Visto o texto do convenio colectivo do persoal laboral do Concello da Rúa (código convenio nº 3200852) de Ourense, con entrada nesta delegación provincial o día 28-1-2000, subscrito pola parte económica; alcalde, en representación do concello, e, da parte social; os delegados de persoal, o día 24-1-2000, e, de conformidade co disposto no artigo 90.2º e 3º, do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores. Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado a Comunidade Autónoma de Galicia en materia de traballo.
Esta delegación provincial,
ACORDA:
Primeiro.-Ordena-la súa inscrición no libro de rexistro de convenios colectivos de traballo, que consta nesta delegación provincial, e notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Unidade de Mediación, Arbitraxe e Conciliación desta delegación.
Terceiro.-Dispoñe-la súa publicación no Diario Oficial de Galicia.
Ourense, 1 de febreiro de 2000.
José Lage Lage
Delegado provincial de Ourense
Convenio colectivo para o persoal laboral
do Concello da Rúa
Capítulo I
Ámbito de aplicación
Artigo 1º.-Ámbito persoal.
As normas que integran este acordo son de aplicación a todo o persoal laboral do Concello da Rúa con independencia da modalidade de contratación ou duración, indefinida ou temporal, da relación laboral.
Artigo 2º.-Ámbito temporal.
Este convenio terá vixencia desde o 1-1-2000 ata o 31-12-2000, prorrogándose automaticamente ata ser substituído por un novo acordo. As materias retributivas estarán sometidas a negociacións e revisións anuais.
Capítulo II
Garantías
Artigo 3º.-Negociación colectiva.
Quedan reservadas a negociación colectiva todas aquelas materias que, directa ou indirectamente, afecten ás condicións de traballo do persoal deste concello, e particularmente: as retribucións, oferta de emprego, cadros de persoal e relación de postos de traballo, sistemas de selección, promoción e provisión de postos de traballo, xornada laboral, calendario de vacacións, réxime disciplinario, xestión de servicios e métodos de traballo, seguridade e hixiene, e dereitos sindicais e de participación.
Artigo 4º.-Comisión de seguimento.
Ós 30 días da aprobación do acordo constituirase unha comisión de seguimento, en forma paritaria, composta por tres membros designados polo pleno e tres representantes sindicais dos traballadores.
A comisión reunirase nun prazo máximo de 48 horas a petición de calquera das partes, sendo os seus acordos de aplicación práctica nos termos en que se conclúan.
As funcións e actividades da comisión non impedirán, en ningún caso, o libre exercicio das xurisdiccións administrativas, contenciosa ou social previstas no ordenamento xurídico.
As partes adhírense por vontade expresa ó Acordo interprofesional galego sobre procedementos extraxudiciais de solución de conflictos de traballo.
Capítulo III
Organización do traballo
Artigo 5º
A organización do traballo, en conformidade co disposto na lexislación vixente, é competencia da corporación, a través dos seus órganos de goberno.
A súa aplicación práctica correspóndelle ó presidente da corporación, segundo as facultades que lle atribúe a lexislación ou lle foran delegadas.
Cando o exercicio destas competencias se deriven repercusións sobre as condicións de traballo dos empregados públicos esixirase, previamente á súa posta en práctica, cumpri-los procesos de negociación colectiva correspondentes.
Tódolos expedientes relativos ó persoal, funcionario ou laboral, que deba aproba-la Comisión de Goberno ou o Pleno, se é o caso, daráselle traslado á representación sindical dos traballadores sen prexuízo do trámite de audiencia ós interesados.
Artigo 6º.-Clasificación profesional.
Ten por obxecto a determinación, ordenación e definición das diferentes categorías dos empregados públicos así como as súas función ou competencias.
O persoal laboral do Concello da Rúa integrarase nalgunha das seguintes categorías:
Operarios: traballadores manuais que realizan, baixo dirección doutros, traballos, reparacións ou obras de calquera especialidade que non requiren habilidades especiais.
Subalterno: traballadores que realizan tarefas de vixilancia e custodia interior de oficinas, así como misións de conserxe, subalterno, porteiro ou outras análogas en edificios en servicios da corporación.
Poderánselles atribuír ós que por idade ou outras razóns teñan diminuída a súa capacidade para misións de particular esforzo ou penosidade, pero que conserven a requirida para subalternos.
