A Real Academia Galega decidiu dedica-lo Día das Letras Galegas de 1999 a Roberto Blanco Torres. Escritor e xornalista, a súa obra poética de carácter vangardista, goza dunha grande intensidade e beleza, como xornalista a súa obra é moi extensa e variada,
sendo a súa sinatura considerada como unha das máis características da época en que viviu.
Escritor emigrado a Cuba, a súa evolución transcorre entre o agrarismo e o galeguismo. Comprometido co seu tempo, dirixiu varios xornais e foi un colaborador asiduo da prensa galega, vertendo o seu talante combativo en diversos xornais e revistas. O seu importante labor xornalístico faino merecente dun posto de honor no xornalismo galego.
Na súa virtude, por proposta do conselleiro de Cultura, Comunicación Social e Turismo e logo de deliberación do Consello da Xunta de Galicia na súa reunión do día sete de xaneiro de mil novecentos noventa e nove,
DISPOÑO:
Artigo 1º
Declárase o ano 1999 en Galicia ano de Roberto Blanco Torres, polo que debe constituír unha obriga para tódolos galegos participar na homenaxe debida a este escritor.
Artigo 2º
As institucións públicas galegas, os centros de ensino, as bibliotecas, as asociacións e federacións culturais dependentes da Xunta de Galicia dedicarán unha parte da súa actividade a poñer de relevo a obra deste xornalista e poeta que tanto fixo polas letras galegas.
Artigo 3º
Como testemuña de homenaxe a Roberto Blanco Torres, a Xunta de Galicia acuñará unha medalla conmemorativa de trescentos exemplares numerados.
Disposición derradeira
O presente decreto entrará en vigor o día seguinte ó da súa publicación no Diario Oficial de Galicia.
Santiago de Compostela, sete de xaneiro de mil novecentos noventa e nove.
Manuel Fraga Iribarne
Presidente
Jesús Pérez Varela
Conselleiro de Cultura, Comunicación Social
e Turismo
78