A Lei 8/1994, do 30 de decembro, de creación do Instituto Galego de Consumo, establece no seu artigo 7 as funcións do seu presidente, entre as que se atopa a de ordena-los pagamentos do organismo.
Por outra banda, o artigo 72.2 e 4 da Lei 11/1992, do 7 de outubro, de réxime financeiro e presupostario de Galicia, establece que lles corresponde ós presidentes ou directores dos organismos autónomos da comunidade a autorización e disposición dos gastos e créditos, respectivamente, o recoñecemento de obrigas e a ordenación de pagamentos que correspondan a eles. Estas facultades poderán ser obxecto de delegación ou desconcentración nos termos que regulamentariamente se establezan.
A actividade administrativa do Instituto Galego de Consumo supón unha concentración de funcións arredor do seu presidente que aconsella, dado o seu volume, recorrer á delegación de competencias no xerente do organismo autónomo, sen esquece-lo debido respecto ós principios que informan a actividade administrativa e que a nosa Constitución recolle no seu artigo 103.1º.
A delegación de competencias permite a axilización administrativa necesaria que redunda en beneficio, tanto da administración como dos administrados, dentro do máis rigoroso respecto ás garantías xurídicas que a tutela dos intereses públicos esixe.
Na súa virtude, facendo uso das facultades que me confire o artigo 72.4º da Lei 11/1992, do 7 de outubro e o artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común, e demais disposicións de xeral aplicación,
RESOLVO:
Artigo único.-Delegar no xerente do Instituto Galego de Consumo a autorización de gastos e disposición de créditos así como o recoñecemento de obrigas e a ordenación de pagamentos relativos ós capítulos 1 gastos de persoal e 2 gastos en bens correntes e servicios ata os límites dos créditos autorizados que figuran no orzamento do organismo autónomo.
Disposición derradeira
A presente resolución entrará en vigor o día seguinte ó da súa publicación no Diario Oficial de Galicia.
Santiago de Compostela, 23 de marzo de 1998.
Jorge Rodríguez Vázquez-Molezún
Presidente do Instituto Galego de Consumo
2594