóndelle ó armador. O peticionario deberá presenta-la oportuna instancia e o armador adoptará a resolución sobre dela, dentro dos 30 días seguintes ó da súa solicitude.
Nos supostos de licencias por motivos de índole familiar, os permisos que se soliciten deberán ser concedidos polo capitán no momento de seren solicitadas, desembarcando ó tripulante no primeiro porto cos medios máis directos de desprazamento e dentro dos límites xeográficos recollidos no número 3.
3. Os gastos de desprazamento para o desfrute de licencias correrán por conta do peticionario agás os ocasionados por morte do cónxuxe ou fillos, que correrán por conta do armador, quedando restrinxido o dereito a desembarque e reembarque a tódolos portos de Europa, Mar Mediterráneo, Mar Negro e ós portos de África ata o paralelo Noadibou. Non obstante, quedan excluídas destas limitacións xeográficas as causas de enfermidade grave ou morte do cónxuxe ou fillos.
4. Licencias por motivo de índole familiar.
Estas licencias serán retribuídas nos seguintes casos:
-Matrimonio: 20 días.
-Nacemento de fillos: 15 días.
-Enfermidade grave de cónxuxe, fillos, pais e irmáns, mesmo políticos: 15 días.
-Morte de cónxuxe e fillos, mesmo políticos: 12 días.
-Morte de pais e irmáns, mesmo políticos: 12 días.
-Traslado de domicilio: 1 día.
Malia estes prazos e atendendo as excepcionais circunstancias que poidan concorrer nalgunhas situacións xustificadas, a empresa concederá os días necesarios.
Ningunha das licencias descritas nestes parágrafos do número 4 serán acumuladas a vacacións, agás a de matrimonio que si se poderá acumular. Malia o parágrafo anterior, o tripulante embarcado, logo de comunicación á compañía de navegación, poderá optar á dita acumulación no caso de natalidade.
Os tripulantes que desfruten das licencias previstas neste número percibirán o seu salario profesional.
5. Cursos por necesidade da empresa.
Cando algúns dos cursos se realicen por necesidade da empresa, o traballador atoparase en situación de comisión de servicio todo o tempo durante o que duren os cursos. Se os tripulantes se integrasen en calquera dos cursos en vacacións, estas quedarán interrompidas. Unha vez finalizado o curso, seguirá o desfrute delas.
6. Licencias por asuntos propios.
Os tripulantes poderán solicitar licencias por necesidade de atender persoalmente asuntos propios que non admiten demora por un período de dous días ata seis meses, que poderá concede-lo armador en atención ós fundamentos que expoña o solicitante e ás necesidade de servicio.
Estas licencias non terán dereito a ningunha clase de retribución.
Artigo 11º.-Excedencias.
1. Excedencia voluntaria.
Poderaa solicitar todo tripulante que conte alomenos cun ano de antigüidade na empresa. As peticións resolveranse no prazo de 30 días seguintes ó da data de presentación.
O prazo mínimo para as excedencias será de seis meses e o máximo de cinco anos. Se o excedente, un mes antes de remata-lo prazo para o que se lle concedeu a excedencia, non solicitase o seu reingreso na empresa, causará baixa definitivamente dela.
Se solicitase o reingreso, este efectuarase tan pronto exista vacante na súa categoría.
No suposto de que non existise vacante na súa categoría e o excedente optase voluntariamente por algunha categoría inferior, dentro da súa especialidade, percibirá o salario correspondente a esta ata que se produza a súa reincorporación á categoría que lle corresponde.
O excedente, unha vez reincorporado á empresa, non poderá optar á solicitude unha nova excedencia ata que non transcorresen alomenos catro anos de servicio activo na compañía, desde o remate daquela.
O tempo transcorrido nesta situación non se computará para ningún efecto.
2. Excedencia forzosa.
Dará lugar á situación de excedencia forzosa calquera situación orixinada polas seguintes causas: nomeamento para calquera cargo político ou sindical de ámbito provincial ou superior, electivo ou por designación.
Nos casos de cargo político ou sindical, a excedencia comprenderá todo o tempo que dure o cargo que o determine e outorgará dereito a ocupa-la mesma praza que desempeñaba anteriormente, computándose o tempo de excedencia como en activo para tódolos efectos.
O excedente deberá solicita-lo seu reingreso dentro dos 30 días seguintes ó de cesar no seu cargo político ou sindical. En caso de non exerce-la dita petición dentro deste prazo perderá o seu dereito ó reingreso na empresa.
