O Estatuto de autonomía para Galicia, no seu artigo 5, especifica que a lingua propia de Galicia é o galego e que os poderes públicos de Galicia garantirán o uso normal e oficial dos dous idiomas e potenciarán o emprego do galego en tódolos planos da vida pública, cultural e informativa e disporán os medios necesarios para facilita-lo seu coñecemento. Segundo o artigo 27.20º, correspóndelle á Comunidade Autónoma galega a competencia exclusiva de promoción e o ensino da lingua galega.

Así mesmo, no artigo 1 do Decreto 213/1998, do 10 de xullo, polo que se establece a estructura orgánica da Consellería de Educación e Ordenación Universitaria, disponse que a Consellería de Educación e Ordenación Universitaria é o órgano da Administración da Comunidade Autónoma de Galicia ó que lle corresponden as competencias e funcións en materia de planificación, regulación e administración do ensino regrado, en toda a súa extensión, niveis e graos, modalidades e especialidades, así como a promoción e ensino da lingua galega. Todo

isto sen prexuízo do disposto na Constitución e nas leis orgánicas e demais disposicións legais.

A Lei 3/1983, do 15 de xuño, de normalización lingüística, no seu título III, do uso do galego no ensino, establece: «O galego, coma lingua propia de Galicia, é tamén lingua oficial no ensino en tódolos niveis educativos» e «as autoridades educativas da Comunidade Autónoma arbitrarán as medidas encamiñadas a promove-lo uso progresivo do galego no ensino».

Así mesmo, no seu título IV, do uso do galego nos medios de comunicación, establece que serán obrigas da Xunta de Galicia contribuír ó fomento do libro en galego, con medidas que potencien a producción editorial e a súa difusión.

No mesmo sentido, o artigo 8.2º do Decreto 247/1995, do 14 de setembro, polo que se desenvolve a citada Lei 3/1983, ordena que os materiais que se empreguen nas áreas e materias impartidas en lingua galega estarán escritos normalmente en galego, terán a calidade científica e pedagóxica adecuada e atenderán, sen prexuízo da súa proxección universal, ás peculiaridades de Galicia. Concrétase a seguir que, con esta finalidade, a Consellería de Educación e Ordenación Universitaria fomentará a elaboración e a publicación dos materiais curriculares correspondentes.

Por todo isto,

DISPOÑO:

Artigo 1º.-Suxeitos.

A presente orde vai dirixida ás editoriais legalmente constituídas como empresas privadas que elaboren material escolar incluíble no seu ámbito de aplicación.

1. Para os efectos da presente orde, terán a condición de suxeitos tódalas empresas privadas susceptibles de encadrarse no parágrafo precedente con independencia das clasificacións legais de carácter fiscal ou mercantil que supoña o emprego do termo editorial e que cumpran os requisitos esixidos nesta orde, establecidos nas bases específicas para a concesión das subvencións.

2. Excluiranse aqueles editores que anteriormente recibisen algunha outra subvención da Consellería de Educación e Ordenación Universitaria, a través da Dirección Xeral de Política Lingüística, e non xustificasen o seu investimento.

Artigo 2º.-Obxecto.

Convócanse subvencións en réxime de concorrencia competitiva para a edición de libros e material didáctico de niveis non universitarios con suxeición ás normas contidas na presente orde, con cargo á partida orzamentaria 07.06.353F.470.2, por unha contía máxima total de 213.900.000 ptas. correspondente ós orzamentos xerais da Comunidade Autónoma de Galicia para o ano 1999.

Artigo 3º.-Requisitos.

Subvencionaranse os libros e o material didáctico que cumpran as seguintes condicións:

1. Estaren correctamente escritos en galego, segundo o disposto na lexislación vixente (disposición adicional da Lei 3/1983, do 15 de xuño, e Decreto 173/1982, do 17 de novembro).

2. Corresponderen preferentemente ós niveis de educación infantil, primaria, secundaria obrigatoria, postobrigatoria (bacharelato, formación profesional, ciclos formativos), educación especial e educación permanente de adultos. Poderanse acoller tamén os libros destinados ó ensino especializado e ó non regrado.

