Dentro do plan de actividades da EGAP para 1998, e conforme as funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase un curso sobre a Lei 30/1992, do 26 de novembro, de réxime xurídico das administracións públicas e do procedemento administrativo común. Incidencia práctica no réxime local, que deberá desenvolverse conforme as seguintes bases:
Primeira.- Obxectivos.
Actualización de coñecementos sobre a Lei 30/1992, do 26 de novembro, con especial referencia ás peculiaridades do procedemento administrativo no eido da Administración municipal, analizando a súa incidencia na normativa do réxime local.
Segunda.- Destinatarios.
Persoal da Administración xeral ó servicio das entidades locais, pertencentes a grupos C, D ou asimilados.
Terceira.- Solicitudes.
1. As persoas que desexen participar no curso programado deberán solicitalo no modelo oficial de instancia que figura ó final da convocatoria, e cubrir en tódolos epígrafes. Cando solicite o curso máis dun interesado da mesma corporación, o responsable do persoal poderá especifica-la orde de preferencia. No caso de que non se especifique, a EGAP aplicarálle-los criterios de selección ós que se fai referencia na base sétima.
2. A falsidade ou a ocultación de datos esenciais para a selección será motivo de exclusión automática.
Cuarta.- Tramitación de solicitudes.
As solicitudes irán dirixidas ó director da Escola Galega de Administración Pública e presentaranse no rexistro da EGAP, polígono das Fontiñas s/n, 15707 Santiago de Compostela, ou tramitaranse por calquera das outras formas previstas no artigo 38.4º da Lei 30/1992, do 26 de novembro, de réxime xurídico das administracións públicas, e do procedemento administrativo común.
Seguidamente efectuarase a selección dos participantes e esta notificaráselles directamente ós admitidos.
Quinta.- Prazo.
O prazo de presentación de instancias será de 15 días naturais, contados a partir da data de publicación da convocatoria.
Sexta.- Selección.
Os criterios de selección, dirixidos a concilia-las necesidades da organización na que prestan servicios os aspirantes e os intereses individuais destes, terán en conta a maior relación do posto de traballo desem
peñado co contido do curso. Terán preferencia aqueles que non realizasen ningún curso de similares características ó convocado.
En calquera caso, os criterios de selección suxeitaranse ás directrices sinaladas na Resolución do 27 de xuño de 1994 (Diario Oficial de Galicia nº 149, do 3 de agosto), pola que se fan públicos os criterios de participación nas actividades docentes da EGAP.
Sétima.- Modificacións.
A EGAP poderá modifica-lo desenvolvemento e mailo contido do curso anunciado para adaptalo ás necesidades da Administración e ás continxencias que poidan xurdir.
A EGAP reserva para si a facultade de anula-lo curso se o escaso número de solicitudes non xustificase a súa realización. Fíxase en 15 o número mínimo de asistentes.
Oitava.- Desenvolvemento.
8.1. Duración: 21 horas.
8.2. Lugar: A Coruña, Santiago de Compostela, Lugo, Ourense e Pontevedra.
8.3. Datas: tódolos martes e xoves laborables, comprendidos entre o 2 e o 23 de xuño.
8.4. Horarios: das 17 ás 20 horas.
8.5. Prazas: 30 en cada localidade.
Novena.- Certificado de asistencia.
Outorgaráselle-lo certificado de asistencia ós alumnos que participen con regularidade no curso, e é obrigatoria a asistencia a tódalas sesións. Toda inasistencia deberá ser xustificada convenientemente, sen que poida exceder en ningún caso do 15% das horas lectivas programadas.
Unha inasistencia superior ó 15% das horas lectivas programadas, aínda que sexa xustificada, impedirá a expedición do correspondente certificado.
Décima.- Contido.
Dereitos e deberes dos cidadáns: análise dos artigos 35 e seguintes da Lei 30/1992. Actos e resolucións administrativas: estudio dos actos presuntos (certificación e silencio administrativo). A revisión da actuación da Administración: revisión de oficio e recursos: o recurso ordinario. Referencia á vía contenciosa. A responsabilidade dos funcionarios públicos. Innovacións na nova normativa de procedemento administrativo. Incidencia da normativa en materia de procedemento administrativo no réxime local: formación da vontade dos órganos colexiados; tramitación e documentación dos acordos; recursos. A nova Lei de réxime local de Galicia. Vixencia do ROF. Uso da lingua na Administración local. Problemática xurídica: dereitos e obrigas dos funcionarios. A Lei 5/1988, de uso do galego como lingua oficial de Galicia polas entidades locais.
Santiago de Compostela, 15 de abril de 1998.
Domingo Bello Janeiro
Director da Escola Galega de Administración Pública
3637
