De conformidade co establecido na Orde do 21 de abril de 1998, sobre delegación de atribucións nos órganos centrais e periféricos da Consellería de Sanidade e Servicios Sociais.

Esta delegación provincial, unha vez cumpridos os trámites administrativos correspondentes, resolve anunciar concurso, por procedemento aberto e trámite de urxencia para a contratación do servicio de apoio informático na Residencia Asistida da Terceira Idade de Vigo.

-Orzamento do contrato: 2.580.000 ptas. ó ano (dous millóns cincocentas oitenta mil pesetas), 215.000 ptas. ó mes.

-Garantía provisional: 51.600 ptas. (cincuenta e unha mil seiscentas pesetas)

-Clasificación: non se esixe.

Condicións de licitación:

1. Prazo de execución: desde a data de adxudicación ata o 31 de decembro de 1999.

2. Admisión de variantes: non se admitirán variantes ou alternativas no servicio.

3. Forma de adxudicación: concurso, procedemento aberto e trámite de urxencia.

4. Solvencia económica e financeira: acreditarase por calquera dos medios previstos no artigo 16 da Lei de contratos das administracións públicas (Lei 13/1995 do 18 de maio, BOE nº 119 do 19 de maio).

5. Solvencia técnica: acreditarase por calquera dos medios previstos no artigo 19 da Lei 13/1995.

6. Criterios de adxudicación: os expostos na cláusula 11 das follas de especificacións incluídas no prego de cláusulas administrativas particulares.

7. Documentación que presentarán os licitadores: a esixida na cláusula 9 do prego de cláusulas administrativas particulares.

8. Exposición de documentación: os pregos de cláusulas administrativas particulares e de prescricións técnicas poderán examinarse na Delegación Provincial da Consellería de Sanidade e Servicios Sociais de Pontevedra ou nas súas dependencias en Vigo (rúa Cánovas del Castillo, s/n), durante o prazo de presentación de proposicións, desde as 9 ás 14 horas, en días hábiles, agás sábados. Así mesmo, poderán examinarse na propia Residencia Asistida da Terceira Idade (Monte Arieiro, s/n -Bembrive) ou ben no Servicio de Administración e Xestión Económica da Dirección Xeral de Servicios Sociais e nos Servicios de Xestión Económica das restantes delegacións provinciais da Consellería de Sanidade e Servicios Sociais.

9. Presentación de proposicións: efectuarase no rexistro xeral da Delegación Provincial da Consellería de Sanidade e Servicios Sociais de Pontevedra ou nas súas dependencias en Vigo, en sobres pechados en horario de 9 a 14 horas, ou ben por correo con xustificación da data de imposición e a comunicación o mesmo día ó órgano de contratación mediante telegrama ou telefax.

10. Prazo de presentación de proposicións: será de 13 días naturais contados desde o seguinte ó da publicación desta resolución no Diario Oficial de Galicia.

11. Apertura de proposicións: será realizada pola mesa de contratación a partir das 10 horas do décimo primeiro día natural seguinte ó do remate do prazo de presentación de proposicións, na sala de xuntas da Delegación Provincial da Consellería de Sanidade e Servicios Sociais de Pontevedra en Vigo. Se coincidise en sábado ou festivo terá lugar o día hábil seguinte á mesma hora.

12. Os gastos derivados deste anuncio serán por conta das empresas adxudicatarias.

Vigo, 25 de xaneiro de 1999.

P.D. (Orde 21-4-1998)

Mª Dolores Pan Vázquez

Delegada provincial de Pontevedra