As modificacións introducidas no Real decreto 939/1986, do 25 de abril, polo que se regula o Regulamento xeral da inspección dos tributos, polo Real decreto 1930/1998, do 11 de setembro, como consecuencia da entrada en vigor da Lei 1/1998, do 26 de febreiro, de dereitos e garantías dos contribuíntes, esixe a aprobación de novos modelos de
actas, co fin de que o procedemento inspector se adecue á normativa vixente.
En consecuencia,
RESOLVO:
Primeiro.-A Inspección dos tributos redactará as súas actas nos modelos oficiais aprobados para o efecto por esta resolución e que se insiren como anexos I, II y III nela.
Segundo.-A Inspección dos tributos poderá utilizar programas informáticos para a confección das actas de inspección.
O papel sobre o que se redactan as actas levará impreso sobre o anverso o escudo da Facenda galega. Na súa parte superior figurará o logotipo da Consellería de Economía e Facenda.
Terceiro.-O contido das actas de inspección que se confeccionen utilizando programas informáticos incorporarase a follas separadas. As ditas follas irán numeradas consecutivamente e o seu número será variable, en función da extensión da acta. En cada folla farase consta-la identidade dos obrigados tributarios: nome e apelidos ou razón ou denominación social completa e número de identificación fiscal, e na primeira, ademais, o enderezo tributario do interesado. Así mesmo, constará o número que con carácter único se asigne a cada acta para a súa identificación, e as mencións que se relacionan na alínea 2 do artigo 49 do Regulamento xeral da inspección dos tributos.
Os espacios que nos modelos oficiais que aproba esta resolución figuran en branco ou punteados terán a extensión variable que en cada momento sexa precisa, en función do texto que se incorpore ós ditos espacios.
Cando as actas se redacten sen a presencia dos interesados, a redacción do encabezamento delas poderá adaptarse a esta circunstancia. Igualmente, no caso de que comparecendo os interesados se neguen a subscribi-las actas, tal circunstancia farase constar expresamente nelas, manifestando se reciben ou non un exemplar.
Cuarto.-Cando as actas do modelo A01 sexan con descubrimento de débeda, a Inspección entregará ó comparecente os documentos necesarios para realiza-lo ingreso, os cales se poderán confeccionar igualmente utilizando programas informáticos.
Quinto.-A Inspección, cando utilice os ditos modelos, observará os criterios e instruccións recollidos no anexo IV desta resolución.
Sexto.-As actas da inspección dos tributos redactaranse por duplicado ou triplicado, entregándose ou achegándose, segundo o caso, un exemplar ó comparecente.
Sétimo.-Esta resolución será de aplicación desde o día seguinte ó da súa publicación no Diario Oficial de Galicia.
Santiago de Compostela, 12 de febreiro de 1999.
María Casais Mira
Directora xeral de Tributos
ANEXO IV
Primeiro. Actas modelo A01.
1. A Inspección dos tributos utilizará el modelo A01 para redacta-las actas que procedan cando o suxeito pasivo, retedor ou responsable solidario preste a súa conformidade coa proposta de liquidación practicada na acta pola Inspección e non procede utiliza-lo modelo A06.
2. Cando a acta sexa de conformidade e con descubrimento de débeda, co exemplar duplicado da acta faráselle entrega ó interesado dos documentos de ingreso precisos para efectua-lo pagamento da débeda tributaria.
3. No espacio situado no ángulo superior da acta farase constar, no primeiro lugar o enderezo da delegación territorial, e no segundo lugar, o órgano actuante que corresponda.
4. A identidade dos actuarios que subscriban a acta constará no espacio inferior da cabeceira da acta para os efectos de identificación, recolléndose os dous apelidos e o nome, así como o número de rexistro de persoal de cada un.
No campo denominado «Período» da dita cabeceira inserirase o ano natural que comprenda o período impositivo comprobado nos impostos sobre o patrimonio das persoas físicas, taxa fiscal sobre o xogo, imposto sobre contaminación atmosférica ou canon de saneamento.
Nos demais tributos farase consta-lo ano natural correspondente á data do devengo.