Oficial de oficios: traballadores prácticos nun oficio manual, no cal se desenvolven con soltura, mandan e dirixen os dependentes da súa especialidade e sector, corrixindo a realización dunha faena que se efectúa baixo ordes superiores.
Encargado: traballadores que teñen ó seu coidado a boa marcha e mantemento dun determinado sector dun servicio.
Auxiliar administrativo: traballadores que realizan tarefas de mecanografía, despacho de correspondencia, cálculo simple, manexo de máquinas, arquivo de documentos e similares.
Administrativo: traballadores que realizan tarefas administrativas de trámite e colaboración.
Técnico medio: traballadores que realizan funcións que son obxecto dunha carreira universitaria de ciclo medio.
Técnico superior: traballadores que realizan funcións que son obxecto dunha carreira universitaria de ciclo superior.
Artigo 7º.-Traballos de superior categoría.
A realización de traballos de superior categoría responderá a necesidades excepcionais, e perentorias e durará o tempo mínimo imprescindible.
A adscrición dun traballador a un posto de superior categoría farase por decreto da alcaldía tendo en conta a capacitación profesional necesaria, con comunicación os representantes sindicais dos traballadores, levando consigo automaticamente o devengo das retribucións que correspondan ó posto desempeñado. O tempo máximo que un traballador pode estar nesta situación será de seis meses, transcorridos os cales outro traballador ocuparán o seu lugar.
Os postos cubertos en situación de superior categoría incluiranse obrigatoriamente na seguinte oferta de emprego público.
Artigo 8º.-Segunda actividade.
1. A Corporación e os representantes sindicais dos traballadores concretarán, dentro das medidas de reorganización, os postos de traballo que poidan ser considerados aptos para a creación dunha escala de segunda actividade dentro do cadro de persoal ou relación de postos de traballo. A eles adscribirase o persoal que teña minguadas as súas facultades.
O persoal pasará á escala de segunda actividade por incapacidade para o exercicio da súa función habitual.
Calquera traballador que sufra invalidez poderá ser reinserido noutro posto de traballo sempre que a Corporación e os delegados cheguen a un acordo que non implique crear un novo centro de traballo.
2. A adscrición individualizada realizarase tendo en conta as aptitudes necesarias para o desenvolvemento do posto, por aplicación sucesiva dos seguintes criterios:
a) Enfermidade invalidante.
b) Nivel de incapacidade.
c) Idade.
3. Todo o persoal que pase a escala de segunda actividade desde categorías superiores conservará o total de retribucións que viña percibindo. As vacantes orixinadas por adscrición á segunda actividade incluiranse obrigatoriamente na seguinte oferta de emprego.
Artigo 9º
A empregada municipal embarazada terá dereito a que, se o posto de traballo que desempeña é prexudicial para o seu estado, se le encomenden funcións acordes coas súas circunstancias.
Artigo 10º
Todo comportamento ou situación que atente contra o respecto ou a intimidade dos traballadores/as, e as conductas de acoso sexual, verbais ou físicas, serán tratadas como faltas disciplinarias.
Capítulo IV
Ingreso, promoción e provisión de postos
Artigo 11º.-Ingreso no Concello da Rúa.
1. Logo da negociación cos representantes sindicais dos traballadores, o concello aprobará no prazo dun mes desde a aprobación dos orzamentos municipais, a súa oferta de emprego público, que conterá obrigatoriamente tódalas prazas vacantes e que será convocada durante o primeiro trimestre do ano.
O Concello da Rúa reservará para a promoción interna a totalidade das prazas laborais vacantes.
2. Da oferta de emprego público daráselles conta ós representantes sindicais dos traballadores, os cales participarán na elaboración e redacción das bases reguladoras de cada convocatoria. Os procedementos de selección, contratación, promoción e provisión realizaranse mediante convocatoria pública, baixo os principios de igualdade, méritos e capacidade.
3. O ingreso no Concello da Rúa realizarase polo sistema de concurso-oposición, no cal a fase de concurso será valorada co 45% da puntuación total do proceso selectivo.
4. A contratación laboral en réxime de duración temporal responderá a necesidades coxunturais e puntuais. Os sistemas de ingreso e selección serán os establecidos con carácter xeral neste convenio aténdose ó establecido nos puntos 2 e 3 deste artigo.
