De conformidade co disposto na cláusula primeira do convenio de colaboración entre o Ministerio de Agricultura, Pesca e Alimentación e a Xunta de Galicia para o tratamento dos datos derivados da xestión das axudas financiadas con fondos estructurais da
Unión Europea, que se asinou con data do oito de maio de mil novecentos noventa e oito, entre a ministra de Agricultura, Pesca e Alimentación e o conselleiro de Pesca, Marisqueo e Acuicultura da Xunta de Galicia.
A Secretaría Xeral da Consellería de Pesca, Marisqueo e Acuicultura
ACORDA:
Dispoñe-la súa publicación no Diario Oficial de Galicia, que figura como anexo á presente resolución.
Santiago de Compostela, 16 de xuño de 1998.
Juan José Álvarez Pérez
Secretario xeral da Consellería de Pesca,
Marisqueo e Acuicultura
Convenio de colaboración entre o Ministerio de Agricultura, Pesca e Alimentación e a Xunta de Galicia para o tratamento dos datos derivados da xestión das axudas financiadas con fondos estructurais da Unión Europea.
En Madrid, 8 de maio de 1998.
Comparecen:
Dunha parte, Loyola de Palacio del Valle-Lersundi, ministra de Agricultura, Pesca e Alimentación (Real decreto 762/1996, do 5 de maio) e doutra, Amancio Landín Jaraiz, conselleiro de Pesca, Marisqueo e Acuicultura da Xunta de Galicia (Decreto 349/1997, do 9 de decembro).
Interveñen:
Loyola de Palacio del Valle-Lersundi, como titular do departamento ministerial citado.
Amancio Landín Jaraiz, na súa condición de conselleiro de Pesca, Marisqueo e Acuicultura en nome da Comunidade Autónoma de Galicia.
Ámbalas partes recoñécense con capacidade para subscribi-lo presente convenio de colaboración e
Expoñen:
1º Que como consecuencia da integración da política pesqueira común no marco dos fondos estructurais europeos, a Comisión da Unión Europea decidiu a adopción dos seguintes programas:
-Programa operativo para a súa aplicación nas rexións españolas pertencentes ó obxectivo nº 1.
-Programa comunitario para a súa aplicación nas rexións españolas que non pertencen ó obxectivo nº 1.
-Programa comunitario integrado para a aplicación en España da iniciativa comunitaria PESCA.
2º Que lle corresponde á Xunta de Galicia a tramitación, resolución e pagamento da maior parte das axudas ó sector pesqueiro, no marco dos programas citados.
3º Que o seguimento e a avaliación da utilización das axudas ó sector pesqueiro provenientes dos fondos estructurais se garante no marco de cooperación entre a comisión e a Administración Xeral do Estado, a cal está obrigada a subministrarlle á comisión toda a información derivada da execución das accións cofinanciadas, a través dos informes elaborados conforme procedementos aprobados de común acordo.
4º Que para os efectos da remisión da dita información en tempo e forma á comisión, as comunidades autónomas subministrarán ó Ministerio de Agricultura, Pesca e Alimentación (en diante MAPA) os datos e a información da súa xestión relativos ás axudas cofinanciadas con fondos estructurais no marco dos programas citados.
5º Que co fin de axiliza-la elaboración da información polas comunidades autónomas faise precisa a implantación dun sistema de bases de datos conforme un programa homoxéneo.
6º Que o MAPA e a Xunta de Galicia deciden colaborar no ámbito das súas respectivas competencias na aplicación do tratamento técnico dos datos relativos á xestión dos fondos estructurais ó sector pesqueiro previstos nos programas comunitarios conforme as seguintes
Cláusulas:
Primeira.-Obxecto.
É obxecto do presente convenio a achega polo MAPA á Xunta de Galicia do apoio instrumental e técnico necesario para a rápida implantación dunha base de datos nela, e a súa programación e actualización conforme criterios homoxéneos, co fin de axiliza-la información sobre a utilización dos fondos estructurais con destino ó sector pesqueiro.
Segunda.-Contribución de medios.
Para os efectos do cumprimento do obxectivo do presente convenio, o MAPA encomendaralle a unha empresa do Estado a contribución dos medios técnicos e persoais que precise a Comunidade Autónoma para o mantemento e alimentación das súas bases de datos.
Terceira.-Subministración de información.
A Xunta de Galicia facilitará a implantación da base de datos e subministraralle ó persoal técnico da empresa do Estado a información que consta no anexo deste convenio para a súa introducción na citada base de datos.
Cuarta.-Seguimento da execución do convenio.
O MAPA e a Xunta de Galicia intercambiarán entre si a información que corresponda e elaborarán un documento de avaliación pormenorizado, para os efectos da verificación dos datos e do cumprimento dos prazos fixados para o seu traslado o MAPA.
Quinta.-Natureza.
O presente convenio ten natureza administrativa e atópase entre os supostos expresamente excluídos do ámbito da Lei 13/1995, do 18 de maio, de contratos das administracións públicas, segundo se determina no seu artigo 3.1º.c.
Sexta.-Persoal técnico.
A subscrición do presente convenio non comporta relación laboral entre cada unha das administracións asinantes do presente convenio e as persoas que poidan intervir.
Sétima.-Resolución.
Serán causas especiais de resolución do presente convenio:
-O mutuo acordo das partes.
-A denuncia, por calquera das partes, do posible incumprimento das cláusulas ou a alteración esencial do seu contido.
Oitava.-Cuestións litixiosas e xurisdicción competente.
A resolución de calquera cuestión litixiosa xurdida sobre a interpretación, modificación, resolución e efectos que puidesen derivarse da aplicación do presente convenio, corresponderalles ós órganos competentes da orde xurisdiccional do contencioso-administrativo, de conformidade coa Lei reguladora da dita xurisdicción, do 27 de decembro de 1956, na súa vixente redacción.
Novena.-Duración e denuncia.
O presente convenio será de aplicación durante o exercicio económico de 1998, salvo denuncia expresa dunha das partes con tres meses de antelación á finalización deste exercicio.
E en proba de conformidade, ámbalas partes asinan o presente convenio, por triplicado exemplar e en tódalas súas follas, no lugar e na data ó principio indicados. Loyola de Palacio del Valle-Lersundi. Amancio Landín Jaraiz.
ANEXO
Información para subministrar pola Comunidade Autónoma ó persoal técnico, para os efectos da súa inclusión na base de datos.
-Copia de tódalas solicitudes de axuda no marco dos programas.
-Copia das resolucións favorables ás solicitudes de axuda.
-Documentación sobre pagamentos realizados no marco dos programas.
-Información técnica e de indicadores de impacto.
-Correccións de erros detectados nas bases de datos.
4865