A Orde do 19 de maio de 1998 (DOG nº 102, do 29 de maio) establece para 1998 axudas ós investimentos en promoción e comercialización de productos agrarios e agroalimentarios galegos.
Rematado o prazo de solicitude de axudas e á vista do alto volume de peticións recibidas así como das súas características parece oportuno amplia-lo orzamento previsto inicialmente e os posibles beneficiarios delas.
Por todo iso e de acordo co disposto no artigo 20.I.3º do Estatuto de autonomía de Galicia, e no uso das competencias conferidas na Lei 1/1983, do 22 de febreiro, regulamentadora da Xunta e do seu presidente, e demais normativa de aplicación
DISPOÑO:
Artigo 1º
1. Modifícanse os artigos 2 e 5 da Orde do 19 de maio de 1998 que quedan redactados da seguinte maneira:
* Artigo 2, punto 1º.b): «Feiras e certames comerciais.
-A organización de feiras e certames do sector agrario e agroalimentario en Galicia, excluídas as referentes a concursos, exposicións e feiras de gando, e sempre que estean promovidas por corporacións locais, consellos reguladores e agrupacións de productores e de industrias agrarias cando estean asociadas para colaborar na mellora da calidade dun producto.»
* Artigo 5, punto 1º: «Xustificantes dos investimentos efectuados. Logo de presentar facturas orixinais para realiza-la toma de razón, entregarase fotocopia xunto coa relación delas.
No caso de corporacións locais admitirase como xustificante dos investimentos efectuados certificación do secretario (interventor ó respecto).»
2. Así mesmo, modifícase tamén a disposición adicional da devantida orde, que quedará redactada como segue:
O aboamento das subvencións fixadas nesta orde establecerase con cargo ós conceptos orzamentarios 09.04.714 A.760.0 (6.900.000 ptas.), 09.04.714 A.770.0 (243.250.000 ptas.) e 09.04.714 A.780.0 (20.000.000 de ptas.) dos orzamentos xerais da Comunidade Autónoma de Galicia para 1998.
Artigo 2º
-Engádeselle un parágrafo ó punto 2º do artigo 3 da Orde do 19 de maio de 1998, no relativo á organización, coa seguinte redacción:
No caso de corporacións locais a subvención poderá acada-lo 30% dos investimentos cun límite de 200.000 ptas. Este límite poderá acada-lo 50% no caso de certames nos que colaboran consellos reguladores e agrupacións de productores e industrias asociados para mellora-la calidade dun producto.
Artigo 3º
-Reábrese o prazo para presentar solicitudes, que rematará ós 20 días contados desde o seguinte ó de publicación desta orde no Diario Oficial de Galicia.
Disposición adicional
Teranse en conta tódalas solicitudes presentadas ó abeiro da Orde do 19 de maio de 1998 e que reúnan os requisitos previstos nesta disposición.
Disposición derradeira
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 16 de outubro de 1998.
Cástor Gago Álvarez
Conselleiro de Agricultura, Gandería e Política
Agroalimentaria
9514