5. A oferta pública de emprego estrutúrase obrigatoriamente nas seguintes quendas:
1. Quenda de promoción. Integrada polas reservas de promoción recollidas no 1º punto deste artigo.
2. Quenda de libre. Na cal serán especialmente valorados, na fase de concurso, os servicios prestados con anterioridade no Concello da Rúa.
Artigo 12º.-Promoción interna e profesional.
1. A promoción interna vertical consiste no ascenso dun grupo de titulación a outro superior. O concello reservará a totalidade das prazas para promoción interna. O sistema de selección será o concurso-oposición, no cal a fase de concurso será valorada co 45% da puntuación total do proceso selectivo. Os criterios que se valorarán na fase de concurso serán:
-Méritos académicos: 30%.
-Antigüidade: 40%.
-Méritos profesionais: 30%.
Na fase de oposición non será esixibles os coñecementos acreditados en probas anteriores de ingreso ou outras de promoción.
2. A promoción profesional consiste no ascenso dunha categoría a outra superior, integradas ámbalas dúas no mesmo grupo de titulación. O concello reservará a totalidade das prazas laborais vacantes para promoción profesional. O sistema de selección será o de concurso. Os criterios do concurso serán os mesmos que os da promoción interna vertical.
3. Os representantes sindicais dos traballadores participarán na elaboración de bases, baremos, cursos e probas.
Artigo 13º.-Provisión de postos.
Os sistemas de provisión de postos serán os seguintes:
1. Concurso. Será o sistema normal de provisión. Os baremos destes concursos serán acordados cos representantes legais dos traballadores e terán que conte-los seguintes criterios:
-Méritos académicos: 35%.
-Antigüidade: 35%.
-Méritos profesionais específicos: 30%.
Cando se trate de concursos específicos entre os méritos profesionais específicos poderanse incluír entrevistas ou memorias sobre o posto que se desenvolverá, que non terán carácter eliminatorio, nin superarán o 75% da valoración total deste méritos.
2. Libre designación. Proveranse mediante este sistema os postos de traballo reservados a persoal que preste servicios de asesoramento especial e postos de traballo directamente vinculados á alcaldía ou ós grupos políticos.
Estes sistemas garantirán en todo momento os principios de igualdade, mérito, capacidade e publicidade. As convocatorias e a súa resolución serán publicadas no BOP.
Artigo 14º.-Tribunais de selección e comisión de valoración.
Os tribunais de selección (externa e interna) e mailas comisións de valoración (provisión) estarán constituídos por un número impar de membros, empregados municipais, non inferior a 2, téndose que designar o mesmo número de suplentes. A totalidade dos membros terá que posuír un nivel de titulación igual ou superior ó esixido para o acceso á praza convocada. Alomenos dous membros serán designados por proposta da representación dos traballadores.
Capítulo V
Vacacións, permisos, licencias,
excedencias e despedimentos
Artigo 15º.-Vacacións.
As vacacións anuais retribuídas terán a duración dun mes natural, e desfrutaranse preferentemente entre os meses de xuño e setembro, ámbolos dous incluídos.
Se por necesidades do servicio, comunicadas expresamente con antelación mínima de dous meses salvo casos imprevisibles, o traballador non puidera desfruta-las vacacións anuais nos meses sinalados, terá direito a escoller libremente o período vacacional e a desfrutar de 7 días adicionais. Neste suposto e no caso de que o traballador escolla desfruta-lo período vacacional partido, quince días entre xuño e setembro e os restantes quince noutros meses, os días adicionais serán tres.
Non obstante o traballador poderá solicitar da alcadía desfruta-las súas vacacións en meses diferentes ós sinalados no parágrafo primeiro, sen que isto xere dereito a desfrutar dos días adicionais.
O plano de vacacións anuais elaborarase entre novembro e decembro do ano anterior para a súa negociación cos representantes dos traballadores.
As vacacións quedarán en suspenso cando con anterioridade ó seu inicio o traballador se atope en situación de IT. Neste suposto as vacacións disfrutaranse dentro do ano natural noutro período, segundo as dispoñibilidades do servicio e sen dereito a ningún día adicional.
Artigo 16º.-Permisos.