3. Atérense ó disposto no Decreto 89/1993, do 19 de abril, e nas súas ordes de desenvolvemento, polo que se regula a autorización de libros de texto e outros materiais curriculares para o ensino de réxime xeral.

4. Publicárense en primeira edición entre o 1 de xaneiro de 1999 e o 15 de outubro de 1999. Para estes efectos considérase data de publicación aquela na que se efectúe o rexistro de solicitude do número do depósito legal.

Artigo 4º.-Exclusións.

Quedan excluídos do ámbito de aplicación da presente orde, aínda cumprindo os requisitos esixidos no artigo precedente:

1. Os libros de bibliófilo.

2. Os libros destinados a seren distribuídos gratuitamente.

3. Os libros publicados por clubs do libro ou entidades similares, destinados a seren distribuídos entre os seus subscritores.

4. Os libros que, publicados no prazo de vigor desta orde, recibisen xa ou tivesen asignado algún tipo de axuda por parte dalgún ente público.

5. Os libros de uso escolar correspondentes ás áreas ou materias de lingua e literatura galegas.

Artigo 5º.-Criterios de concesión.

Consideraranse criterios preferentes de concesión da subvención, sen orde de prelación, os seguintes:

1. O nivel de cumprimento de anteriores compromisos de edición; o incumprimento deles será razón suficiente para a denegación da subvención.

2. A importancia do fondo editorial en galego ou relacionado con Galicia do editor solicitante.

3. A calidade das obras contidas no catálogo, do cal se enviará unha mostra.

4. A continuidade dentro dun proxecto educativo e a importancia do investimento realizado en capital e en persoal pola empresa respecto da edición.

5. A capacidade de distribución do material e a importancia do investimento realizado pola empresa respecto da edición, en capital e en persoal.

6. O tipo de material:

a) Material básico: libros de didáctica na aula que desenvolvan un deseño curricular na súa totalidade.

b) Material complementario (libros de consulta de uso individual ou colectivo e propostas didácticas de metodoloxía dun currículo completo).

7. O grao de orixinalidade de acordo coa seguinte escala:

a) Creación propia.

b) Adaptación.

c) Traducción.

d) Recompilación.

8. De acordo co establecido no artigo 19 da Lei 3/1983, daráselles preferencia a aqueles proxectos presentados por editoriais que empreguen o galego dun xeito habitual e progresivo.

Artigo 6º.-Limitacións.

A contía de cada subvención non poderá supera-la cantidade de catro millóns de pesetas por obra ou material didáctico presentado.

As subvencións que se concedan estableceranse (segundo o disposto no número 6 do artigo precedente), dependendo do seu grao de orixinalidade, do xeito seguinte:

a) Material básico, ata o 60% do custo real de producción da obra sen IVE.

b) Material complementario, ata o 40% do custo real de producción da obra sen IVE.

Non obstante, por proposta motivada da comisión de avaliación, poderanse conceder subvencións a proxectos de especial interese en porcentaxes superiores ás anteriormente indicadas.

Artigo 7º.-Documentación.

No momento de face-la solicitude da subvención, os interesados presentarán a seguinte documentación:

1. Solicitude, debidamente cuberta dos anexos I e II da presente orde, xuntando un único exemplar do anexo I por empresa solicitante, e tantos exemplares do anexo II como obras presentadas.

2. Acreditación da personalidade do solicitante e da súa representación, mediante fotocopia compulsada da escritura pública de constitución da sociedade e do poder notarial correspondente; a inscrición de ámbolos dous documentos debe constar no Rexistro Mercantil.

No caso de empresas individuais, presentarase unha fotocopia compulsada do DNI do titular.

3. Copia compulsada do último recibo de pagamento do imposto de actividades económicas.

4. Un exemplar da obra ou material educativo.

5. No caso de non ter elaborado o material, unha ou dúas unidades didácticas do proxecto que se pretende editar, e cando menos, unha memoria descritiva dos contidos e dos procedementos do proxecto na que constarán tódolos datos referidos á subvención.

6. Orzamento desagregado de gastos correspondente ó custo real de producción da obra para a que se solicita a subvención, no que ademais deberá constar expresamente a tiraxe de exemplares e o prezo de venda ó público sen IVE.

