María Esther Álvarez Martínez, secretaria xeral do Concello de Arteixo (A Coruña),

Certifica que a Comisión de Goberno, en sesión ordinaria do un de marzo de mil novecentos noventa e nove adoptou, entre outros, o seguinte acordo:

4.-Dictames e adopción de acordos da Comisión Informativa de Urbanismo e Medio Ambiente, correspondente ó día 23 de febreiro de 1999.

Proxectos de urbanización.

Aprobación inicial:

Dáse conta do expediente 7/99 PUR, promovido por Javier Nogueiras Mascarenhas, en representación de Neisa, Grupo Riofisa, División Residencial, presentando escrito con número de rexistro de entrada 1.096 do 1 de febreiro de 1999 ó que se achega proxecto de urbanización do Plan parcial A Zapateira, 1, na Zapateira-Arteixo, redactado polo arquitecto Javier Nogueiras Mascarenhas.

Atendido que no expediente incoado para o efecto constan informes favorables xurídico e técnico emitidos pola secretaria xeral deste concello e polo arquitecto municipal, respectivamente, ámbolos dous con data do 23 de febreiro de 1999.

A Comisión de Goberno, examinado o expediente, tomando en consideración os informes favorables do arquitecto municipal e da secretaria xeral, e visto o R.D.L. 1/1992, do 26 de xuño, no non derrogado pola Lei 6/1998, do 13 de abril, o Regulamento de planeamento urbanístico, a Lei 1/1997, do 24 de marzo, a Lei 7/1997, do 14 de abril, no non derrogado pola Lei 6/1998, do 13 de abril, o vixente texto refundido das normas subsidiarias de planeamento deste termo municipal e demais normativa de xeral e pertinente aplicación, e visto, así mesmo, o dictame emitido pola comisión informativa, en votación ordinaria e por unanimidade, acorda:

Primeiro.-Aprobar inicialmente o proxecto de urbanización, promovido por Javier Nogueiras Mascarenhas, en representación de Neisa, Grupo Riofisa, División Residencial, que ten por obxecto a urbanización do Plan parcial A Zapateira I-Arteixo, segundo proxecto redactado polo arquitecto Javier Nogueiras Mascarenhas.

Segundo.-Abrir trámite de información pública, anunciando no Diario Oficial de Galicia e nun dos diarios de maior circulación da provincia.

Terceiro.-Notificarlle o contido deste acordo ó propietario único directamente afectado.

Cuarto.-Aprobar provisionalmente a liquidación da taxa con que resulta gravado este proxecto de urbanización de acordo co seguinte detalle: taxa: 834.225 ptas. (O. fiscal nº 10). Pendente de pagamento.

E para que así conste para os efectos oportunos, expido esta orde e con visto e prace do alcalde, en Arteixo o quince de marzo de mil novecentos noventa e nove.

María Esther Álvarez Martínez

Secretaria xeral

Visto e prace

Manuel Pose Miñones

Alcalde-presidente