A Orde do 29-3-1996 sinala no seu artigo 2.1º que a licencia para a práctica da pesca marítima de recreo se outorga por un período de cinco anos, a partir da súa data de expedición, debéndose revalidar anualmente.
Dado que na referida orde non existe expresa previsión sobre o prazo no que se debe solicita-la aludida revalidación anual, tendo en conta as dúbidas xurdidas en canto á delimitación do mencionado prazo e de acordo co establecido na disposición derradeira primeira da precitada orde, así como no Decreto 109/1998, do 5 de marzo, (DOG nº 65, do 6 de marzo), polo que se establece a estructura orgánica da Consellería de Pesca, Marisqueo e Acuicultura, esta dirección xeral
RESOLVE:
1. A revalidación anual da licencia á que se refire o artigo 2.1º da Orde do 29-3-1996 solicitarase no prazo dos 20 días naturais inmediatos anteriores ó vencemento do seu período anual de vixencia.
2. As solicitudes de revalidación presentadas unha vez vencido o período anual de vixencia da licencia, expediranse polo período de tempo que falte ata a data na que corresponda a seguinte revalidación.
3. As solicitudes de revalidación e as de licencia especial ás que se refiren os artigos 5 e 6, respectivamente, da Orde do 29-3-1996, deberán unir á documentación sinalada nos citados artigos unha fotografía tamaño carné do interesado.
Santiago de Compostela, 3 de xullo de 1998.
Javier Pereiro Muñoz
Director xeral de Recursos Mariños
5915