O artigo 28.2º da Constitución española recoñece como dereito fundamental da persoa o dereito á folga.

O exercicio deste dereito na Administración e nas empresas, entidades e institucións públicas ou privadas, que presten servicios públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ó mantemento dos servicios esenciais fixados no artigo 2 do Decreto 155/1988, do 9 de xuño (DOG nº 116, do 20 de xuño), entre os que se atopa a sanidade.

O exercicio público da prestación da asistencia sanitaria, así como dos seus corolarios, non se poden ver afectados gravemente polo lexítimo dereito do exercicio de folga, xa que aquel é considerado e recoñecido prioritariamente en relación a este.

O artigo 3 do citado decreto faculta os conselleiros competentes, por razón dos servicios esenciais afectados, para que, mediante orde, e ante cada situación de folga, decidan o mínimo de actividades necesarias para asegura-lo mantemento de tales servicios; así como para determina-lo persoal necesario para a súa prestación.

Convocada unha folga que afecta o persoal dependente das empresas integradas na citada asociación, concesionarias do servicio de ambulancias, que prestan os seus servicios no Sergas en todo o ámbito da Comunidade Autónoma de Galicia, que se levará a cabo os días 12, 13, 19, 20, 26 e 27 de novembro de 1998; cumprido o preceptivo trámite de convocatoria de audiencia ó comité de folga e recepción das alegacións formuladas polo seu representante, esta consellería

DISPÓN:

Artigo 1º.-A convocatoria de folga que afecta o persoal dependente de empresas concesionarias do servicio de ambulancias adscritas á Asociación Nacional de Empresarios de Ambulancias (ANEA), que se levará a cabo os días 12, 13, 19, 20, 26 e 27 de novembro de 1998, enténdese condicionada ó mantemento dos servicios mínimos que se establecen no anexo desta orde.

Os servicios mínimos que se fixan resultan totalmente imprescindibles para mante-la necesaria cobertura asistencial respecto ós servicios de ambu

lancias, e evitar que se produzan graves prexuízos ós usuarios.

Tales mínimos responden á necesidade de compatibiliza-lo respecto ineludible ó exercicio do dereito á folga coa adecuada atención ós usuarios do servicio de ambulancias que, baixo ningún concepto, poden quedar desasistidos polas características do servicio dispensado.

Entrando na análise dos criterios da determinación dos servicios mínimos, pódese sinalar que para a fixación destes se tivo en conta a necesidade de manter unha porcentaxe da actividade imprescindible e como tal irreductible, para cubri-las necesidades asistenciais da poboación en canto ó servicio de ambulancias.

E para garantir tal actividade de aseguramento da prestación asistencial do servicio, requírese unha fixación de servicios esenciais cunha cobertura do 100% respecto á atención urxente.

No tocante á atención ordinaria procede manter en certos casos o 80% de cobertura, na procura de concilia-lo dereito de folga coa prestación do servicio ós cidadáns.

As porcentaxes referidas enténdense respecto ós efectivos da cada unha das empresas afectadas.

Entenderase, en todo caso, como atención urxente, a demandada como tal en calquera circunstancia por institucións sanitarias. Entenderase como atención ordinaria os servicios programados de carácter non urxente, especificamente: altas, tratamentos e traslados intercentros.

Artigo 2º.-A designación nominal, con carácter rotatorio, do persoal que deberá cubri-los distintos servicios será feita pola dirección das empresas integradas na citada asociación, concesionarias do servicio de ambulancias; procedéndose á súa publicación nos taboleiros de anuncios dos centros correspondentes.

Artigo 3º.-Os paros e alteracións no traballo por parte do persoal necesario para o mantemento dos servicios mínimos determinados serán considerados ilegais para os efectos do establecido no artigo 16.1º do Real decreto lei 17/1977, do 4 de marzo (BOE nº 58, do 9 de marzo).

Artigo 4º.-O disposto nos artigos anteriores non significará ningún tipo de limitación dos dereitos que a normativa reguladora da folga lle recoñece ó persoal nesta situación, nin tampouco sobre a tramitación e efectos das peticións que a motiven.

Artigo 5º.-Sen prexuízo do que establecen os artigos anteriores, deberanse observa-las normas legais e regulamentarias vixentes en materia de garantías dos usuarios dos establecementos sanitarios.

Disposición derradeira

A presente orde entrará en vigor o mesmo día da súa publicación no Diario Oficial de Galicia.

Santiago de Compostela, 9 de novembro de 1998.

José Mª Hernández Cochón

Conselleiro de Sanidade e Servicios Sociais

ANEXO

Servicios mínimos en transporte sanitario

-Urxente:

100% dos servicios.

-Non urxente:

100% dos servicios de transporte para diálise.

100% dos servicios de transporte para tratamentos oncolóxicos.

100% dos servicios de transporte para controis hematolóxicos.

100% dos servicios de transporte para extracción periférica de mostras.

100% dos servicios de transporte para altas hospitalarias.

100% dos servicios de transporte para traslados intercentros.

80% dos servicios de transporte para rehabilitación.

80% dos servicios de transporte para consultas.

10111