Para axiliza-la tramitación burocrática, en beneficio dos administrados, sen mingua da necesaria garantía xurídica e sen esquece-lo debido respecto ós principios que forman a actividade administrativa e que a Constitución recolle no artigo 103.1º, faise necesario delegar nos delegados territoriais a resolución de expedientes en materia de prórrogas dos títulos habilitantes de establecementos de cultivos mariños e auxiliares, función legalmente atribuída ó conselleiro, dando deste modo solución ós pro

blemas que presenta a concentración de competencias da Consellería de Pesca, Marisqueo e Acuicultura no seu titular.

Na súa virtude, e facendo uso das facultades que me confiren os artigos 38, 43.3º e 44 da Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro, do disposto no artigo da Lei 30/1992, do 26 de novembro, modificada pola Lei 4/1999, do 13 de xaneiro, de réxime xurídico das administracións públicas e do procedemento administrativo común, e demais disposicións de xeral aplicación,

DISPOÑO:

Artigo 1º

Deléganse nos delegados territoriais as seguintes competencias:

A) A resolución dos expedientes en materia de prórrogas de concesións de viveiros de cultivos mariños nas augas de Galicia, de acordo co artigo 59 da Lei 6/1993, do 11 de maio, de pesca de Galicia (DOG nº 101) e artigo 13 do Decreto 406/1996, do 7 de novembro, polo que se aproba o Regulamento de viveiros de cultivos mariños nas augas de Galicia (DOG nº 228).

B) A resolución dos expedientes en materia de prórrogas de concesións de establecementos de cultivos mariños na zona marítimo-terrestre, de acordo co artigo 55 da Lei 6/1993, de pesca de Galicia.

C) A resolución dos expedientes en materia de prórrogas de permisos de actividades de establecementos de acuicultura e auxiliares na zona terrestre, de acordo co artigo 66 da Lei 6/1993, de pesca de Galicia, e o artigo 3 do Decreto 193/1997, polo que se determinan as condicións para o outorgamento do permiso de actividade para establecementos de cultivos mariños e auxiliares situados na zona terrestre (DOG nº 142).

Artigo 2º

As resolucións administrativas que se adopten facendo uso das delegacións contidas nesta orde farán constar expresamente esta circunstancia e consideraranse dictadas pola autoridade que as conferiu.

Artigo 3º

O conselleiro poderá, en calquera momento, reclama-lo exercicio das facultades delegadas nesta orde.

Disposición derradeira

Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 14 de outubro de 1999.

P.O. (Orde 17-12-1997, DOG nº 246

do 22 de decembro)

Juan José Álvarez Pérez

Secretario xeral da Consellería de Pesca,

Marisqueo e Acuicultura