7. Características físicas e técnicas da obra para a que se solicita a subvención (gramaxe e tipo de papel que se vai utilizar, fotocomposición, número de cores, porcentaxe de ilustración e demais datos de interese), agás para aquelas solicitudes que se presenten en virtude do estipulado no punto 7.4 desta orde.

8. Declaración xurada, asinada polo presidente ou director da empresa, especificando:

a) O número de contratos da empresa acollidos ó réxime da Seguridade Social.

b) Que a empresa non goza de ningunha outra axuda económica máis doutras entidades ou institucións para esta mesma finalidade.

A esta declaración xuntaranse fotocopias dos correspondentes documentos TC1 e TC2 da última cotización á Seguridade Social.

9. Certificación de tiraxe expedida polo fabricante.

10. Certificación bancaria orixinal da conta corrente ó nome da empresa solicitante na que desexen que se lles realice o pagamento.

11. Fotocopia do CIF da empresa ou do NIF en caso de empresas individuais.

12. Un catálogo editorial actualizado.

Artigo 8º.-Entrega da documentación.

As solicitudes, xunto coa documentación citada no artigo precedente, presentaranse no rexistro xeral da Consellería de Educación e Ordenación Universitaria (edificio administrativo de San Caetano, Santiago de Compostela), no prazo de 30 días naturais contados a partir do seguinte ó da publicación desta orde no Diario Oficial de Galicia; a este respecto é de aplicación o previsto no artigo 38.4º da Lei de réxime xurídico das administracións públicas e do procedemento administrativo común.

Artigo 9º.-Procedemento.

Recibidas as solicitudes de subvención e a súa documentación, valoraranse polos servicios competentes da Dirección Xeral de Política Lingüística segundo os criterios de valoración establecidos no

artigo 5º. O director xeral de Política Lingüística elevará a correspondente proposta ó conselleiro de Educación e Ordenación Universitaria, que resolverá.

Artigo 10º.-Órgano informante.

Será competente para a elaboración do informe-proposta citado no artigo anterior unha comisión de avaliación presidida polo director xeral de Política Lingüística, ou a persoa na que delegue, e composta polos seguintes membros:

-O subdirector xeral de Promoción e Ensino da Lingua Galega.

-Dous funcionarios expertos en deseños curriculares.

-Un funcionario da Dirección Xeral de Política Lingüística, que actuará de secretario con voz e sen voto.

A citada comisión poderá pedir asesoramento ás institucións ou persoas que considere convenientes para a avaliación dos proxectos.

Artigo 11º-Resolución.

Á vista do informe da comisión de avaliación, o conselleiro de Educación e Ordenación Universitaria dictará a resolución que porá fin á vía administrativa.

Para os efectos do disposto no artigo 59.5º.b) da Lei 30/1992, de réxime xurídico das administracións públicas e do procedemento administrativo común, as notificacións publicaranse no taboleiro de anuncios da Oficina de Atención ó Cidadán da Consellería de Educación e Ordenación Universitaria (Edificio Administrativo de San Caetano, bloque 2, baixo, Santiago de Compostela) e no Diario Oficial de Galicia.

A concesión de anticipos e pagamentos parciais regularase de acordo coa lexislación vixente na materia.

Se no prazo de tres meses non recaese resolución expresa desta convocatoria, as solicitudes presentadas entenderanse desestimadas.

Artigo 12º.-Aceptación da subvención e compromisos.

As empresas seleccionadas terán que lle comunicar por escrito a súa aceptación da subvención concedida á Dirección Xeral de Política Lingüística da Consellería de Educación e Ordenación Universitaria, no prazo máximo de dez días contados a partir da publicación da resolución no Diario Oficial de Galicia.

A empresa editorial, nos proxectos subvencionados ó abeiro da presente orde, aplicará no prezo de venda ó público (sen IVE) un desconto que coincida, como mínimo, coa metade da porcentaxe que se aplicou para subvenciona-la obra en cuestión.

No reverso de toda a edición de libros e material didáctico para os que se conceda a axuda constará

impreso, coa mesma técnica cós créditos da empresa editora, o patrocinio da Dirección Xeral de Política Lingüística da Consellería de Educación e Ordenación Universitaria, empregando para iso os logotipos aprobados pola imaxe corporativa da Xunta de Galicia, co seguinte texto: «Subvencionado pola Xunta de Galicia, Consellería de Educación e Ordenación Universitaria, Dirección Xeral de Política Lingüística».

