A EGAP, dentro do programa operacional europeo Interreg-II para 1999, organiza un seminario galego-luso sobre formas de xestión dos servicios públicos locais.

Colaboran nesta actividade, co patrocinio da Comunidade de Traballo Galicia-Norte de Portugal as seguintes institucións:

-A Dirección Xeral de Xustiza e Administración Local da Xunta de Galicia.

-A Direcção Regional de Administração Autárquica do Norte de Portugal.

-O Instituto de Gestão e Administração Pública do Porto.

-A Deputación Provincial de Lugo.

1. Obxectivos.

Mellora-lo coñecemento dos asistentes sobre as modalidades xestoras dos servicios públicos locais, desde a perspectiva da lexislación galega e portuguesa, a través dun intercambio de experiencias entre expertos de ámbalas dúas comunidades.

2. Contido.

Trataranse estes temas:

-As concesións administrativas. Situación actual.

-As empresas de economía mixta actual.

-A cooperación transfronteiriza: experiencias actuais.

-Os contratos na Administración local: obras concertadas, servicios e bens.

-A contratación da xestión de servicios públicos locais: o caso de Portugal.

-As empresas públicas municipais: modelo xurídico portugués.

3. Destinatarios.

Persoal ó servicio de calquera das administracións públicas galegas e portuguesas, e interesados en xeral.

4. Desenvolvemento.

-Horario: mañá e tarde.

-Lugar e datas: o seminario convocado desenvolverase no salón de sesións da Deputación Provincial de Lugo (r/ San Marcos s/n, da citada cidade), os días 22 e 23 de setembro de 1999.

5. Inscrición.

-Prazo: remata o luns, día 20 de setembro de 1999.

-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 37.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión chamando, o día 21 de setembro, por teléfono, de 10 a 14.45 horas, ós seguintes números: 981 54 62 39 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento do seminario, así como a de cancelalo, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate deste seminario, a aquelas persoas inscritas que concorresen asiduamente a el, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 31 de agosto de 1999.

Domingo Bello Janeiro

Director da Escola Galega de Administración

Pública