Con data 20 de xuño (DOG nº 118, do 20 de xuño de 1997) publicouse o pacto sobre nomeamentos temporais de médicos especialistas en pediatría que presten os seus servicios na Atención Primaria de Saúde da Comunidade Autónoma galega. (Resolución conxunta do 27 de maio de 1997, da Secretaría Xeral da Consellería de Sanidade e Servicios Sociais e da Dirección Xeral de Recursos Humanos do Servicio Galego de Saúde, pola que se ordena a publicación do pacto subscrito pola Administración sanitaria coas centrais sindicais CIG, CC.OO., UXT, CSIF e CESM, en condición esta última adherida, sobre nomeamentos de médicos especialistas en pediatría que presten os seus servicios na Atención Primaria de Saúde da Comunidade Autónoma galega).

O citado pacto é de aplicación a toda a Comunidade Autónoma galega e afecta os nomeamentos e contratacións temporais do persoal estatutario facultativo especialista en pediatría, ou, se é o caso, médicos xerais que acrediten o diploma de posgraduado en puericultura, con destino en Atención Primaria do Servicio Galego de Saúde.

De acordo co reflectido na norma xeral segunda do mentado pacto, de non mediar denuncia no prazo dun mes de antelación ó seu termo, entenderase prorrogado por idéntico período dun ano.

Polo que prorrogado o dito pacto, e segundo o disposto na norma quinta, faranse no primeiro trimestre do ano unha nova oferta.

Mediante a presente resolución, convócanse os aspirantes, especialistas en pediatría, concedéndoselles ós interesados un prazo máximo de 10 días naturais a partir do día seguinte á data de publicación da convocatoria no DOG, para presenta-la súa solicitude de acordo cos requisitos e méritos contidos no devandito pacto.

Para poder formula-la solicitude, os aspirantes deberán acreditar no momento da súa presentación a nacionalidade española ou dun país da Unión Europea, ou se é o caso, dispoñer de autorización para poder residir e traballar legalmente en España.

Os méritos a ter en conta segundo o baremo previsto no mentado pacto computaranse ata o día inmediatamente anterior ó da publicación desta resolución no DOG.

Os aspirantes que figuran inscritos en anteriores convocatorias terán que presentar unha nova solicitude, se ben os méritos xa alegados en anteriores convocatorias non terán que ser de novo achegados.

As solicitudes poderán presentarse en modelo normalizado e coa documentación acreditativa pertinente nas direccións provinciais do Servicio Galego de Saúde e nas xerencias de Atención Primaria, no prazo sinalado.

Para xeral coñecemento, faise necesaria súa publicación no Diario Oficial de Galicia.

Na súa virtude,

RESOLVE:

Acorda-la publicación da convocatoria para solicita-la inclusión nas listas de nomeamentos temporais do persoal estatutario na categoria de médico especialista en pediatría nas distintas áreas de Atención Primaria de Saúde da Comunidade Autónoma galega, nas condicións fixadas no pacto, segundo a resolución conxunta do 27 de maio de 1997, da Secretaría Xeral da Consellería de Sanidade e Servicios Sociais e da Dirección Xeral de Recursos Humanos do Servicio Galego de Saúde, pola que se ordena a publicación do pacto subscrito pola Administración sanitaria coas centrais sindicais CIG, CC.OO., UXT, CSIF e CESM, en condición esta última adherida, sobre nomeamentos de médicos especialistas en pediatría que presten os seus servicios na Atención Primaria de Saúde da Comunidade Autónoma galega. (DOG nº 118, do 20 de xuño de 1997).

Santiago de Compostela, 19 de xaneiro de 1999.

Valeriano Martínez García

Director xeral da División de Recursos Humanos