O Decreto 90/1997, do 10 de abril, polo que se establece a organización recadatoria da Xunta de Galicia, atribúe ós órganos de recadación da Consellería de Economía e Facenda a competencia para recadar en vía executiva os recursos dos organismos autónomos e dos entes públicos vinculados á Administración da Comunidade Autónoma de Galicia. Así mesmo, prevé que aqueles poidan asumi-la xestión recadatoria dos recursos doutras administracións públicas en virtude de lei ou convenio.
Imponse a necesidade de adapta-la Orde do 1 de decembro de 1989, modificada pola Orde do 31 de maio de 1994 pola que se implanta un novo sistema de información contable na Administración da Xunta de Galicia para recolle-la xestión dos citados recursos. Para conseguir este obxectivo, créase unha nova agrupación contable, denominada Recursos doutros entes públicos, que se divide en:
-Recursos doutros entes públicos. Dereitos que cobrar.
-Recursos doutros entes públicos. Obrigacións que pagar.
Esta nova agrupación supón o campo adecuado para recolle-los ingresos por taxas de organismos autónomos que son recadados pola Administración xeral e que ata a data eran contabilizados en conceptos extraorzamentarios.
Deste modo a nova agrupación proporcionará unha imaxe detallada da xestión recadatoria de todos estes recursos que, baseándose en diferentes normas, acordos ou convenios, sexa realizada pola Administración xeral.
Artigo 1.-Modificación do artigo 26 da Orde do 1 de decembro de 1989.
Engádense ó artigo 26.Un os seguintes apartados:
«s) Estado de xestión de recursos doutros entes públicos. Dereitos que cobrar.
t) Estado de xestión de recursos doutros entes públicos. Obrigacións que pagar.».
Artigo 2.-Modificación do artigo 27.Un da Orde do 1 de decembro de 1989.
Engádense ó artigo 27.Un da Orde do 1 de decembro de 1989 os apartados seguintes:
«j) Estado de xestión de recursos doutros entes públicos. Dereitos que cobrar.
k) Estado de xestión de recursos doutros entes públicos. Obrigacións que pagar.».
Artigo 3.-Novo artigo 43 bis.
Engádese un artigo 43 bis coa seguinte redacción:
«Artigo 43 bis.
Cada oficina contable recollerá no «Estado de xestión de recursos doutros entes públicos. Dereitos que cobrar», a situación e os movementos daqueles recursos doutros entes públicos diferenciados da Administración xeral da Comunidade Autónoma de Galicia e dos que teña encomendada a xestión recadatoria esta última, desde o punto de vista da súa relación con terceiros.
Así mesmo, cada oficina contable recollerá no «Estado de xestión de recursos doutros entes públicos. Obrigacións que pagar» a situación e os movementos dos recursos a que se refire o parágrafo anterior que xa foron recadados, desde o punto de vista da súa entrega ós entes públicos titulares deles.».
Artigo 4.-Modificación do artigo 56 da Orde do 1 de decembro de 1989.
O punto 5 do artigo 56 da Orde de 1 de decembro de 1989, queda redactado como segue:
«5. Estado de situación e movementos de operacións non orzamentarias, con distinción das operacións relativas a recursos doutros entes públicos xestionados pola Administración xeral da Comunidade Autónoma.».
Artigo 5.-Modificación do artigo 61 da Orde do 1 de decembro de 1989.
O artigo 61 queda como segue:
«Artigo 61.
O estado de situación e movementos de operacións non orzamentarias reflectirá o detalle das realizadas durante o exercicio das distintas contas e conceptos en que se recollan este tipo de operacións, mostrando a súa situación e movementos, clasificadas en:
-Debedores.
-Acredores.
-Partidas pendentes de aplicación.
-Movementos internos de tesourería.
-Outras contas de relación.
-Recursos doutros entes públicos. Dereitos que cobrar.
-Recursos doutros entes públicos. Obrigacións que pagar.».
Artigo 6.-Modificación do artigo 69 da Orde do 1 de decembro de 1989.
O artigo 69 queda como segue:
«Artigo 69.
Respecto das operacións non orzamentarias, poñeranse de manifesto os ingresos e pagamentos realizados durante o exercicio, así como os saldos exis
tentes ó comezo do exercicio e ó final do período a que se refira.
Incluirase separadamente información relativa a recursos doutros entes públicos xestionados pola Administración xeral da Comunidade Autónoma, distinguindo os ingresos e os gastos.».
Disposición derradeira
O disposto na presente orde será de aplicación con efectos do un de xaneiro de mil novecentos noventa e nove.
Santiago de Compostela, 1 de febreiro de 1999.
José Antonio Orza Fernández
Conselleiro de Economía e Facenda