Artigo 12º.-Escalas.
A empresa levará obrigatoriamente unha escala pública na que figure todo o persoal dela, co seu cargo e antigüidade.
Esta escala deberase encontrar actualizada anualmente e á disposición directa dos tripulantes do buque, entregándolle copia ó delegado de persoal.
Artigo 13º.-Axudas de custo e viaxes.
Axuda de custos é a cantidade que se devenga diariamente para satisface-los gastos de manutención e estadías que se orixinen no desprazamento fóra do domicilio.
Percibiranse axudas de custo nos seguintes casos:
1. Comisión de servicio fóra de domicilio.
2. Durante o tempo de viaxe necesario para o embarque ou desembarque ata a chegada ó seu domicilio.
3. Na expectativa de embarque fóra do domicilio.
As axudas de custo en territorio nacional pagaranse a razón de 8.915 ptas./53,58 euros, por cada unhas das viaxes, sexa para o embarque ou de regreso ó
domicilio, establecendo os seguintes conceptos e valores:
Xantar: 2.039 ptas./12,25 euros.
Cea: 1.782 ptas./10,71 euros.
Almorzo: 567 ptas./3,40 euros.
Aloxamento: 4.527 ptas./12,25 euros.
A empresa entregaralles como mínimo a cantidade de 5.150 ptas./30,95 euros ós traballadores (en concepto de anticipo) para que poidan satisface-los gastos que se orixinen no desprazamento ó embarque, xustificando os gastos ocasionados, en caso de que por motivos xustificados teñan que realizarse gastos superiores, entregaranse na empresa os recibos oportunos para a súa consideración para efectos de reembolso.
No estranxeiro, a empresa estará obrigada a facilita-los medios de transporte e aloxamento máis idóneo e adecuado ó tripulante.
A empresa aboará os gastos de viaxe elixindo para o tripulante o medio de transporte máis idóneo, adecuado e directo, quedando excluídos os taxis de aluguer e as clases de luxo. Para os taxis de longo percorrido considerarase como tal as distancias superiores a 25 quilómetros.
En caso de uso destes medios, a súa utilización deberá estar xustificada por falta de billetes doutro tipo para o seu urxente embarque ou porque da súa cotización se deriven maiores economías cós propios gastos. O tripulante presentará os comprobantes.
En todo caso, o tripulante percibirá por adiantado da compañía, do armador ou dos seus representantes, o importe aproximado dos gastos de locomoción e axudas de custo, en caso de que non entreguen os correspondentes billetes de pasaxe.
No caso de os gastos de desembarco por accidente ou enfermidade seren aboados pola empresa ós tripulantes, estes estarán obrigados a lle enviar a aquela os correspondentes xustificantes.
Artigo 14º.-Xornada laboral.
A xornada laboral será de 40 horas semanais. A diferencia entre esta xornada e a que se realice na mañá do sábado compensarase en descansos anuais para os tripulantes na forma que se detalla no artigo 16 deste convenio. Os sábados, domingos e festivos só se empregarán para gardas de mar, gardas de fonda, emerxencia do buque ou a carga, así como para as manobras de porto e ancoraxe sempre e cando se realicen na xornada laboral que ten asignada a tripulación nun día ordinario, suplementándose mediante un complemento de gardas e traballos, que se establece en 250 ptas./1,50 euros hora.
No caso de que estes traballos se realizasen fóra do horario establecido para os tripulantes nun día ordinario, pagarase o valor establecido para a hora extraordinaria de acordo coa respectiva categoría.
Artigo 15º.-Horas extraordinarias.
As horas extraordinarias serán de libre ofrecemento por parte do armador ou os seus representantes e a prestación delas será sempre voluntaria por parte dos tripulantes, agás nos seguintes supostos:
1. Os traballos de ancoraxe, atraque e desatraque, emendadas previas, aperturas e peches de trapelas e arranches.
2. No mar, sempre que as necesidades da navegación así o esixan para chegar a boa fin a viaxe iniciada polo buque e no porto cando por te-lo buque que saír ó mar inmediatamente, non poida realizarse en xornada normal. Nestes casos utilizarase unicamente o persoal estrictamente necesario.
3. Atención da carga e das operacións necesarias para que o buque poida realiza-la carga e descarga. Así como aprovisionamento sempre e cando por te-lo buque que saír ó mar inmediatamente, non poida realizarse en xornada normal. Nestes casos utilizarase unicamente o persoal estrictamente necesario.
