Constitúe un obxectivo primordial do programa de reforma e modernización da Administración autonómica galega o achegamento da Administración ós administrados como garantía de efectividade dos dereitos que o bloque constitucional lles recoñece na súa relación coas diferentes administracións públicas. Este obxectivo debe comezar polo achegamento físico das oficinas administrativas ós cidadáns, o que redundará, sen dúbida, nunha mellora dos servicios que presta a Administración pública.

A Lei 30/1992, do 26 de novembro, de réxime xurídico das administracións públicas e do procedemento administrativo común, establece no seu artigo 38.2º que os órganos administrativos poderán crear nas unidades administrativas correpondentes da súa propia organización outros rexistros co fin de facilita-la presentación de escritos e comunicacións. Estes rexistros serán auxiliares do rexistro xeral, ó que lle comunicarán toda canta anotación efectúen.

Por todo iso, créase o Rexistro da Xunta de Galicia na Casa de Galicia en Madrid, baixo a dependencia orgánica e funcional da Consellería da Presidencia e Administración Pública. O devandito rexistro terá encomendadas as funcións de recepción de escritos, solicitudes e comunicacións dirixidas a calquera órgano da Administración autonómica de Galicia, así como á Administración xeral do Estado e ás diversas administracións locais de Galicia nos termos establecidos nos correspondentes convenios.

Por todo isto,

DISPOÑO:

Artigo 1º

Créase o Rexistro da Xunta de Galicia na Casa de Galicia en Madrid que dependerá orgánica e funcionalmente da Consellería da Presidencia e Administración Pública da Xunta de Galicia.

Artigo 2º

A oficina á que fai referencia o artigo anterior exercerá as seguintes funcións:

1. Rexistro de escritos, solicitudes e comunicacións dirixidas a calquera órgano da Administración autonómica de Galicia, así como a outras administracións públicas nos termos establecidos na lei e nos convenios subscritos coa Administración xeral do Estado e a Federación Galega de Municipios e Provincias.

Concluído o trámite de rexistro, daráselles traslado dos escritos, solicitudes e comunicacións ós seus destinatarios sen dilación e directamente.

2. Información xeral da Administración autonómica de Galicia.

3. Información particular sobre aqueles expedientes administrativos informatizados nos que o solicitante sexa interesado, e nos termos establecidos na lei.

4. Acceso ó Rexistro Xeral de Contratistas da Comunidade Autónoma.

5. Atención e asistencia ó administrado.

Artigo 3º

O rexistro a que fai referencia o artigo 1º desta orde contará co cadro de persoal que se estableza regulamentariamente e que permitan as posibilidades orzamentarias.

Artigo 4º

O rexistro a que fai referencia o artigo 1º iniciará a súa actividade administrativa de recepción e rexistro xeral de escritos, solicitudes ou comunicacións dirixidos ós órganos da Administración autonómica de Galicia ou a outras administracións públicas, ás 9 horas do vindeiro día 1 de decembro de 1998 e axustará o seu funcionamento ó horario que rexe con carácter xeral nas dependencias e oficinas da Xunta de Galicia.

Artigo 5º

O devandito rexistro axustará o seu funcionamento ó horario que rexe con carácter xeral nas dependencias e oficinas da Xunta de Galicia.

Disposicións derradeiras

Primeira.-O establecido nesta orde non supón incremento de gasto.

Segunda.-Facúltase a Secretaría Xeral da Consellería da Presidencia e Administración Pública, a Inspección Xeral de Servicios e a Dirección Xeral de Sistemas Informáticos para dicta-las normas precisas para o desenvolvemento desta orde.

Terceira.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 27 de novembro de 1998.

Dositeo Rodríguez Rodríguez

Conselleiro da Presidencia e Administración

Pública

10771