O Concello de Vigo, en sesión celebrada o trinta e un de marzo de mil novecentos noventa e cinco, acordou cederlle ó Servicio Galego de Saúde a parcela ou bloque 14 das incluídas no proxecto de compensación da unidade de execución Rosalía de Castro I, cunha extensión superficial de 835 m, para a construcción dun centro de saúde.
Conforme o artigo 17.1º da Lei 3/1985, do 12 de abril, do patrimonio da Comunidade Autónoma, requírese decreto do Consello da Xunta de Galicia para a adquisición de bens a título gratuito. Por outra banda, o artigo 23.1º da mesma lei establece que non poderán adquirirse bens ou dereitos a título lucrativo cando o valor global dos gravames, cargas e afeccións impostos sobre eles supera o seu valor intrínseco. Non se considerarán carga, gravame ou afección os investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente.
En cumprimento do disposto na Lei 3/1985, do 12 de abril, do patrimonio da Comunidade Autónoma, por proposta do conselleiro de Sanidade e Servicios Sociais e presidente do Servicio Galego de Saúde, e de conformidade coas condicións estipuladas no acordo do Pleno do Concello do 31 de marzo de 1995, e segundo as determinacións contidas no estudio de detalle que desenvolve o Plan
Xeral de Ordenación Urbana do Concello de Vigo, e logo de deliberación do Consello da Xunta de Galicia na súa reunión do día vintecatro de xullo de mil novecentos noventa e oito,
DISPOÑO:
Artigo 1º
1. Acéptase a cesión a título gratuíto dun inmoble propiedade do Concello de Vigo, feita a favor do Servicio Galego de Saúde, para a construcción dun centro de saúde.
2. A parcela cedida ten unha superficie de 835 m é a número 14 das incluídas no proxecto de compensación da unidade de execución Rosalía de Castro 1, sendo os seus lindes os seguintes:
-Ó norte: límite do ámbito da unidade de execución da que forma parte.
-Ó sur: rúa Rosalía de Castro, na fachada da cal se proxecta unha zona de soportais e acceso a praza pública en propia parcela.
-Ó leste: parcela 13 de Ucha y Cía, S.L. e outros.
-Ó oeste: parcela 15 con edificio de Ernesto Vázquez Álvarez.
3. O inmoble obxecto da cesión está inscrito no Rexistro da Propiedade número 1 a favor do Concello de Vigo, no tomo 990, folio 78, predio nº 68.860, inscrición primeira.
Artigo 2º
O inmoble cédese segundo o establecido nos artigos 23.1º da Lei 3/1985, do 12 de abril, do patrimonio da Comunidade Autónoma e 38 do seu Regulamento e de acordo coas determinacións contidas no estudio de detalle que desenvolve o Plan Xeral de Ordenación Urbana de Vigo e destinarase á construcción dun centro de saúde.
Artigo 3º
O Servicio Galego de Saúde, a través do seu órgano competente, procederá á formalización da aceptación no correspondente documento público, inscribíndose no Rexistro da Propiedade ó seu nome e integrándose no seu patrimonio propio.
Disposición derradeira
O Servicio Galego de Saúde, a través do seu órgano competente, levará a cabo os trámites necesarios para a efectividade de canto se dispón neste decreto.
Santiago de Compostela, vintecatro de xullo de mil novecentos noventa e oito.
Manuel Fraga Iribarne
Presidente
José María Hernández Cochón
Conselleiro de Sanidade e Servicios Sociais
e presidente do Servicio Galego de Saúde
7551