4. Atención ás autoridades en porto e traballos similares de ineludible realización.
5. En situación de socorro a outros buques ou persoas en perigo ou cando fosen necesarias ou urxentes durante a navegación para a seguridade do buque, persoas ou cargamento.
6. Nos supostos de formalidades alfandegueiras, corentena e outras disposicións sanitarias.
A natureza das horas extraordinarias na Mariña Mercante teñen carácter especial, consideraranse como horas estructurais, dado que estas se producen por continxencias necesarias na navegación, imprevisibles na maior parte dos casos. Pola consideración do buque como centro de traballo da tripulación, o réxime especial da Mariña Mercante fai que a compensación retribuída das horas extraordinarias teñan unha natureza específica de cálculo do seu valor.
Establécese unha garantía retributiva para as horas extraordinarias, o valor das cales está recollido na táboa salarial anexa.
Artigo 16º.-Vacacións.
As vacacións devengaranse a razón de 0,5 días por cada día de embarque, a razón de 30 días de vacacións por cada 60 días de embarque ou situación similar. Cando por necesidades do servicio fose necesario o embarque dun tripulante antes de finaliza-las súas vacacións, os días desfrutados acumularanse ó seguinte período de vacacións, se ben o embarque non se producirá antes do desfrute das 4/5 partes delas. En calquera caso, o embarque anticipado non se deberá producir en dúas ocasións consecutivas. En casos de alta por enfermidade ou accidente, o tripulante pasará a desfruta-las vacacións que teñan devengadas, non rexendo o parágrafo mínimo a que se refire o parágrafo anterior.
Considerarase como situación asimilada a embarco para efectos de vacacións as seguintes: expectativa fóra de domicilio, desprazamento para embarque, reparacións para o buque e baixas por accidente de traballo ou enfermidade que requira hospitalización e polo tempo que precise a devandita hospitalización.
Artigo 17º.-Relevos de persoal de vacacións.
Empresa e tripulantes están obrigados ó estricto cumprimento do réxime de vacacións establecido no convenio, non podendo en ningún caso ser compensadas economicamente, admitindo como límite de flexibilidade o regulado a seguir:
A empresa poderá efectua-los relevos de persoal que teña que desfrutar das súas vacacións da seguinte forma:
15 días daquel que corresponda o devengo delas ata 15 días despois do dito prazo de devengo.
Artigo 18º.-Incremento salarial.
Os valores salariais están reflectidos na táboa salarial anexa a este convenio e entrarán en vigor a partir do 1-1-2000
Artigo 19º.-Traballos especiais.
Teñen consideración de traballos especiais aqueles cunha realización que, en condicións normais, non é obrigatoria para os tripulantes, por corresponde-los ditos traballos a traballadores de terra.
Dado o carácter voluntario da realización destes traballos, o tratamento económico pactarase libremente entre o armador e os traballadores.
Exclúense aqueles traballos que tradicionalmente se viñeron efectuando.
Este punto será desenvolvido pola comisión paritaria, formada polo empresario e os traballadores.
Artigo 20º.-Baixas por enfermidade profesional e accidente laboral.
Durante un tempo de baixa por enfermidade profesional ou accidente, percibirase o 100 por cento da base de cotización do tripulante afectado, durante os 30 primeiros días, o resto segundo a lexislación vixente, referido sempre ó mes embarcado inmediatamente anterior ó da súa baixa, devengado neses 30 días de vacacións de convenio.
Os traballadores que con ocasión dun accidente resultasen incapacitados para o exercicio da súa profesión mariña, terán dereito a se incorporar a un posto no cadro de persoal de Remolcavisa de terra, nos postos de nova creación ou vacantes que se produzan na categoría profesional adecuada. Se fose necesario, mesmo se facilitaría a reciclaxe profesional adecuada.
Artigo 21º.-Seguro de accidentes.
Establécese por conta da empresa e a favor dos tripulantes un seguro de accidentes, para cubri-los
riscos de morte ou invalidez permanente, coas seguintes contías:
Por morte: 5.000.000 de ptas.; 30.050,60 euros.
Por invalidez permanente: 5.000.000 de ptas./ 30.050,60 euros.
Artigo 22º.-Perda de equipaxe a bordo.
En caso de perda de equipaxe a bordo, por calquera membro da tripulación debido a naufraxio, incendio ou calquera outro accidente non imputable ó ou ós prexudicados, a empresa aboaralle como compensación as seguintes cantidades:
a) Por perda total 103.000 ptas./619,04 euros.
b) Por perda parcial dunha cantidade que non será superior ás 103.000 ptas./619,04 euros a xuízo do capitán, unha vez oído o delegado dos tripulantes e o interesado.
