Dentro do programa de actividades que a Academia Galega de Seguridade ten previsto realizar no ano 1998, conforme as funcións que ten encomendadas pola Orde do 22 de abril de 1994, pola que se regula a formación do persoal voluntario de Protección Civil, anúnciase a celebración dun curso de formador de formadores, que deberá desenvolverse conforme as seguintes bases:
Destinatarios.
O curso vai dirixido ós xefes e responsables de formación das agrupacións de voluntarios de Protección Civil da Comunidade Autónoma de Galicia que previamente teñan realizado o curso básico e polo menos dous cursos de segundo nivel, e ó persoal de Protección Civil da Xunta de Galicia.
Inscrición.
A inscrición dos participantes será totalmente gratuíta.
Solicitudes.
1. As persoas que desexen participar nestes cursos deberán presentar, cuberta a máquina ou con letra moi clara, a instancia que figura no anexo.
2. O prazo para a presentación de instancias rematará o día 9 de novembro de 1998, ás 14 horas.
3. As instancias serán enviadas polo presidente da agrupación correspondente á sede da Academia Galega de Seguridade: avenida da Cultura, 36680 A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Prazas.
O número de prazas ofertadas para este curso é de 40, das cales 35 son para membros das agrupacións de voluntarios de Protección Civil da Comunidade Autónoma de Galicia e 5 para persoal de Protección Civil da Xunta de Galicia.
Contido.
No curso desenvolveranse, entre outros, os seguintes temas: 1. Papel do formador. 2. A comunicación na formación. 3. Destinatarios da formación. 4. Deseño da acción formativa. 5. Recursos didácticos. A súa utilización. 6. Técnicas de expresión oral. 7. Técnicas de animación de grupos. 8. Avaliación dos resultados, etc.
Duración e datas.
O curso celebrarase durante as seguintes datas: 24, 25 e 26 de novembro e 1, 2 e 3 de decembro de 1998, e terá unha duración de 42 horas lectivas.
O horario será en sesións de mañá e tarde, de 9.30 a 14 horas e de 16 a 19 horas.
Relación de admitidos.
A relación de admitidos publicarase o día 12 de novembro de 1998 no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono 986 59 00 21.
Lugar.
Sede da Academia Galega de Seguridade, sita na avenida da Cultura s/n, 36680 A Estrada.
Certificado de aproveitamento.
Ó remate do curso entregaráselles un certificado de asistencia e aproveitamento a aquelas persoas que acrediten a súa asistencia continuada a el e superen as correspondentes probas de coñecementos.
Modificacións.
A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.
Santiago de Compostela, 17 de setembro de 1998.
Juan José Fariñas-Ferro Rodríguez
Director xeral da Academia Galega de Seguridade
9114