A Lei 6/1991, do 15 de maio, de infraccións en materia de protección de recursos marítimo-pesqueiros, tipifica como infraccións graves e moi graves o transporte de especies de tamaño inferior ó establecido (Art. 6.12º e 7.7º), así como o de especies mariñas vedadas (Art. 6.13º), sinalando a lei, no seu artigo 3, como suxeitos responsables das infraccións, os transportistas, axentes e, en xeral, as persoas físicas ou xurídicas que interveñan en operacións de transporte, e amparando o Art. 11.2-c) a incautación do vehículo que fose utilizado na comisión da infracción.

A problemática suscitada no servicio público de transporte de mercadorías no que, a diferencia do transporte privado, a actuación do transportista se limita á realización do transporte en virtude dun contrato previamente pactado e sen facultades, de acordo coa normativa actualmente en vigor, para abri-la mercadoría que previamente foi pechada e precintada polo cargador, fai preciso delimitar con maior concreción as responsabilidades polas infraccións que poidan ser cometidas neste ámbito.

Así, tendo en conta diversas sentencias que sobre esta materia foron dictadas polo Tribunal Superior de Xustiza de Galicia, e sen prexuízo de que o labor inspector da Administración comece xa no mesmo momento da actividade pesqueira e sexa continua a través de todo o proceso de comercialización, de resultar acreditada a identidade do expedidor da mercadoría ilegal, a esixencia de responsabilidade debería recaer neste último e non naquel que ten a simple condición de transportista, logo de instrucción do oportuno expediente sancionador.

Por todo o exposto, por proposta do conselleiro de Pesca, Marisqueo e Acuicultura, de acordo co dictame do Consello Consultivo de Galicia e logo da deliberación do Consello da Xunta de Galicia na súa reunión do día trinta de xaneiro de mil novecentos noventa e oito,

DISPOÑO:

Artigo único.

Modifícase o artigo 2 do Decreto 426/1993, do 17 de decembro, polo que se refunde a normativa vixente de desenvolvemento de determinados pre

ceptos da Lei 6/1991, do 15 de maio, de infraccións en materia de protección de recursos marítimo-pesqueiros, que terá a seguinte redacción:

Artigo 2º

1. Do incumprimento das obrigas preceptuadas en materia de pesca, marisqueo e acuicultura e tipificadas na Lei 6/1991 serán responsables as persoas físicas ou xurídicas, así como as comunidades de bens que incorran nelas, xa sexa de forma individual ou conxunta, aínda que a título de simple inobservancia.

2. A responsabilidade no transporte de especies vedadas ou de tamaño non regulamentario, cando se trate de transporte público, será esixible ó cargador da mercadoría transportada, cando a súa identidade resulte acreditada polos documentos que amparan o transporte.

Disposicións derradeiras

Primeira.-Facúltase o conselleiro de Pesca, Marisqueo e Acuicultura para que no ámbito da súa competencia dicte as disposicións que fosen necesarias para o desenvolvemento e execución do presente decreto.

Segunda.-O presente decreto entrará en vigor o día seguinte ó da súa publicación no Diario Oficial de Galicia.

Santiago de Compostela, trinta de xaneiro de mil novecentos noventa e oito.

Manuel Fraga Iribarne

Presidente

Amancio Landín Jaráiz

Conselleiro de Pesca, Marisqueo e Acuicultura