Concederanse permisos retribuídos polas seguintes causas xustificadas:
a) Por nacemento ou adopción de fillos: 4 días.
b) Por morte ou enfermidade grave dun familiar de primeiro grao de consanguinidade ou afinidade: 4 días. Se o suceso se produce en localidade distinta: 5 días. Se o parentesco é de segundo grao terá dereito a un día menos que os sinalados anteriormente.
c) Por traslado de domicilio: 2 días.
d) O traballador cun fillo menor de nove meses terá dereito a unha hora de ausencia do traballo. Este período de tempo poderase dividir en dúas fraccións ou substituírse por unha reducción de xornada en media hora.
e) Quen por garda legal teña ó seu cargo algún menor de seis anos ou diminuído físico, psíquico ou sensorial, terá direito a unha reducción de xornada nun tercio ou na metade, con deducción proporcional de retribucións. Tamén poderán acollerse a este dereito os traballadores municipais que teñan ó seu cargo familiares en primeiro grao, que por razóns de enfermidade, precisen asistencia continuada.
f) Para exames ou probas de avaliación en centros oficiais, o día da súa realización e o tempo necesario para concorrer a eles xustificadamente.
g) Durante o tempo que duren os congresos ou reunións de carácter profesional, social, académico ou sindical, coa debida xustificación, en función das necesidades do servicio.
h) Por asuntos propios sen xustificación, ata 9 días ó ano. De non poder desfrutarse dentro do ano natural
por razóns de servicio poderá facerse dentro do mes de xaneiro do ano seguinte.
i) Para o cumprimento dun deber público de carácter inescusable, o tempo imprescindible.
l) Os traballadores municipais que participen en procesos de negociación colectiva, desfrutarán do permiso suficiente para o estudio e negociación establecido legalmente.
m) Por asistencia a cursos de perfeccionamento laboral directamente relacionados coa especialidade persoal do traballador, e sempre que derive unha mellora directa para o funcionamento dos servicios municipais e foran autorizados previamente.
n) Por matrimonio, licencia retribuída de 15 días continuados.
Artigo 17º.-Licencias.
Permisos e licencias conforme estipule a lei no réxime laboral.
Artigo 18º.-Despedimentos.
No caso de despedimento declarado improcedente polos órganos competentes será o traballador quen opte entre a indemnización legal ou a súa readmisión.
Artigo 19º.-Xornada laboral.
1. A xornada laboral ordinaria será de 37,5 horas semanais e desenvolverase preferentemente durante os cinco primeiros días da semana, de luns a venres, e sempre con dúas fins de semana (sábado e domingo) completas e libres ó mes como mínimo.
2. A prestación diaria dos servicios realizarase preferentemente en réxime de xornada partida, en todo caso desde o 15 de xuño ó 15 de setembro realizarase en xornada continuada.
3. O persoal que, en sábado, manteña abertas dependencias municipais trasladará o seu descanso ó día laborable inmediato seguinte.
4. Ó traballador municipal que curse estudios oficiais facilitaráselle-la elección de quenda de traballo se tal é o sistema que se segue no seu servicio, para permitirlle unha maior compatibilidade co seu horario lectivo ou de titoría.
5. Establécense como días non laborables e non recuperables o 24 de decembro (Noiteboa) e o 31 de decembro (Noitevella).
6. Calquera reducción de xornada por festas, Nadal, etc. alcanzará a tódolos traballadores do concello, compensando coa mesma reducción noutras datas, á elección do traballador afectado, a quen non poida desfrutalas por razón de servicio.
7. O tempo que o empregado municipal empregue nas actuacións xudiciais derivadas da súa función será considerado, para todólos efectos, como tempo de traballo efectivo.
8. Os traballadores que por razón do servicio teñan que prolonga-lo seu horario normal de traballo serán
compensados economicamente ou con días de descanso, á súa elección, considerando as ditas prolongacións de xornada como servicios extraordinarios no marco do artigo 22º deste convenio.
Artigo 20º.-Descansos.
Todo traballador municipal terá dereito a desfrutar dun descanso de 20 minutos durante a súa xornada diaria, cando esta sexa continuada, que se computará para tódolos efectos como tempo de traballo efectivo.
O descanso entre xornada e xornada será como mínimo de 12 horas. O descanso semanal mínimo ininterrompido será de día e medio, desfrutándose preferentemente entre a tarde do sábado e o domingo.