5. Na alínea 1 da acta farase consta-la situación dos libros ou rexistros obrigatorios do interesado, só cando o suxeito pasivo ou retedor sexa empresario ou profesional, e exclusivamente respecto dos tributos nos que teña incidencia.
6. Na alínea 2 da acta, e respecto das actuacións iniciadas con posterioridade á entrada en vigor da Lei 1/1998, do 26 de febreiro, de dereitos e garantías dos contribuíntes, indicarase a data de inicio das actuacións e farase constar, de se-lo caso, a existencia de dilacións imputables ó contribuínte, interrupcións xustificadas, así como a procedencia, tamén de se-lo caso, de amplia-lo prazo xeral de duración das actuacións.
7. No punto 3 da acta recolleranse os feitos e elementos con transcendencia para a comprobación da situación tributaria do interesado que resultase das actuacións inspectoras, e estableceranse, así mesmo, as consecuencias de dereito que aqueles feitos ou circunstancias supoñan para a regularización da situación tributaria do suxeito pasivo ou retedor.
Neste punto 3, cando a acta sexa previa, farase consta-la natureza, as circunstancias determinantes da súa incoación con tal carácter e os elementos do feito impoñible ou da súa valoración a que se estendese xa a comprobación inspectora. Así mesmo, farase constar neste punto se presentase alegacións o suxeito comprobado, efectuando unha valoración destas. Tamén farase constar, de se-lo caso, as circunstancias que xustifiquen a actuación directamente co seu responsable solidario.
En todo caso, o contido deste punto, en canto á explicitación dos feitos recollidos na acta e o desenvolvemento dos argumentos de dereito expostos nesta, poderá completarse mediante a emisión polos actuarios dun informe.
8. Unha vez incorporado ó punto 3 da acta o contido a que se refire o número anterior, se a Inspección estimase que non existen motivos para proceder á apertura de procedemento sancionador, farao constar así neste punto.
9. No punto 4 da acta recollerase o detalle numérico da proposta de liquidación que resulte da regularización da situación tributaria do interesado polos conceptos a que a acta se refire, con expresión dos incrementos ou alteracións das bases, deduccións e cotas tributarias. No recadro inferior do punto recolleranse os importes que sintetizan a composición da débeda resultante da liquidación derivada da acta.
10. No espacio en branco do punto 5 indicarase o carácter provisional ou definitivo da liquidación da cal a súa proposta se incorpora á acta.
11. No espacio en branco do punto 6 servirá para sinala-lo titular do órgano actuante da Inspección que poida dicta-las liquidacións e demais actos administrativos.
12. No punto 7 cúmprese o disposto na letra b) do punto 1 do artigo 124 de Lei xeral tributaria e na letra i) do punto 2 do artigo 49 do Regulamento xeral da inspección dos tributos, polo cal se deberá indica-lo órgano actuante perante o que proceda recurso de reposición contra a liquidación que resulte da acta e, de se-lo caso, os lugares de presentación, ou o Tribunal Económico-Administrativo en concreto perante o cal poida interporse reclamación económico-administrativa.
13. No espacio en branco do punto 8 expresarase o carácter previo ou definitivo da acta.
14. A Inspección poderá redactar unha única acta por cada tributo ou concepto impositivo, pero referíndose a todo o período obxecto de comprobación, co obxecto de que a débeda resultante do conxunto dos exercicios integrantes do devandito período se determine mediante a suma alxébrica das liquidacións referidas ós distintos exercicios.
Segundo. Actas modelo A02.
1. A Inspección dos tributos utilizará o modelo A02 para redacta-las actas que procedan cando o suxeito pasivo, retedor ou responsable solidario non preste a súa conformidade coa proposta de liquidación practicada na acta pola Inspección. Este modelo utilizarase tamén para as actas de comprobado e conforme, cando o suxeito pasivo, retedor ou obrigado a efectuar ingresos á conta non preste a súa conformidade, por entender que non era correcta a liquidación por el practicada, de acordo coa alínea 3 do artigo 52 do Regulamento xeral da inspección dos tributos.
