O Instituto Galego de Promoción Económica, Igape, convoca probas de selección para cubrir 4 prazas de técnicos superiores, de persoal laboral fixo para a Área de Promoción. O traballo poderá desenvolverse total ou parcialmente en calquera das oficinas do Igape, incluídas as oficinas no exterior, polo que os interesados deberán ter plena dispoñibilidade para viaxar e/ou fixa-la súa residencia en calquera país.
Retribucións:
En España: 3.807.664 ptas. brutas anuais.
No exterior: ata 7.635.000 ptas. brutas anuais, en función do país de destino.
Requisitos xerais.
-Ter nacionalidade dun país membro da Unión Europea.
-Ter cumpridos os 18 anos de idade.
-Non padecer enfermidade ou defecto físico que impida desempeña-las funcións correspondentes.
-Non estar separado do servicio de ningunha Administración pública en virtude de expediente disciplinario, nin atoparse inhabilitado por sentencia firme para o exercicio das funcións públicas.
Experiencia laboral, mínimo un ano ou ter sido bolseiro no exterior por un período mínimo dun ano.
-Posuír e acredita-la licenciatura universitaria ou equivalente (homologada polo Ministerio de Educación, no caso de títulos expedidos por un país que non sexa membro da Unión Europea).
Áreas de coñecementos esixidas.
-Igape: obxectivos, actuacións, funcionamento.
-Contorno xeral do sistema productivo de Galicia.
-Contorno específico da empresa galega.
-Empresa galega. Análise interna.
-Mercados e productos: mercados de interese para a empresa e productos de Galicia. Os productos de Galicia ante o mercado mundial. Productos do mercado mundial de interese para Galicia.
-Sistema de apoio á empresa galega. Especial referencia ás axudas do Igape.
-Comercio internacional.
-Medios de pagamento e cobramento. Mercados de futuro e financiamento das operacións de comercio exterior.
-Aspectos legais e fiscais do investimento estranxeiro en España.
-Coñecementos informáticos a nivel de usuario: Word, Excel e manexo de Internet.
-Moi bo nivel falado e escrito dalgún dos seguintes idiomas: inglés, xaponés, alemán ou portugués.
-onstitución española.
-Estatuto de autonomía de Galicia.
-Lei da Xunta e do seu presidente.
Experiencia:
Imprescindible experiencia acreditada mínima dun ano en temas afíns ós coñecementos esixidos.
Valoraranse:
-Experiencia e dotes comerciais.
-Coñecementos doutros idiomas.
-Coñecementos económicos do país ó que se faga referencia.
Documentación que hai que presentar:
-Solicitude segundo modelo oficial (modelo anexo I).
-Fotocopia do documento nacional de identidade.
-Fotografía tamaño carné.
-Documentación orixinal ou fotocopia compulsada que acredite a situación e experiencia esixida.
-Currículum vitae demostrable.
Lugar e prazo de presentación:
-As solicitudes (segundo modelo que se inclúe no anexo I) e demais documentación presentaranse en calquera das oficinas do Igape ou nas oficinas previstas no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.
-O prazo de presentación será de 21 días hábiles (excluídos domingos e festivos), contados a partir do día seguinte ó da públicación desta resolución no Diario Oficial de Galicia.
Proceso de selección:
1. Rematado o prazo de presentación de solicitudes, o comité de selección designado publicará as listas previas de admitidos e excluídos ó proceso selectivo, co motivo da exclusión, se é o caso. Se a solicitude non reúne os requisitos esixidos requirirase o interesado para que, nun prazo de dez días hábiles (excluídos domingos e festivos), emende a falta ou xunte os documentos preceptivos.
Transcorrido o dito prazo, publicaranse nos taboleiros de anuncios do Igape as listas definitivas de admitidos e excluídos ó proceso de selección, con indicación de lugar e data en que darán comezo as probas, ás que deberán asisti-los candidatos provistos do DNI.
2. O proceso de selección consistirá nas seguintes probas:
a) Proba teórico-práctica:
a.1) Consistirá nun exame oral e escrito do idioma ou idiomas elixidos.
Esta proba terá carácter eliminatorio.
a.2) Consistirá nun exame escrito sobre os coñecementos referidos nesta convocatoria.
Esta proba terá carácter eliminatorio.
b) Entrevista persoal:
Avaliarase o currículum do candidato, ademais da adecuación do posto de traballo.
Os resultados de tódalas fases do proceso selectivo publicaranse nos taboleiros de anuncios do Igape.
3. Rematado o proceso anterior, o comité de selección elevará ó director xeral do Igape a lista dos candidatos seleccionados, que será publicada nos taboleiros de anuncios do Igape. Nos contratos que se formalicen establecerase un período de proba de 6 meses.
Recurso:
Contra esta resolución, que non pon fin á vía administrativa, os interesados poderán interpoñer recurso de alzada ante o conselleiro de Economía e Facenda no prazo dun mes (artigos 107.1º e 114 da Lei 30/1992, de réxime xurídico das administracións públicas e do procedemento administrativo común).
Santiago de Compostela, 3 de xuño de 1999.
Diego Diz Fernández
Director xeral do Instituto Galego de Promoción
Económica
