Advertidos erros materiais e conceptuais na devandita orde, publicada no Diario Oficial de Galicia do 24 de agosto de 1999, cómpre face-las oportunas rectificacións, para o cal

DISPOÑO:

Artigo 1º.-Corrixir no artigo 18º.2 Caza maior (páxina 10.564), que onde di: «f)», deberá dicir: «b)», e onde di: «g)», deberá dicir: «c)».

Artigo 2º.-No artigo 8º.4. (páxina 10.560) ó final do parágrafo, deberase engadir: «Sen embargo nas provincias da Coruña, Ourense e Pontevedra e só nos coutos de caza maior ou de menor con aproveitamento complementario de caza maior autorizado para a especie xabaril, poderase portar bala dentro do período hábil establecido con carácter xeral, en previsión de que se lle poida disparar a esta especie».

Artigo 3º.-No artigo 13º.-Métodos e modalidades de caza. (páxina 10.562) deberase engadi-lo punto: «9. Defínense as modalidades de caza de gancho e montería do seguinte xeito:

Gancho: lance cinexético colectivo cun mínimo de dez e un máximo de trinta cazadores en postos que poden variarse durante o lance; acompañados dun máximo de trinta cans en dous grupos como máximo; os cans poden ir na compaña de cazadores. Montería: diferénciase do gancho en que os postos son sempre fixos, os cans poden ir en grupos de ata 22 cans; as persoas que dirixen os cans deben ir desarmadas e pode haber batedores desarmados».

Artigo 4º.-No artigo 18º.2 Caza maior: b) (páxina 10.564) no parágrafo terceiro, onde di: «..., poderá cazarse na modalidade de gancho ou montería...», deberá dicir: «..., poderá cazarse:

b.1) Na modalidade de gancho ou montería, autorizada segundo o establecido no artigo 13º desta orde, os xoves, sábados, domingos e festivos, entre o 5 de setembro de 1999 e o 6 de xaneiro do 2000.

b.2) Durante a celebración de todo tipo de cacerías desde o 17 de outubro de 1999 ata o 6 de xaneiro de 2000, os xoves, domingos e festivos, pero non os sábados, nas provincias da Coruña, Ourense e Pontevedra, e baixo a responsabilidade da sociedade titular do couto, que terá que lle comunicar ó Servicio Provincial de Medio Ambiente Natural os resultados das pezas abatidas desta especie nun prazo máximo de 15 días despois de rematado o período hábil.».

Artigo 5º.-No artigo 19º.3 Ourense (páxina 10.567) deberanse engadi-las letras:

«l) Queda prohibido o exercicio da caza nos terreos que comprenden o monte veciñal en man común San Mamede e Ferradura, dos veciños de Riobó, desde a confluencia do regato de Quintela co río Arnoia, en liña recta ata o alto de Paradiña, no termo municipal de Vilar de Barrio.

m) Queda prohibido o exercicio da caza nos terreos que comprenden o monte veciñal en man común de Lomba, Candás e Rebordiño, dos veciños de Arruás, no termo municipal de Vilar de Barrio.

n) Queda prohibido o exercicio da caza nos terreos que comprenden os montes veciñais en man común de San Mamede de Prado e Candás, da parroquia de Prado, no termo municipal de Vilar de Barrio.

ñ) Queda prohibido o exercicio da caza nos terreos particulares de Riobó, Arruás e Prado, no termo municipal de Vilar de Barrio».

Santiago de Compostela, 11 de outubro de 1999.

José Carlos del Álamo Jiménez

Conselleiro de Medio Ambiente