No uso das atribucións recollidas no artigo 3º da Lei 10/1996, do 5 de novembro (DOG nº 227, do 20 de novembro), o padroado da Fundación Pública Hospital da Barbanza acordou a aprobación do cadro de persoal facultativo do centro, así como a convocatoria das correspondentes probas de selección de persoal facultativo, con respecto ós principios de igualdade, mérito, capacidade e publicidade, segundo determina o artigo 2º da citada lei.
Na súa virtude, esta dirección fai pública a convocatoria da selección do persoal facultativo, conforme as seguintes bases:
Prazas convocadas:
Especialidade Número Referencia
Análises clínicas 1 ACL
Anestesia e reanimación 3 ANE
Dixestivo 1 DIG
Xinecoloxía e obstetricia 1 GIN
Hematoloxía 1 HEM
Medicina interna 2 MIR
Nefroloxía 1 NEF
Pediatría 1 PED
Radioloxía 2 RAD
Rehabilitación 1 REH
Traumatoloxía 2 TRA
Titulación requirida: a licenciatura e maila especialidade esixida legalmente para o desempeño de cada unha das prazas convocadas.
Tipo de contrato: a contratación do persoal que resulte seleccionado someterase ó disposto no R.D. 8/1997, do 16 de maio, en materia de fomento da contratación indefinida, e tamén ó disposto no artigo 15.1º do Estatuto dos traballadores.
Procedemento de selección: consistirá, en primeiro lugar, nunha proba eliminatoria sobre un suposto clínico correspondente a cada especialidade. A proba superarase coa cualificación de apto.
Os candidatos cualificados como aptos participarán na segunda fase, consistente na valoración que se deduza dos méritos e da entrevista persoal. Previamente publicarase o baremo polo que serán avaliados os méritos, que consistirán na experiencia e formación.
Coa puntuación obtida, de acordo co baremo dos méritos e a que resulte da entrevista, ponderadas nun 50% respectivamente, confeccionarase unha lista final por orde da puntuación alcanzada por cada aspirante.
A FPHB reserva para si o dereito de seleccionar un número de aspirantes superior ó de prazas convocadas en cada especialidade, seguindo na elección a orde da lista final, así como o dereito de declarar deserta algunha das prazas convocadas.
A selección, de conformidade co disposto no artigo 4 de Lei 10/1996, do 5 de novembro (DOG 227, do 20 de novembro), será efectuada por unha comisión técnica designada para o efecto. Esta comisión reserva para si o dereito de realizar outras probas accesorias que considerase pertinentes.
Inicio das probas: as probas non se realizarán antes dun mes desde que se publique esta convocatoria, de acordo co disposto no artigo 4 da Lei 10/1996.
Dereitos de exame: os candidatos deberán aboar 2.000 ptas en concepto de dereitos de exame na conta do BBV nº 0182-5947-13-0010222224.
Solicitude de participación: para participar neste proceso deberá remitirse a solicitude do interesado dirixida á Fundación Pública Hospital da Barbanza, parroquia de Oleiros, 15993-Ribeira (A Coruña), no prazo improrrogable de vinte días desde a publicación do presente anuncio, indicando no sobre a referencia da praza á que se opta. Débese achegar unicamente o xustificante do pagamento dos dereitos do exame, copia compulsada do título esixido e maila fotocopia do DNI.
A documentación xustificativa dos méritos alegados deberase achegar no momento da realización da proba escrita.
Exclusións e reclamacións: o non reuni-los requisitos mínimos, a falta de pagamento dos dereitos de exame, a insuficiente identificación ou o pagamento dos dereitos de exame fóra do período establecido para isto dará lugar á exclusión do proceso de selección, sen posibilidade de reclamación.
Incorporación: os candidatos seleccionados incorporaranse de forma gradual segundo as necesidades dos servicios do hospital e logo da superación do recoñecemento médico que os faculte para o desempeño da praza.
Teléfono de información: 981 83 59 87.
Ribeira, 22 de xullo de 1999.
Blanca García Varela
Directora da Fundación Pública Hospital
da Barbanza