Galego | Castellano

DOG - Xunta de Galicia -

Diario Oficial de Galicia
DOG Núm. 50 Luns, 13 de marzo de 2000 Páx. 3.408

VI. ANUNCIOS

DA ADMINISTRACIÓN AUTONÓMICA

CONSELLERÍA DE MEDIO AMBIENTE

RESOLUCIÓN do 25 de xaneiro de 2000, do Xurado Provincial de Montes Veciñais en Man Común da Coruña, pola que se resolve o expediente 348, que afecta o monte Deira e Pedroso, de Vilariño e outros lugares da parroquia de Cespón (concello de Boiro).

Reunido o 17 de novembro de 1999 o Xurado Provincial de Montes Veciñais en Man Común da Coruña, baixo a presidencia do delegado provincial da Consellería de Medio Ambiente, Rogelio Aramburu Núñez, os vocais, Andrés López-Suevos Fernández, xefe do Servicio de Montes e I.F., Alfonso Vázquez-Castro Garma, letrado do Gabinete Xurídico Territorial da Xunta de Galicia, Juan Ramón Beneyto Bellas, representante do Colexio de Avogados da Coruña, José Manuel Caramés Franco, representante das Comunidades Veciñais de Montes en Man

Común, e da secretaria Ana María Díaz López, letrada da citada delegación para estudiar e resolve-lo expediente nº 348.

Monte: Deira e Pedroso.

Lugares: Vilariño, San Roque, Sar, Pazos, Deira, Quinteiro, Ferreiros, Trebonzos, Benivas, Guilleiro e Cespón.

Parroquia: Cespón.

Concello: Boiro.

Antecedentes de feito:

1. Diversos veciños de Vilariño e outros lugares da parroquia de Cespón, concello de Boiro, solicitaron con data 23-12-1996 deste xurado, a declaración como veciñal do expresado lugar, do monte arriba citado e que ten as seguintes características:

Superficie: 87,15 ha.

Lindeiros:

É a parcela I do monte Deira e Pedroso, nº 148 do CUP.

Norte: propiedades particulares de veciños de Cespón e Sar, do piquete nº 258 ó 275 do deslindamento, seguindo a orde de piquetes, do 275 ó 1, e do 1 ó 7 seguindo a orde de piquetes. Leste: propiedades particulares de veciños de Sar, Pazos, Guilleiro e Reboredo, do piquete 7 ó 99, seguindo a orde de piquetes. Sur: propiedades particulares de veciños de Reboredo, Trebonzos e Vilariño, do piquete 99 ó 189, seguindo a orde de piquetes. Oeste: propiedades particulares de veciños de Vilariño e Cespón, do piquete 189 ó 258, seguindo a orde de piquetes.

2. Á vista de tal solicitude, o xurado, na súa reunión do 13-6-1997, acordou inicia-lo oportuno expediente, nomeándose como instructor del a Alfonso Vázquez-Castro Garma, quen aceptou expresamente o dito cargo. Procedeuse á correspondente tramitación, librándose mandamento para a anotación preventiva no Rexistro da Propiedade de Noia, oídas tódalas persoas, organismos e corporacións interesadas. Expedíronse mandamentos para tal fin dirixidos ó alcalde-presidente do Concello de Boiro, ó xefe do Servicio de Montes e I.F. e publicáronse edictos no DOG (nº 183, do 23-9-1997), taboleiro de anuncios do concello e lugares de costume.

3. Os veciños de Vilariño e outros lugares da parroquia de Cespón fundamentan a súa petición ante o Xurado Provincial de Montes Veciñais en Man Común en que, desde tempo inmemorial, veñen realizando aproveitamentos do monte Deira e Pedroso en réxime de man común.

En tal sentido presentan acta de manifestacións ante notario dos veciños de maior idade dos lugares de Brión e Cespón.

4. Ante este expediente formulou alegación o Concello de Boiro que, en sesión da súa Comisión de Goberno do 21-10-1997, acordou opoñerse á declaración do monte veciñal, baseándose na súa inclu

sión no inventario de bens do concello coa cualificación de Ben Patrimonial de Propios, estando inscrito como tal no Rexistro da Propiedade de Noia.

Engaden documentación xustificativa de diversos actos de disposición realizados no monte, e manifestan que nel están situados diversos servicios municipais, como cemiterio, colexios, etc. Alegan que os aproveitamentos se realizan en virtude do consorcio vixente co Servicio de Montes, efectuando o propio concello operacións de limpeza e conservación.

5. A asociación de veciños Brétema de Boiro oponse á cualificación do monte Deira e Pedroso, debido á súa inclusión no Inventario de Bens do Concello e a que están situados nel diversos servicios dotacionais. Manifestan que na solicitude de cualificación non se reflicten a totalidade dos lugares que tradicionalmente viñan facendo uso do dito monte. Solicitan finalmente que se manteña como de propiedade municipal.

