O Pleno da Corporación municipal da Estrada, en sesión extraordinaria celebrada o 23 de abril de 1998, acordou a cesión á Xunta de Galicia dun predio para a construcción dun centro de educación secundaria obrigatoria.
Conforme os artigos 17.1º da Lei 3/1985, do 12 de abril, do patrimonio da Comunidade Autónoma de Galicia, e 34 do seu regulamento aprobado polo Decreto 50/1989, do 9 de marzo, a adquisición pura e simple de bens a título gratuíto ou lucrativo requirirá decreto do Consello da Xunta de Galicia, por proposta da Consellería de Economía e Facenda. Así mesmo, os artigos 23.1º da mesma lei e 38.1º do regulamento establecen que non se poderán adquirir bens ou dereitos a título lucrativo cando o valor dos gravames, cargas ou afeccións impostos sobre eles supere o seu valor intrínseco; aínda que
non se considera carga, gravame ou afección os investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente ou doador.
Na súa virtude, por proposta do conselleiro de Economía e Facenda, feita nos termos nos que o Concello da Estrada acordou a cesión e logo de deliberación do Consello da Xunta de Galicia na súa reunión do día vintedous de maio de mil novecentos noventa e oito,
DISPOÑO:
Artigo 1º
Acéptase a cesión a título gratuíto feita polo Concello da Estrada a favor da Comunidade Autónoma de Galicia do terreo denominado A Granxa 2 situada no lugar de Granxa de Figueroa de Arriba, parroquia e termo municipal da Estrada (Pontevedra). Ten unha superficie aproximada de 7.250 m e linda ó norte, en 82 metros lineais con terreo de propiedade municipal destinado a zona deportiva e de lecer; ó sur, en 129 metros lineais con terreo de propiedade municipal detinado a carballeira; ó leste, en liña de 70 m coa pista de propiedade municipal que a separa do instituto de formación profesional, e ó oeste, en liña de 92 m, parte en curva, con franxa de terreo propiedade municipal pertencente ó predio denominado Granxa 3.
O dito inmoble está inscrito no Rexistro de Propiedade da Estrada no tomo 630, libro 513, folio 164, número 69.560, inscrición 1ª.
Artigo 2º
O inmoble cedido destinarase á construcción, pola Consellería de Educación e Ordenación Universitaria, dun centro de ensino secundario.
Artigo 3º
A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público e á inscrición do ben no Rexistro da Propiedade a nome da Comunidade Autónoma.
Disposición derradeira
A Consellería de Economía e Facenda, a través da Secretaría Xeral e do Patrimonio, levará a cabo tódolos trámites necesarios para a efectividade do presente decreto.
Santiago de Compostela, vintedous de maio de mil novecentos noventa e oito.
Manuel Fraga Iribarne
Presidente
José Antonio Orza Fernández
Conselleiro de Economía e Facenda
5256