Capítulo VI
Réxime de retribucións
Artigo 21º.-Retribucións.
O sistema retributivo para o persoal laboral do Concello da Rúa virá definido pola seguinte estructura e conceptos:
Soldo base mensual: determinado pola pertenza a unha categoría profesional. A súa contía determinarase, anualmente, nas táboas salariais recollidas neste convenio.
Antigüidade mensual: determinada por trienios. A contía será de 2.548 ptas./trienio por cada tres anos de servicio nas administracións públicas, con independencia de terse prestado de xeito continuado ou non.
Pagas extraordinarias: serán dúas ó ano, devengadas nos meses de xuño e decembro, por importe dunha mensualidade de soldo base e máis antigüidade cada unha delas.
Gratificacións: de acordo co disposto no artigo 22º deste convenio.
Indemnizacións por razón de servicio: aplicaranse conceptos e contías recollidos no artigo 23º.
Complementos: de nocturnidade e festividade, segundo se recolle no artigo 24º.
Artigo 22º.-Gratificacións.
1. Establécese a prohibición de realizar traballos extraordinarios fóra da xornada normal, que superen as 50 horas extraordinarias anuais. Exceptúanse da regra anterior os traballadores necesarios para prever ou reparar sinistros e outros danos extraordinarios e urxentes.
2. Mensualmente informarase documentalmente ós representantes dos traballadores do número de contías económicas percibidas polos traballadores do concello.
3. O importe económico ou compensación horaria, se é o caso, da hora extraordinaria virá determinado polo seguinte cálculo:
(Retribución anual/xornada anual) * 1,75.
Artigo 23º.-Indemnizacións por razón de servicio.
Estableceranse indemnizacións por razón de servicio polos seguintes conceptos, na contía que legalmente se fixe para os funcionarios, en función do seu grupo de equivalencia: axuda de custos, residencia eventual, cursos selectivos/reciclaxe, asistencia a órganos de selección, asistencia a órganos colexiados, colaboración escolas administración, traslado residencia.
Artigo 24º.-Complementos.
1. Complemento nocturnidade: o traballador que desenvolva a súa tarefa en horario comprendido entre as 22 horas e as 6 horas do día seguinte percibirá por cada hora de traballo ou fracción o seguinte complemento:
(Retribución anual/xornada anual) * 0,25.
2. Complemento festividade: no caso de traballar en domingo ou festivo, o empregado municipal percibirá un complemento por hora ou fracción segundo o seguinte cálculo:
(Retribución anual/xornada anual) * 0,25.
Artigo 25º.-Revisión salarial.
Ó remate do ano, sempre que o IPC anual supere o incremento experimentado a primeiros de ano polas retribucións do persoal procederase a unha revisión salarial pola diferencia producida: incremento IPC-incremento retribucións.
Artigo 26º.-Retribución en caso de IT.
1. As enfermidades e accidentes que impidan o normal desempeño da función darán dereito a licencia con plenitude de dereitos económicos desde o primeiro día da situación de ILT. O traballador terá a obriga de someterse ós controis médicos que se consideren convenientes por parte da corporación e a ficilita-las visitas médicas.
2. En supostos de accidente laboral o/a traballador/a cobrará a totalidade dos conceptos que lle corresponderían como realizara a súa xornada normal, ou no caso de non estar previsto, a media das cantidades percibidas ó longo do ano.
Capítulo VII
Dereitos sociais
Artigo 27º
O concello formalizará un seguro de cobertura das posibles responsabilidades civís de todo o persoal que preste os seus servicios nel, e polos actos que realicen por razón do seu traballo. No seu defecto o concello asumirá toda a responsabilidade.
Artigo 28º
Polo concello designarase ó seu cargo, a defensa do traballador que, como consecuencia do exercicio das súas funcións sexa obxecto de actuacións xudiciais, asumindo o concello as custas e gastos que deriven, incluídas fianzas, salvo nos casos en que se recoñeza na sentencia dolo, culpa, neglixencia grave ou mala fe por parte do traballador.