2. Para a formalización das actas que proceda redactar utilizándose este modelo A02 observaranse as instruccións recollidas nos números 3 a 7, ámbolos dous inclusive, e 14 do punto primeiro deste anexo.
3. Na alínea 5 da acta recolleranse as manifestacións do interesado relativas ó alcance da súa desconformidade respecto da proposta de liquidación contida
na acta, sen prexuízo do seu dereito a formular oportunamente cantas alegacións estime convenientes.
4. No espacio en branco do punto 6 indicarase o órgano actuante da Inspección dos tributos perante o que han de formularse as alegacións a través da unidade administrativa que en cada caso proceda.
Cando, conforme a normativa vixente, as liquidacións tributarias e demais actuacións administrativas deban ser dictadas polo xefe do Servicio Territorial de Inspección doutra delegación, farase constar, expresamente, a posibilidade de presenta-las alegacións indistintamente en calquera de ámbolos dous servicios territoriais.
5. No espacio en branco do punto 7 indicarase o titular do órgano actuante da Inspección que teña a condición de inspector xefe, para os efectos de dicta-la liquidación ou o acto administrativo que proceda.
Terceiro. Actas modelo A06.
1. Cando a Inspección dos tributos estime correcta a situación tributaria do suxeito pasivo, retedor ou obrigado a efectuar ingresos á conta farao constar en acta, utilizando precisamente este modelo se o interesado presta a súa conformidade coa proposta de liquidación que se lle formula, elevando a definitiva a liquidación por el practicada. Así mesmo, utilizarase este modelo de acta cando o suxeito pasivo non estivese obrigado a presentar declaración de acordo coas disposición reguladoras do correspondente tributo.
2. Para a formalización destas actas de comprobado e conforme será de aplicación o previsto nos números 3 e 4 do punto primeiro deste anexo.
3. No punto 1 da acta, e respecto das actuacións iniciadas con posterioridade á entrada en vigor da Lei 1/1998, do 26 de febreiro, de dereitos e garantías dos contribuíntes, indicarase a data de inicio das actuacións e farase constar, de se-lo caso, a existencia de dilacións imputables ó contribuínte, interrupcións xustificadas, así como a procedencia, tamén de se-lo caso, de amplia-lo prazo xeral de duración das actuacións.
4. No punto 2 da acta os actuarios indicarán os períodos a que a conformidade se estende, describindo as bases tributarias declaradas, así como as cotas liquidadas e ingresadas por parte do interesado.
5. No punto, a Inspección advertirá o interesado acerca dos elementos dos feitos impoñibles ou das bases ou cotas tributarias ós que a conformidade non se estende, atendendo o carácter parcial da actuación inspectora ou a existencia de circunstancias que así o xustifican, conforme se indica no último parágrafo do punto 8 da acta, no espacio en branco do cal se recollerá o carácter previo ou definitivo desta.
Así mesmo, cando a acta sexa enviada ó suxeito pasivo por correo, neste punto deberá advertírselle que poderá manifesta-la súa desconformidade por entender que non era correcta a liquidación por el formulada, realizando as alegacións que estime pertinentes, dentro dos quince días seguintes á recepción da acta, perante o órgano actuante da Inspección e a través da unidade administrativa que proceda. Noutro caso, a acta tramitarase como de conformidade entendéndose feitas as referencias dos puntos 6 e 8 seguintes non á data da acta, senón á da súa notificación.
6. No punto 5 da acta, e no seu espacio en branco, farase referencia á natureza da liquidación chamada a derivarse da acta, mencionándose no punto 6 e no espacio previsto para tal efecto, ó titular do órgano actuante da Inspección que poida dicta-las liquidacións e demais actos administrativos.
7. Finalmente, no punto 8 indicarase o órgano perante o que proceda a interposición de recurso de reposición, así como o Tribunal Económico-Administrativo perante o que poida interporse a reclamación correspondente.
8. A Inspección incoará unha acta de comprobado e conforme por cada concepto impositivo, pero referíndose a tódolos períodos impositivos ou de declaración ou declaracións tributarias obxecto de comprobación e ós que a conformidade se estenda.
