O Concello Pleno, en sesión ordinaria celebrada o día 26 de marzo de 1999, aprobou definitivamente o Plan Parcial do Parque Empresarial de Penapurreira.

A eficacia do acto de aprobación definitiva da presente modificación e a súa entrada en vigor queda condicionada á comunicación deste acordo á Consellería de Política Territorial, Obras Públicas e Vivenda e á recepción da copia adverada do expediente completo e da demais documentación especificada no artigo 48.3º da Lei 1/1997, do 24 de marzo, do solo de Galicia, así como á publicación das súas normas e ordenanzas consonte o disposto na lexislación de réxime local.

Contra o acto de aprobación definitiva, que pon fin á vía administrativa, poderase interpor potestativamente recurso de reposición perante o Pleno do Concello no prazo dun mes contado desde o día seguinte ó da última publicación no Diario Oficial de Galicia ou no BOP. Alternativamente, o acto de aprobación definitiva poderá impugnarse directamente en vía xudicial mediante a interposición de recurso contencioso-administrativo perante o Tribunal Superior de Xustiza de Galicia, no prazo de dous meses contados desde o día seguinte ó da última publicación no Diario Oficial de Galicia ou no BOP.

No suposto de que se interpoña recurso administrativo de reposición, non poderá interpoñerse recurso contencioso-administrativo ata que non se resolva expresa ou presuntamente o de reposición. En tal caso, o prazo para interpoñe-lo recurso contencioso-administrativo contarase desde o día seguinte a aquel en que se notifique a resolución expresa do de reposición ou no que este deba entenderse presuntamente rexeitado. Neste último caso, o prazo para interpoñe-lo recurso contencioso-administrativo é de seis meses.

O que se fai público en cumprimento do disposto no artigo 48 da Lei 1/1997, do 24 de marzo, do Solo de Galicia.

As Pontes de García Rodríguez, 19 de maio de 1999.

Vicente López Pena

Alcalde-presidente