En caso de que a empresa aboe indemnización de vestiario ou facilite uniformes e estes artigos fosen danados, a indemnización reducirase un 20%.
En caso de falecemento do tripulante, esta indemnización seralles aboada ós seus herdeiros.
Artigo 23º.-Gratificacións extraordinarias.
Aboaranse con carácter extraordinario dúas pagas extras na contía establecida para o salario profesional, unha antes do 30 de xuño e outra antes do 15 de decembro.
Artigo 24º.-Roupa e servicios de lavandería.
1. A roupa de traballo será por conta da empresa atendéndose ó establecido nas normas de seguridade e hixiene no traballo.
2. O lavado da roupa de cama, toallas e servicios de fonda, correrá por conta da empresa, así como proverá a 1 buque de medios pertinentes para o lavado dos efectos persoais dos tripulantes (lavadora, pasadora de ferro ou pasadora de ferro e secadora).
Roupa de traballo a bordo.
Todo o persoal embarcado disporá en perfecto uso dos seguintes efectos:
a) Oficiais de ponte.
Disporá de funda, un equipo de auga completo, un casco (lanterna e luvas), segundo necesidades e en cantidades suficientes (ante entrega do vello).
b) Oficiais de máquinas.
Disporán de dúas fundas, un casco, calzado especial de seguridade, lanterna e luvas, segundo necesidades e en cantidades suficientes (ante a entrega do vello).
c) Contramestres e mariñeiros.
Disporán de tres fundas ou similar, un equipo de auga completo, un casco, calzado especial (lanterna
e luvas), segundo necesidades e en cantidades abondas (ante entrega do vello).
d) Engraxadores.
Percibirán os mesmos efectos cós de cuberta, agás roupas de auga que utilizarán a xa citada comunmente para o departamento de máquinas.
e) Persoal de cociña.
Os cociñeiros disporán de dúas chaquetas curtas brancas, dous pantalóns, tres camisetas brancas e seis mandís.
Os camareiros disporán de dúas chaquetas curtas brancas e dous pantalóns.
Todo persoal embarcado disporá dunha cartilla na que se reflicta a roupa e efectos que reciben. Os efectos transferibles (cascos, lanternas, roupa de augas, etc.) seranlles entregados ó desembarco ós seus respectivos xefes de departamento.
Os criterios para cambio de roupa serán levados segundo o estado de uso dos ditos efectos.
A comisión de a bordo, delegado dos tripulantes ou membro do comité de empresa de flota, xunto co xefe de departamento, determinarán o estado deles.
Artigo 25º.-Traballos de reparación.
Estando o barco en reparación fóra do porto base, o persoal embarcado estará nas mesmas condicións que co barco en servicio para tódolos efectos.
Co barco no porto base, o persoal que traballe a bordo farao a xornada normal e os días computaranse como embarcado. Se durante a realización dos citados traballos non se lle dá servicio de comidas e dormida a bordo, aboaránselle as axudas de custo establecidas no artigo 13º deste convenio, e entregaráselle o importe das viaxes que teña que realizar para os seus desprazamentos para efectua-los devanditos labores (ós que residan fóra da localidade en que se realice a reparación).
Artigo 26º.-Comidas especiais.
Enténdense por comidas especiais as que se preparan para datas sinaladas como os días: 1 de maio (festa do traballo), 16 de xullo (Virxe do Carme), 24 de decembro (Noiteboa) e 31 de decembro (fin de ano). A cantidade, calidade e tipo de comida para estes días será a criterio do cociñeiro e da comisión de comidas, e a empresa correrá cos gastos.
A manutención, para ningún efecto terá consideración de salario, por conseguinte non será esixible durante as vacacións, permisos, licencias, baixa por enfermidade, accidentes ou outras situacións similares. Tampouco se aboará coas pagas extraordinarias nin con calquera outro devengo que recoñeza a derrogada Ordenanza de traballo da Mariña Mercante.
Artigo 27º.-Cadro de persoal operativo.
Establécese o seguinte cadro de persoal operativo:
B/ Mariñeiro.
Capitán.
Xefe de máquinas.
1º oficial de ponte.
1º oficial de máquinas.
Cociñeiro.
Contramestre.
Engraxador.
Artigo 28º.-Actividade sindical.
Norma 1.
