A Consellería de Cultura, Comunicación Social e Turismo, consciente da necesidade dunha maior coordenación e revisión das súas publicacións, promove a creación dun Servicio de Estudios e Publicacións Culturais para un mellor cumprimento das necesidades da propia consellería nesta materia.
Dado o amplo ámbito de competencias (promoción e patrimonio culturais, comunicación social e turismo) da consellería e mailo seu inxente volume de traballo, resulta imprescindible a creación dunha praza para tal efecto que deberá estar adscrita á secretaría xeral.
Na súa virtude, por proposta do conselleiro de Cultura, Comunicación Social e Turismo, co informe previo dos conselleiros da Presidencia e Administración Pública e de Economía e Facenda e logo de deliberación do Consello da Xunta de Galicia na súa reunión do día vinte de xaneiro de dous mil,
DISPOÑO:
Artigo 1º
Engádese o punto 1.6º ó artigo 4 do Decreto 8/1998, do 8 de xaneiro, polo que se desenvolve a estructura orgánica da Consellería de Cultura, Comunicación Social e Turismo co seguinte teor:
«1.6 Servicio de Estudios e Publicacións Culturais.
Correspóndelle a este servicio as seguintes funcións:
a) Análise, estatísticas, elaboración de informes e propostas en relación coas publicacións da Consellería de Cultura, Comunicación Social e Turismo.
b) Coordenación e revisión das publicacións que, directa ou indirectamente, leva a cabo a Consellería de Cultura, Comunicación Social e Turismo, na súa competencia.
d) Estudio e análise dos proxectos relacionados coas publicacións programadas polas diversas unidades da consellería.
d) Todas aqueloutras que por disposicións legais ou regulamentarias poidan serlle atribuídas.».
Disposicións derradeiras
Primeira.-Facúltase o conselleiro de Cultura, Comunicación Social e Turismo para que dicte as normas complementarias que sexan precisas para o desenvolvemento do establecido neste decreto.
Segunda.-Este decreto entrará en vigor o día seguinte ó da súa publicación no Diario Oficial de Galicia.
Santiago de Compostela, vinte de xaneiro de dous mil.
Manuel Fraga Iribarne
Presidente
Jesús Pérez Varela
Conselleiro de Cultura, Comunicación Social e Turismo
