A fórmula da delegación competencial é utilizada polas administracións públicas co fin de conseguir unha maior axilización no trámite e resolución dos asuntos administrativos, en beneficio tanto do funcionamento da Administración como dos administrados.
Unha vez publicada a Lei 5/1999, do 21 de maio, de ordenación farmacéutica, e tendo en conta o seu fin principal, como é o de garantirlles ós cidadáns de Galicia un acceso rápido, oportuno e equitativo á atención farmacéutica que necesiten, a experiencia aconsella neste momento delegar nos Colexios Oficiais de Farmacéuticos a tramitación de determinados expedientes.
Todo isto sen esquece-lo debido respecto ós principios informadores do procedemento administrativo e sen menoscabo das garantías xurídicas establecidas.
Na súa virtude, facendo uso das facultades que me confire o artigo 38 da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 20 de outubro, tendo en conta o disposto no artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común, e logo de conformidade dos Colexios Oficiais de Farmacéuticos
DISPOÑO:
Artigo único
Delégase nos Colexios Oficiais de Farmacéuticos da Coruña, Lugo, Ourense e Pontevedra:
1. A tramitación e proposta de resolución dos seguintes expedientes en relación coas oficinas de farmacia:
a) Autorización de novas oficinas, unicamente ata o momento procedemental da proposta de resolución de autorización nos municipios que poidan contar con novas oficinas de farmacia, segundo o disposto
na Lei 5/1999, do 21 de maio, de ordenación farmacéutica.
b) Autorización de locais para apertura e posta en funcionamento.
c) Traslado e modificación de locais.
d) Transmisión e peche.
2. A tramitación e autorización dos nomeamentos de rexente, substituto e adxunto de oficinas de farmacia, sen prexuízo de que a toma de posesión dos interesados se efectúe ante os órganos competentes da Consellería de Sanidade e Servicios Sociais.
3. O establecemento, nos termos previstos na normativa de aplicación, de horarios, quendas de servicios de urxencia e vacacións das oficinas de farmacia, sen prexuízo da correspondente comunicación á Consellería de Sanidade e Servicios Sociais, a través da División de Farmacia e Productos Sanitarios do Sergas.
Disposición derradeira
A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 26 de agosto de 1999.
José María Hernández Cochón
Conselleiro de Sanidade e Servicios Sociais