O tripulante que resulte elixido como representante ou delegado de empresa exercerá as súas funcións sindicais representantivas con toda a liberdade durante o tempo para o que fose elixido, a salvo sempre das súas obrigas de traballo.
O exercicio destas funcións concrétase nas seguintes facultades:
1. Expresar con total liberdade as súas opinións nas materias concernentes á esfera de representación sindical.
2. Reunirse co resto da tripulación para deliberar sobre temas de actividade sindical.
3. Promove-las accións a que haxa lugar para a defensa dos dereitos ou do interese sindical dos seus representados.
4. Gozar de protección eficaz contra calquera acto de usurpación, abuso ou inxerencia que afecte o libre exercicio da súa función, e poida prexudicalo, incluído o despedimento pola súa condición de representante dos traballadores, da súa actividade sindical, ou da súa afiliación ó sindicato, etc.
5. Interrompe-la súa actividade laboral no buque cando as esixencias da súa representación sindical impoñan unha intervención directa ou inaprazable para tentar solucionar calquera problema que afecte os intereses dos tripulantes, logo de aviso ó capitán.
Norma 2.
O delegado de persoal disporá dunha reserva de 20 horas laborais retribuídas mensuais para o exercicio da súa actividade nos seguintes casos:
a) Asistencia a congresos, asembleas, consellos, coordinadoras, se é o caso, e, en xeral, a calquera clase de reunións a que fosen convocados polo sindicato.
b) Participación en seminarios, cursos ou actividades de carácter formativo sindical, promovidos polo sindicato ó que pertenza ou cando expresa e persoalmente sexa convocado.
c) Actos de xestión que deben realizar por cargo do seu sindicato ou por razón das súas obrigas específicas. Para os mesmos casos poderán ademais utilizar ó seu cargo as horas necesarias.
O delegado de persoal garantirá que o buque non se demore pola súa asistencia a cursos.
Norma 3.
Dereitos e funcións do delegado de persoal.
1. Vixiar polo estricto cumprimento das normas laborais regulamentarias ou pactadas, especialmente as relativas á xornada de traballo, control de quendas de vacacións, horas extraordinarias, etc.
2. Ser informado por escrito, preceptiva e previamente sobre as sancións impostas ós tripulantes por faltas moi graves.
3. Non ser transbordado contra a súa vontade en tanto que dure o exercicio do seu cargo sindical.
4. Convocar asemblea no buque por propia iniciativa ou cando llo solicite un terceiro da tripulación.
5. Utilizar tódolos servicios de impresión, comunicación e oficina de a bordo para o desenvolvemento das súas funcións sindicais, se for necesario. Aquelas comunicacións que afecten ámbalas partes correrán por conta da empresa; as que sexan única e exclusivamente de carácter sindical, correrán por conta dos tripulantes.
6. Cando a actuación do delegado do buque, realizada fóra do centro de traballo, supoña xestión en defensa dos intereses dos seus representados, e se exerza ante a empresa, ou ante a autoridade laboral logo de citación desta, considerarase que se atopa en situación asimilada á comisión de servicio, percibindo a totalidade dos devengos que lle correspondese de ter prestada a súa actividade laboral.
Norma 4.
Os tripulantes poderán exerce-lo seu dereito de asemblea logo de aviso ó capitán. A asemblea non entorpecerá as gardas nin as quendas de traballo, quedando, en todo caso, a salvo a seguridade do buque e a súa dotación. O delegado de persoal será o responsable do seu normal desenvolvemento.
Norma 5
Poderán acollerse á excedencia, por motivos sindicais, aqueles tripulantes que fosen designados para ocupar calquera cargo de responsabilidade en calquera sindicato legalmente establecido. Esta excedencia concederáselle a todo tripulante calquera que fose a súa antigüidade na empresa, polo prazo de duración do seu cargo.
O excedente ocupará a mesma praza que desempeñaba anteriormente, computándose o tempo de excedencia para efectos de antigüidade. O reingreso deberá ser solicitado polo interesado dentro do mes
seguinte ó do seu cesamento no cargo sindical que teña.
Norma 6.
O delegado de pesoal terá as seguintes funcións:
1. Negociar e vixia-lo cumprimento do convenio e as súas actas de aplicación na empresa e os demais pactos que asinen esta e os seus tripulantes.