Nos proxectos que fosen subvencións ó abeiro desta orde, no caso de existiren novas edicións, farase constar na correspondente folla de créditos a subvención da primeira edición.

Artigo 13º.-Xustificación.

O prazo improrrogable de xustificación e entrega da totalidade da documentación que a seguir se cita, nas condicións expresas na presente orde, rematará o 15 de outubro de 1999.

Antes da citada data deberán remitirse á Dirección Xeral de Política Lingüística, xunto cun escrito no que se cite o número do expediente, os seguintes documentos:

1. Xustificantes orixinais, ou fotocopia compulsada, dos gastos realizados, de acordo coa resolución de concesión e nos termos expresados no proxecto presentado, por un valor mínimo equivalente á axuda outorgada, xunto cunha relación pormenorizada e numerada destes.

2. Certificado do editor no que constará expresamente a realización da edición e, como mínimo, a tiraxe de exemplares que se mencionaba no proxecto de solicitude.

3. Certificacións expresas de non ter contraída ningunha débeda, por ningún concepto coa Xunta de Galicia, e de estar ó corrente nas obrigas tributarias e coa Seguridade Social.

4. Unha cantidade mínima de oitenta e cinco exemplares por obra subvencionada que se distribuirán por conta da empresa subvencionada coa seguinte desagregación:

-10 exemplares para a Dirección Xeral de Política Lingüística (Servicios Centrais. San Caetano, Santiago de Compostela).

-10 exemplares para cada unha das catro delegacións provinciais da Consellería de Educación e Ordenación Universitaria.

-5 exemplares destinados a cada un dos sete CEFOCOPS.

Unha vez efectuada a distribución, a empresa subvencionada achegará as xustificacións acreditativas de ter realizada esta actividade.

En relación cos xustificantes citados no número 1 deste artigo, as súas datas estarán comprendidas

entre o 1 de xaneiro de 1999 e o 15 de outubro de 1999, admitíndose unicamente os relativos a:

a) Gastos de imprenta e material.

a.1) Composición.

a.2) Impresión.

a.3) Encadernación.

a.4) Fotomecánica.

b) Gastos de persoal.

b.1) Auditoría/dereitos.

b.2) Ilustración/deseño.

b.3) Fotografía.

b.4) Traducción.

b.5) Revisión de textos.

Para aqueles gastos que sexan de difícil xustificación admitirase unha declaración xurada e razoada, asinada polo director ou presidente da empresa, que non supere o 25% do total da xustificación.

O incumprimento destas obrigas por parte do interesado dará lugar ó arquivo do expediente sen máis trámite.

Artigo 14º.-Perda da subvención.

Os beneficiarios das subvencións teñen a obriga de lles facilitar ós servicios competentes da Dirección Xeral de Política Lingüística toda a información requirida. Así mesmo, os devanditos órganos poderán levar a cabo labores de inspección destinados a verificar que as subvencións sexan destinadas á finalidade para a que foron concedidas.

Calquera alteración verbo dos datos que figuran no impreso de solicitude e calquera outro incumprimento das normas contidas na presente orde, terá como consecuencia a revogación da axuda logo da audiencia á empresa interesada, e esta, se fose o caso, terá que reintegra-las cantidades percibidas.

No caso de que se lle conceda á mesma empresa no prazo de vigor da presente orde outra subvención para esta mesma finalidade, a empresa terá que llo comunicar á Administración, sendo de aplicación o disposto no artigo 78.3º da Lei 11/1992, do 7 de outubro.

Disposicións derradeiras

Primeira.-Facúltase o director xeral de Política Lingüística para dictar, no ámbito das súas competencias, as resolucións precisas para o desenvolvemento desta orde.

Segunda.-A presente orde entrará en vigor o día seguinte ó da súa publicación no Diario Oficial de Galicia.

Santiago de Compostela, 28 de xaneiro de 1999.

Celso Currás Fernández

Conselleiro de Educación e Ordenación

Universitaria