O Decreto 229/1997, do 25 de agosto (DOG nº 165, do 28 de agosto, c. e. DOG nº 167, do 1 de setembro e nº 170, do 4 de setembro), dispón, no seu artigo 1, que a xestión e administración dos hospitais Virxe da Xunqueira e da Barbanza se realizará, respectivamente, a través das fundacións públicas denominadas Fundación Pública Virxe da Xunqueira e Fundación Pública Hospital da Barbanza.
Para tal fin, é preciso formalizar unha vinculación xurídica entre as instalacións dos hospitais, propiedade do Servicio Galego de Saúde e as fundacións, considerando que o máis idóneo é acudir á figura da adscrición.
Á vista do disposto nos artigos 13 da Lei 3/1985, do 12 de abril, do patrimonio da Comunidade Autónoma de Galicia, e 20 e seguintes do Decreto 50/1989, do 9 de marzo, polo que se aproba o regulamento para a execución da Lei 3/1985 e de conformidade coa proposta do conselleiro de Sanidade e Servicios Sociais e presidente do Servicio Galego de Saúde e logo de deliberación do Consello da Xunta de Galicia na súa reunión do día dezasete de xuño de mil novecentos noventa e nove,
DISPOÑO:
Artigo 1º
Adscríbense as instalacións dos hospitais Virxe da Xunqueira e da Barbanza a favor das fundacións públicas Virxe da Xunqueira e da Barbanza, respectivamente, para a súa xestión e administración de conformidade co previsto no Decreto 229/1997, do 25 de agosto.
Artigo 2º
A adscrición confírelles ás fundacións públicas as facultades de administración, xestión e conservación dos bens de dominio público adscritos, sen que supoña cambio na titularidade ou cualificación xurídica dos bens.
Disposición derradeira
O Servicio Galego de Saúde, a través do seu órgano competente, levará a cabo os trámites necesarios para a efectividade de canto se dispón neste decreto.
Santiago de Compostela, dezasete de xuño de mil novecentos noventa e nove.
Manuel Fraga Iribarne
Presidente
José María Hernández Cochón
Conselleiro de Sanidade e Servicios Sociais