2. Ser informado pola dirección da empresa:
a) Anualmente, coñecer e ter ó seu dispor o balance, a conta de resultados e a memoria.
b) Con carácter previo á súa execución pola empresa sobre a reestructuración de cadro de persoal, venda e posta en situación fóra de servicio ou cambio de bandeira do buque e sobre os plans de formación profesional da empresa.
c) En función da materia de que se trata:
-Sobre a implantación e revisión de sistemas de organización de traballo e calquera das súas posibles consecuencias.
-Sobre a fusión e absorción ou modificación do estatutos xurídico da empresa cando iso supoña calquera incidencia que afecte o volume de emprego.
-O empresario facilitaralle ó delegado información das contratacións, suspensións ou extincións dos contratos, así como modelo ou modelos do contrato de embarque que utilice, estando lexitimado o delegado para efectua-las oportunas reclamacións ante a empresa e, se é o caso, ante a autoridade laboral competente.
-No tocante ás estatísticas sobre o índice de absentismo e as súas causas, os accidentes de traballo e enfermidade profesional e as súas consecuencias, os índices de sinistralidade, o movemento de ingresos, cesamentos e os ascensos.
Artigo 29º.-Día do Carme.
O día 16 de xullo, festividade de Nosa Señora do Carme, patrona da Mariña Mercante, ten a consideración de festivo non recuperable.
Artigo 30º.-Comisión paritaria.
Para interpretar e vixia-la aplicación deste convenio colectivo, créase unha comisión paritaria de dous membros composta por un membro elixido pola empresa e un membro pola parte social (o delegado de persoal).
As partes someterán cantas dúbidas, discrepancias ou conflictos puidesen xurdir pola interpretación ou aplicación do convenio. Esta comisión resolverá o que proceda no prazo o máis breve posible.
Artigo 31º.-Artigo derradeiro.
Ámbalas partes acordan que todo o non disposto neste convenio terase que ater ó disposto na lexislación xeral vixente e no convenio xeral da Mariña Mercante, aínda que estea derrogada polo Goberno.
Táboa de salarios para 2000
Categoría Salario profesional Valor trienio Horas extras Pagas extras
Pesetas Euros Pesetas Euros Pesetas Euros Pesetas Euros
Capitán 268.170 1.611,73 8.265 49,67 37.768 226,99 268.170 1.611,73
Xefe de máquinas 258.495 1.553,59 8.265 49,67 37.768 226,99 258.495 1.553,59
Oficial N.P. C/M 220.045 1.322,50 7.774 46,72 33.920 203,86 220.045 1.322,50
Oficial M.M. 220.045 1.322,50 7.774 46,72 33.920 203,86 220.045 1.322,50
Oficial N.P. 167.119 1.004,41 7.287 43,80 22.503 135,25 167.119 1.004,41
Oficial Maq. 167.119 1.004,41 7.287 43,80 22.503 135,25 167.119 1.004,41
Contramestre 161.667 971,64 6.798 40,86 21.680 130,30 161.667 971,64
Cociñeiro 161.237 969,05 6.798 40,86 21.680 130,30 161.237 969,05
Mecánico reparador 160.150 962,52 6.798 40,86 21.680 130,30 160.150 962,52
Mecamar 159.655 959,55 6.047 36,34 21.218 127,52 159.655 959,55
Engraxador 159.335 957,62 5.653 33,98 20.761 124,78 159.335 957, 62
Mariñeiro 157.000 943,59 5.611 33,72 20.761 124,78 157.000 943,59
Limpador 140.149 842,31 4.739 28,48 18.295 109,96 140.149 842,31
Quedan a salvo as condicións máis beneficiosas establecidas nos contratos de traballo.
Disposición derradeira.
As partes asinantes deste convenio foron:
Pola representación salarial: Cándido Correa García.
Pola representanción dos traballadores: Manuel Martínez Santomé.
Acta derradeira
En Vigo o 27 de xaneiro de dous mil.
Reunidos, dunha parte, en nome e representación da empresa Remolcadores de Vigo, S.A. (Remolcavisa), Cándido Correa García, e da outra, o delegado de persoal Manuel Martínez Santomé.
Ámbalas partes asinantes recoñecen teren chegado a un total acordo respecto á negociación do convenio colectivo, asinado en consecuencia en tódalas follas que o integran.
Así mesmo, acordan elevar á autoridade laboral o texto do convenio para a súa homologación.
Por todo o exposto anteriormente, recoñecendo reciprocamente o logro dun total e completo acordo sobre tódolos puntos do convenio, asinan esta acta, en proba de conformidade e asumi-lo compromiso de velar polo cumprimento do acordado, asinan esta acta.