6. Na tramitación destas actuacións cumpríronse as formalidades legais e regulamentarias, esixidas principalmente pola Lei 13/1989, do 10 de outubro, de montes veciñais en man común, e o seu regulamento de aplicación aprobado polo Decreto 260/1992, do 4 de setembro, ambos da Comunidade Autónoma de Galicia, Lei de procedemento administrativo e demais disposicións aplicables ó caso.

Fundamentos de dereito:

1. O Xurado Provincial de Montes Veciñais en Man Común da Coruña ten xurisdicción e competencia para coñecer deste expediente en virtude do disposto nos artigos 9 e 10 da Lei da Comunidade Autónoma de Galicia 13/1989, do 10 de outubro, de montes veciñais en man común.

2. De conformidade co contido do artigo 11 da citada lei e 19 do regulamento, aprobado polo Decreto 260/1992, do 4 de setembro, os veciños de Vilariño e outros son parte lexítima para solicita-la iniciación deste expediente de cualificación.

3. Para a súa cualificación como veciñal en man común, o monte debe reuni-las seguintes características: 1) Pertenza a agrupacións de veciños na súa calidade de grupos sociais, non como entidades administrativas; 2) Que se aproveite consuetudinariamente en réxime de comunidade, sen asignación de cotas polos membros de cada agrupación na súa condición de veciños comuneiros; 3) Que os veciños comuneiros residan habitualmente con casa aberta dentro da área xeográfica sobre a que se asenta o grupo social que tradicionalmente aproveitou o monte (artigos 1, 2 e 3 da Lei 13/1989 e 1, 2 e 3 do Regulamento do 4 de setembro de 1992).

4. Unha vez examinada a documentación e os informes achegados ó expediente, o instructor propón á consideración do xurado as seguintes conclusións:

a) O monte Deira e Pedroso, incluído no CUP co nº 148, deslindouse con data do 31-5-1967, atri

buíndose a súa pertenza ás parroquias de Cespón, Boiro e Abanqueiro. A incrición no CUP orixinou unha efectiva posesión e conseguinte percepción dos beneficios dos aproveitamentos polo Concello de Boiro, o que determinou que o Pleno con data do 14-10-1985 se acordara o cambio da cualificación do dito monte á de Ben Patrimonial de Propios, sen que houbese reclamación ningunha durante o correspondente período de información pública. O monte inscribiuse como tal ben de propios no Rexistro da Propiedade de Noia, cancelándose as anteriores inscricións, co que se chega á actual situación xurídica.

b) Os aproveitamentos alegados polos veciños dos lugares de Vilariño e outros nunca tiveron un carácter exclusivo, debido ó uso que teñen feito do monte os veciños doutros lugares da parroquia de Cespón, así como das parroquias limítrofes. Ademais, estes aproveitamentos son marxinais fronte ós realizados en virtude do consorcio forestal vixente entre o concello de Boiro e a Xunta de Galicia (Servicio de Montes e I.F.), e ó que o concello xa estaba incorporado desde o 10-12-1940.

c) Á vista dos escritos motivados dos dereitos de ámbalas partes, considera que os dereitos que se alegan nos aproveitamentos que puideran ter sobre o monte os veciños de Vilariño e outros, así como os do concello de Boiro mantendo o seu dereito de propiedade e non recoñecendo o acto posesorio da comunidade solicitante, implica que, o que neste se expón é cuestión relativa ó dominio de tales montes, da competencia exclusiva dos tribunais da xurisdicción ordinaria, para substanciar polos trámites do xuízo declarativo ordinario que corresponda.

Por iso, éste xurado, á vista dos antecedentes e fundamentos de dereito expostos, por proposta do instructor,

Acorda non cualificar como veciñal en man común o monte Deira e Pedroso afectado por este expediente.

Contra esta resolución poderase interpoñer recurso de reposición con carácter potestativo ante o Xurado Provincial de Montes Veciñais en Man Común da Coruña no prazo dun mes, ou recurso contencioso-administrativo ante o Tribunal Superior de Xustiza de Galicia no prazo de dous meses, contados a partir do día seguinte ó de publicación desta resolución no Diario Oficial de Galicia, segundo o disposto na Lei 30/1992, do 26 de novembro, de réxime xurídico das administracións públicas e do procedemento administrativo común.

A Coruña, 25 de xaneiro de 2000.

Ana María Díaz López

Secretaria do Xurado Provincial de Montes

Veciñais en Man Común

Visto e prace

Rogelio Aramburu Núñez

Presidente do Xurado Provincial de Montes Veciñais en Man Común