Artigo 29º
Á petición do interesado o concello concederá ós seus empregados anticipos de ata 4 mensualidades completas, cun tope máximo de 500.000 ptas. A súa devolución efectuarase mediante deducións mensuais en nómina, sen xerar ningún interese. O prazo para a devolución fixarao o interesado dentro dos seguintes máximos:
-14 meses para os anticipos dunha mensualidade.
-24 meses para os de dúas mensualidades.
-36 meses para os de tres mensualidades.
-48 meses para os de catro mensualidades.
Artigo 30º.-Fondo social.
1. O concello dotará anualmente un fondo, a partir do 1-1-2000 para cumprir coa obriga legal de prestación de asistencia social para a totalidade dos seus empregados municipais.
2. O dito fondo subsidiará:
a) Axuda de oftalmoloxía: 50% factura, ata unha contía máxima de 25.000 ptas.
b) Axuda de odontoloxía: 50% factura, ata unha contía máxima de 25.000 ptas.
c) Axuda por natalidade ou adopción: 15.000 ptas.
d) Axuda por nupcialidade: 15.000 ptas.
e) Axuda por defunción en favor de habentes-causa: 100.000 ptas.
f) Axuda de matrícula: 80% importe por curso académico e ata un máximo de 50.000 ptas.
g) Axuda de librería (por cada membro da unidade familiar):
-Ensino básico ou primario: 10.000 ptas.
-Ensino medio: 20.000 ptas.
-Ensino superior: 30.000 ptas.
h) Axudas por minusvalidez e incapacidade: 10.000 ptas./mes/membro unidade familiar diminuído.
3. Destas axudas estarán excluídos os traballadores postos á disposición do Concello da Rúa en virtude de convenios de colaboración con outras institucións ou administracións públicas.
Artigo 31º
A partir do 1-1-2000 o concello subscribirá un seguro colectivo para a totalidade dos seus traballadores que garanta unha indemnización en caso de morte ou invalidez absoluta durante a xornada laboral por importe de 4.000.000 de ptas.
Capítulo VIII
Seguridade e saúde
Artigo 32º
O concello constituirá e dotará a esta entidade dun Comité de Seguridade e Saúde e mais un Servicio de Prevención de Riscos.
Artigo 33º.-Comité de Seguridade e Saúde.
1. O Comité de Seguridade e Saúde estará constituído polos representantes dos traballadores e polo concelleiro de persoal ou persoa en quen delegue. Nomearanse un presidente e un secretario e dotaráselle dun regulamento de funcionamento.
2. O Servicio de Prevención de Riscos: virá constituído por un conxunto de medios humanos e materiais afectados á prevención e protección da seguridade e saúde dos traballadores municipais. Os seus compoñentes non estarán sometidos ó principio de xerarquía.
3. O Comité de Seguridade e Saúde terá entre as súas competencias:
a) Promove-lo coñecemento e a observancia da normativa desta materia.
b) Coñecer e recibir información dos riscos profesionais.
c) Estudio das situacións de perigosidade, accidentes ocorridos, analiza-las súas causas e realizar propostas motivadas de prevención.
d) Confeccionar un ficheiro de locais do concello e estudia-las súas condicións de seguridade e salubridade, para o cal contará co máximo apoio e axuda de corporación.
e) Realización e programación de campañas e cursiños de mentalización e prevención de accidentes.
f) Pór en coñecemento dos órganos competentes as situacións de perigosidade e risco que se produzan con carácter de urxencia.
g) Realiza-la paralización provisional de traballos ante a presencia dun risco grave e inminente.
h) Realizar plans de evacuacións.
i) Estudio do tipo e número de uniformes, e prazos de entrega.
l) Estudio e proposta de equipos de protección e seguridade persoal.
Artigo 34º
Con carácter xeral, anualmente efectuarase un recoñecemento médico a tódolos traballadores municipais e do seu resultado terá que se lles dar coñecemento. Quedará a xuízo do servicio médico o tipo de recoñecemento a que deba someterse o traballador. Este recoñecemento será voluntario e realizarase preferentemente dentro da xornada laboral.
Realizarase dúas revisións anuais e específicas ó persoal que desenvolva unha actividade de alto risco ou que o faga conveniente.
Ademais do recoñecemento xeral, os maiores de 50 anos poderán solicita-la realización dun exame cardiovascular.
O concello formalizará co Gabinete de Saúde Laboral da Consellería de Xustiza, Interior e Relacións Laborais da Xunta de Galicia a solicitude para a
realización dos recoñecementos médicos do persoal do concello.
