Por Orde do 15 de xullo de 1999 (DOG do 28 de xullo), aprobáronse as bases que rexen a convocatoria pública de axudas ós universitarios do Sistema Universitario de Galicia interesados en solicita-los créditos para financiamento dos seus estudios universitarios.

As solicitudes admitidas para participar nesta convocatoria foron estudiadas pola comisión avaliadora nomeada na propia orde de convocatoria, que elaborou a correspondente proposta de resolución.

En consecuencia, atendendo á citada proposta, esta consellería

RESOLVE:

Primeiro.-Facer pública a relación de posibles beneficiarios do préstamo subsidiado ós estudiantes unive

ritarios galegos de primeiro ciclo e de primeiro e segundo ciclo, correspondentes ó curso 1999-2000, que se relacionan no anexo desta orde, e sempre que se cumpran os requisitos do convenio asinado coas entidades financeiras, o que supón a cantidade de 1.661.600 pesetas, correspondentes á partida orzamentaria 07.05.322C.483.0 dos orzamentos xerais da Comunidade Autónoma de Galicia para o ano 1999.

Segundo.-As solicitudes que non figuran no anexo desta orde e que foron admitidas para participar neste concurso debe entenderse que quedan denegadas.

Terceiro.-Os posibles beneficiarios dos préstamos subsidiados desta convocatoria, que se relacionan no anexo desta orde, subscribirán os contratos de préstamo coas entidades financeiras (Banco Pastor, Caixa de Aforros de Galicia, Caixa de Aforros de Vigo, Caixa de Aforros de Pontevedra, Caixa de Aforros de Ourense, Banco Gallego, Banco Simeón e Banco Etcheverría) asinantes do convenio de colaboración coa Consellería de Educación e Ordenación Universitaria no prazo de quince días, contados desde o seguinte ó da súa publicación no Diario Oficial de Galicia.

Cuarto.-O incumprimento total ou parcial por parte dos posibles beneficiarios de calquera das condicións establecidas na orde de convocatoria do 15 de xullo de 1999 constituirá causa determinante de revogación da axuda e do seu reintegro polo beneficiario ou solicitante, segundo o disposto no artigo 78.6º da Lei 11/1992, de réxime xurídico financeiro e orzamentario de Galicia.

Quinto.-Contra esta orde, que esgota a vía administrativa, os interesados poderán interpoñer recurso potestativo de reposición perante o conselleiro de Educación e Ordenación Universitaria no prazo dun mes a partir do día seguinte ó da súa publicación no DOG, segundo o disposto nos artigos 116 e 117 da Lei 4/1999 (BOE do 14 de xaneiro), de modificación da Lei 30/1992, de réxime xurídico das administracións públicas e do procedemento administrativo común, ou ben directamente o recurso contencioso-administrativo no prazo de dous meses perante o Tribunal Superior de Xustiza de Galicia.

Disposición derradeira

Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 22 de novembro de 1999.

Celso Currás Fernández

Conselleiro de Educación e Ordenación Universitaria

ANEXO

AXUDAS ÓS ESTUDIANTES UNIVERSITARIOS DO SISTEMA UNIVERSITARIO DE GALICIA INTERESADOS EN SOLICITA-LOS CRÉDITOS PARA FINANCIAMENTO DOS SEUS ESTUDIOS UNIVERSITARIOS