O Pleno do Concello de Xinzo de Limia, en sesións celebradas o 26 de maio de 1997 e 27 de abril de 1998, acorda ceder gratuitamente ó Servicio Galego de Saúde a titularidade do predio, propiedade do concello e sito na rúa Río Sil, para a ampliación do actual centro de saúde.
Conforme o artigo 17.1º da Lei 3/1985, do 12 de abril, do patrimonio da Comunidade Autónoma, requírese decreto do Consello da Xunta de Galicia para a adquisición de bens a título gratuito. Por outra banda, o artigo 23.1º da mesma lei establece que non se poderán adquirir bens ou dereitos a título lucrativo cando o valor dos gravames, cargas ou afeccións impostos sobre os estes supere o seu valor intrínseco, se ben non se consideran carga, gravame ou afección ós investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente.
En cumprimento do disposto na Lei 3/1985, do 12 de abril, do patrimonio da Comunidade Autónoma, de conformidade coa proposta do conselleiro de Sanidade e Servicios Sociais e presidente do Servicio Galego de Saúde e coas condicións estipuladas nos acordos do Pleno do Concello do 26 de maio de 1997 e 27 de abril de 1998 e logo de deliberación do Consello da Xunta de Galicia na súa reunión do día once de xuño de mil novecentos noventa e oito,
DISPOÑO:
Artigo 1º
1. Acéptase a cesión a título gratuíto, feita polo Concello de Xinzo de Limia a favor do Servicio Galego de Saúde, para a ampliación do actual centro de saúde da localidade.
2. O predio cedido, ten unha superficie de 565m e está sito na rúa Río Sil de Xinzo de Limia, sendo as súas extremas as seguintes:
-Ó norte: terreo municipal.
-Ó sur: soar adxudicado a María Concepción Enríquez Rodríguez-Montero (parcela N).
-Ó leste: zona verde do polígono nº 2.
-Ó oeste: rúa, libre de cargas.
Artigo 2º
O inmoble cédese segundo o establecido nos artigos 23.1º da Lei 3/1985, do 12 de abril, do patri
monio da Comunidade Autónoma, e 38 do seu regulamento e destinarase á ampliación do centro de saúde.
Artigo 3º
O Servicio Galego de Saúde, a través do seu órgano competente, procederá á formalización da aceptación no correspondente documento público e á inscrición do inmoble no Rexistro da Propiedade ó seu nome, integrándose no seu patrimonio propio.
Disposición derradeira
O Servicio Galego de Saúde, a través do seu órgano competente, levará a cabo os trámites necesarios para a efectividade de canto se dispón neste decreto.
Santiago de Compostela, once de xuño de mil novecentos noventa e oito.
Manuel Fraga Iribarne
Presidente
José María Hernández Cochón
Conselleiro de Sanidade e Servicios Sociais
5755