Artigo 35º
O concello proporcionará uniformes de traballo en concordancia co posto e función que se realice seguindo a normativa vixente en materia de seguridade laboral.
O Comité de Seguridade e Saúde informará previamente neste materia. Soamente terán dereito a uniforme os postos de traballo que esixan un vestiario especial.
Con carácter xeral o persoal do concello terá dereito a que se lle faga entrega da roupa de traballo no primeiro trimestre de cada ano.
Artigo 36º
Cada servicio, sección, negociado ou unidade de traballo contará imperativamente cos medios necesarios de primeiros auxilios en perfectas condicións de utilización en todo momento, así como axeitados servicios hixiénicos, armarios individuais e duchas con auga quente e auga potable. Tamén contará co necesario material de seguridade persoal en perfectas condicións de uso.
Artigo 37º
Os membros do Comité de Seguridade e Saúde disporán do tempo necesario para asistir ás reunións ou para realiza-los cometidos sinalados polo propio comité. Así mesmo contarán, mensualmente, cun crédito horario sindical de 18 horas.
Capítulo IX
Dereitos sindicais
Artigo 38º
A corporación e os representantes legais dos traballadores comprométense a desenvolve-las condicións que permitan o pleno exercicio da liberdade sindical.
Artigo 39º
A representación do persoal desenvolverase de conformidade coa Lei orgánica de liberdade sindical e cantas disposicións desenvolvan esta materia.
Artigo 40º.-Acción sindical.
1. Para cumprir coas súas funcións, a Administración porá á disposición dos representantes dos traballadores un local axeitado e que contará con espacios para cada sección sindical, e medios materiais necesarios (mesas, cadeiras, arquivadores e material de oficina).
2. Tódolos centros de traballo e dependencias contarán con taboleiros de anuncios exclusivamente sindicais. Calquera representante legal ou delegado sindical poderá acceder ás dependencias, oficinas e servicios municipais, tendo dereito a seren informados dos asuntos que deban coñecer pola representación que desempeñan. En todo caso, este dereito compatibilizarase coa boa marcha das dependencias en cuestión.
Artigo 41º
É competencia dos representantes sindicais dos traballadores a defensa dos intereses xerais e específicos dos empregados públicos e, en particular, a negociación das súas condicións salariais, sociais e sindicais mediante os oportunos procedementos de negociación colectiva.
Os representantes sindicais dos traballadores serán informados de:
a) Das cuestións que afecten ó persoal e vaian ser tratadas na comisión informativa de persoal. Notificarase a orde do día e a acta da reunión anterior e permitirase na dita comisión a presencia dos representantes legais dos traballadores para que expoñan as súas opinións, non estando presente nas votacións.
b) Daráselles audiencia en materia de sancións e expedientes disciplinarios.
c) Informarase dos contratos de acordo coa lexislación vixente, facilitando copias básicas destes a tódalas seccións sindicais.
d) Da asignación de complementos, gratificacións, honores e distincións. Así mesmo, logo da petición, facilitaránselles resumos documentais de horas extras.
Artigo 42º
Os representantes dos traballadores terán a capacidade xurídica que o ordenamento lles outorgue para o exercicio das accións administrativas ou xudiciais que procedan no ámbito da súa competencia.
Artigo 43º
Recoñécese o dereito á folga. Ó persoal que exerza o seu dereito á folga deduciráselle como máximo as cantidades resultantes das seguintes formulas:
a) Desconto por hora=(soldo base mensual+antigüidade mensual)/(6 * xornada semanal).
b) Desconto por día=(soldo base mensual+antigüidade mensual)/30.
Artigo 44º
Os representantes legais dos traballadores non poderán ser discriminados na súa promoción profesional ou económica. Ningún deles poderá ser trasladado nin sancionado durante o exercicio das súas funcións nin dentro do ano seguinte á expiración da súa condición.
