A Orde do 30 de xullo de 1997, conxunta das consellerías de Agricultura, Gandería e Montes e de Sanidade e Servicios Sociais, pola que se establece na Comunidade Autónoma de Galicia a normativa reguladora para a homologación de cursos de capacitación para realizar tratamentos con praguicidas, así como para a obtención do carné de manipuladores destes productos, establece no seu artigo 9 a obrigatoriedade de que o organismo oficial responsable publique no Diario Oficial de Galicia a información correspondente.
En consecuencia, anúnciase a convocatoria dun curso de aplicadores/manipuladores de praguicidas de uso ambiental e na industria alimentaria de acordo coas seguintes bases:
1. Denominación do curso:
Curso de aplicadores/manipuladores de praguicidas de uso ambiental e na industria alimentaria. Nivel básico.
2. Datos do organismo organizador:
O organismo organizador será:
Concello de Vigo.
3. Obxectivos do curso:
Con este curso preténdese que os participantes adquiran os coñecementos teóricos e prácticos e as habilidades prácticas necesarias para dosificar e aplicar adecuadamente os praguicidas e desinfectantes.
4. Destinatarios:
-Destinatarios: persoal aplicador adscrito ó parque de desinfección do Concello de Vigo.
-Nº de prazas: o número de alumnos que poderán participar será de 8.
-Criterios de selección: o solicitante deberá ser imprescindiblemente empregado do Concello de Vigo, adscrito ó parque de desinfección.
5. Celebración:
As clases correspondentes a este curso levaranse a cabo en:
Denominación do centro: Departamento de Ecoloxía e Bioloxía Animal. Pavillón 2, 2ª planta. Universidade de Vigo, Facultade de Ciencias.
Enderezo: Marcosende, s/n. Vigo.
Provincia: Pontevedra.
Teléfono e fax: (986) 81 25 80.
Duración e horario: o curso terá unha duración de 30 horas lectivas (15 teóricas e 15 prácticas) e realizaranse a finais do mes de marzo.
O horario do curso será de 17 a 20.30 horas.
6. Programa:
O temario que se impartirá é o que figura no anexo II.
7. Coordinador técnico do curso:
De acordo coa facultade conferida no artigo 10 da orde reguladora destes cursos, o coordinador técnico da Dirección Xeral de Saúde Pública será:
María del Carmen Sánchez Barral, xefa de Sección de Sanidade Ambiental da Delegación Provincial da Consellería de Sanidade e Servicios Sociais en Pontevedra.
8. Solicitudes e inscrición:
As solicitudes de asistencia, de acordo cos modelos que figuran no anexo I, tramitaranse ó alcalde-presidente do Concello de Vigo.
O prazo de presentación será de 10 días naturais contados desde o seguinte ó da publicación da presente resolución.
-Documentación: o persoal que desexe participar neste curso deberá presentar cuberta a solicitude que figura como anexo I xunto cunha fotocopia compulsada do DNI.
-Admisión: a relación de solicitantes admitidos exporase nos taboleiros de anuncios da Dirección Xeral de Saúde Pública, r/ Avda. Camiño Francés, 10, baixo en Santiago de Compostela, e do organismo organizador do curso antes dos 2 días naturais contados a partir do prazo de finalización da inscrición.
9. Certificado de superación do curso:
É obrigatoria a asistencia a tódalas sesións do curso. Finalizado este, a entidade organizadora realizará as probas pertinentes que avalíen os coñecementos adquiridos polos alumnos, e no caso de superalas expedirá o certificado co que poderá solicitar á Dirección Xeral de Saúde Pública o carné de manipulador de praguicidas de uso ambiental e de uso na industria alimentaria.
Santiago de Compostela, 4 de marzo de 1998.
Pilar Farjas Abadía
Directora xeral de Saúde Pública
ANEXO II
PROGRAMA DOS CURSOS PARA PRAGUICIDAS DE USO AMBIENTAL E NA INDUSTRIA ALIMENTARIA
Nivel básico
1. Praguicidas. Descrición e xeneralidades.
2. Riscos para o home derivados da utilización dos praguicidas.
3. Xeneralidades sobre pragas ambientais e da industria alimentaria e os métodos de loita antivectorial. Técnicas de aplicación de praguicidas.
4. Praguicidas e medio ambiente. Problemas que presentan. Destrucción de envases.
5. Hixiene e seguridade no seu manexo e aplicación.
6. Prevención, diagnóstico e primeiros auxilios en caso de intoxicación por praguicidas.
7. Exercicios prácticos.
8. Proba de avaliación.
Mínimo de horas lectivas: 20.