Cada delegado de persoal, así como o secretario das respectivas seccións sindicais e máis dos delegados sindicais disporán de 18 horas mensuais para a realización das súas actividades, coas seguintes especificacións:
a) Quedan fóra do cómputo as empregadas en negociación colectiva e nas reunións da comisión de seguimento.
b) A comunicación do seu uso realizarase con 24 horas de antelación, ou 48 horas se se ten traballo
a quenda, perante do servicio de persoal e no propio servicio. Caso de non o poder facer así respectaranse as necesidades do servicio pasando, posteriormente, notificación a persoal.
c) Tamén, coa antelación que sexa posible, os membros das comisións negociadoras comunicarán no seu servicio a dita ausencia.
d) Mensualmente, por decisións do sindicato ó que pertenzan, poderánse acumula-las horas dos traballadores presentes nos distintos órganos de representación, así como as dos delegados sindicais e mais as do secretario da sección sindical, nun ou varios compoñentes das seccións sindicais dando coñecemento con antelación suficiente ó Servicio de Persoal con expresión de quen acumula e de quen proceden.
Artigo 45º
Están autorizadas as xuntanzas e asembleas non centros de traballo fóra da xornada laboral.
Están autorizadas as reunións e asembleas nos centros de traballo dentro da xornada laboral ata un máximo de 36 horas anuais que corresponderán ás seccións sindicais.
Procurarase que a certificación de asembleas e reunións en xornada laboral coincida coa entrada ou saída dos traballadores.
Capítulo X
Formación profesional
Artigo 46º
O empregado municipal poderá acceder á realización de calquera curso de formación, perfeccionamento ou reciclaxe relacionado co seu posto de traballo convocado polo concello ou calquera outro organismo, respectándose o principio de igualdade de oportunidades.
A asistencia e superación dos cursos será tida en conta para a promoción.
Artigo 47º
Os gastos de asistencia a cursos serán aboados polo concello con cargo ás súas dispoñibilidades orzamentarias.
Os gastos dos cursos obrigatorios dos empregados públicos en prácticas para a toma de posesión serán integramente aboados polo concello.
Capítulo XI
Faltas e sancións
Artigo 48º.-Faltas e sancións.
O réxime disciplinario do persoal ó servicio do Concello da Rúa será o recollido na lexislación vixente para os funcionarios públicos, en especial o disposto no decreto da Xunta 94/1991, ou lexislación que o substitúa.
Disposicións adicionais
Primeira.-Estabilización do emprego. A totalidade das prazas vacantes ou cubertas en situación de precariedade, interinaxes, contratación laboral temporal, serán obxecto de obrigada convocatoria no 1999 coa finalidade de dotar de carácter permanente á relación de prestación de servicios profesionais no Concello da Rúa.
Segunda.-Recoñécese a condición de traballadores fixos-descontinuos a aqueles traballadores que veñan prestando servicios de carácter estacional cunha asiduidade superior a 3 anos.
Retribucións mensuais: ano 2000.
Establécese como táboa salarial para 2000 para as categorías existentes no cadro laboral as seguintes cantidades con cargo ó Concello da Rúa:
Categoría Soldo mes Soldo ano
Operario 124.559 1.743.826
Oficial de oficios 136.896 1.916.544
O oficial conductor e os operarios que presten servicio de recollida do lixo, así como o operario do centro de saúde, incrementarán as retribucións da súa categoría recollidas na anterior táboa salarial por concepto de recollida para outros concellos e actividades complementarias como mínimo nas contías que perciben na actualidade (50.000 ptas./mes), contías que manterán a consideración de cotizables á Seguridade Social.
Establécense para o caso de reclasificación profesional no cadro laboral existente ou de creación de novas prazas, as seguintes contías de referencia:
Categoría Soldo mes Soldo ano
Subalterno 127.768 1.788.752
Encargado 139.539 1.953.546
Auxiliar administrativo 133.119 1.863.666
Administrativo 139.539 1.953.546
Técnico medio 150.239 2.103.346
Técnico superior 160.939 2.253.146
Disposicións derradeiras
Primeira.-Para efectos do disposto no artigo 85 do Estatuto dos traballadores e segundo o recollido no artigo 87 do mesmo texto actúan como partes concertantes desde convenio o alcalde en representación do Pleno do Concello da Rúa e os delegados de persoal electos en representación do colectivo de traballadores laborais.
Segunda.-Para a renovación do convenio a parte que a promova procederá á súa denuncia dentro do último mes de vixencia, denuncia que se axustará ó disposto no vixente artigo 89.1º do Estatuto dos traballadores.
